ខេត្តឧត្តរមានជ័យ ៖ រឿងរ៉ាវគួរឲ្យហួសចិត្តមួយបានកើតឡើង ដែលបុរសជាបងថ្លៃម្នាក់បានក្លាយជាបងថោក ព្រោះតែបានប៉ុនប៉ងរំលោភប្អូនថ្លៃស្រី កាលពីវេលាម៉ោង០២ និង៣០នាទីរំលងអធ្រាត្រឈានចូលថ្ងៃទី២០ ខែធ្នូ នៅឃុំបេង ស្រុកបន្ទាយអំពិល ។
ជនជាប់ចោទប៉ងរំលោភប្អូនថ្លៃស្រីនេះឈ្មោះឡោម លឿយ អាយុ៣៣ឆ្នាំ ជាកសិករ មានកូនប្រុសម្នាក់ ឯប្អូនថ្លៃស្រីដែលត្រូវប៉ងរំលោភ មានអាយុ៣០ឆ្នាំ និងមានកូនម្នាក់ដែរ ។ តាមការរៀបរាប់របស់ស្រី្តជាប្អូនថ្លៃថា នាល្ងាចថ្ងៃទី១៩ ខែធ្នូ ពេលត្រឡប់មកពីច្រូតស្រូវវិញ ប្តីប្រពន្ធគាត់បានទិញស្រា១លីត្រ យកមកផឹកស៊ីនៅនឹងផ្ទះ ហើយក៏មានបងប្អូនបង្កើតរួមទាំងប្តីមានគ្នា៤នាក់ចូលរួមផង ។ នាវេលាម៉ោងប្រមាណ៧យប់ ក្រោយពីផឹកស៊ីហើយ ក៏បែកគ្នាទៅផ្ទះរៀងៗខ្លួន ចំណែកឈ្មោះ ឡោម លឿយ ជាបងថ្លៃបានបបួលប្តីគាត់ទៅរាំលេង ដែលគេចាក់ធុងបាស់នៅកន្លែងរៀបអាពាណ៍ពិពាណ៍ ។
ស្ត្រីជាប្អូនថ្លៃរៀបរាប់ទៀតថា លុះនៅវេលាម៉ោងប្រមាណ២រំលងអធ្រាត្រ ឈានចូលថ្ងៃទី២០ ខែធ្នូ ស្រាប់តែបងថ្លៃរូបនេះ ដើចូលទៅក្នុងផ្ទះបន្លំជាប្តីរបស់គាត់ហើយស្រវាឱបថើបគាត់យ៉ាងខុសទំនង ហើយក៏ត្រូវគាត់ដឹងខ្លួន បានទាញពិលឆ្លុះបញ្ចាំងមើលមុខឃើញច្បាស់ជាបងថ្លៃ ក៏រត់ទៅប្តឹងលោកមេភូមិទាំងយប់ ឲ្យទូរស័ព្ទហៅនគរបាលមកឃាត់ខ្លួនភ្លាមៗ ។
ក្រោយពីបានទទួលព័ត៌មានរាយការណ៍ពីលោកមេភូមិភ្លាម នគរបាលក៏ចុះទៅដល់លំនៅឋានជនជាប់ចោទនិងឃាត់ខ្លួននាំយកមកអធិការដ្ឋានធ្វើការសាកសួរ ហើយជនជាប់ចោទសារភាពថា ខ្លួនពិតជាបានប៉ងរំលោភប្អូនថ្លៃស្រីពិតប្រាកដមែន ។
យោងលើពាក្យបណ្តឹងរបស់ស្ត្រីរងគ្រោះសមត្ថកិច្ចបានកសាងសំណុំរឿងបញ្ជូនជនសង្ស័យទៅស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធី ៕
ចែករំលែកព័តមាននេះ