ខេត្តឧត្តរមានជ័យ ៖ រឿងរ៉ាវមួយបានកើតឡើងគួរឲ្យហួសចិត្ត ខណៈបងថ្លៃមានចិត្តប៉ុនប៉ងរំលោភទៅលើប្អូនថ្លៃស្រី ដោយបបួលប្តីស្ត្រីរងគ្រោះទៅរាំលេង ស្រាប់តែលបចូលផ្ទះបន្លំធ្វើជាប្តីមកស្រវ៉ាអោបនាង តែស្ត្រីរងគ្រោះដឹងទាន់ បង្កឱ្យមានការភ្ញាក់ផ្អើលកាលពីម៉ោង២និង៣០នាទីយប់ ថ្ងៃទី២០ ខែធ្នូ ឆ្នាំ២០១៨ ស្ថិតនៅក្នុងស្រុកបន្ទាយអម្ពឹល ខេត្តឧត្តរមានជ័យ។
ជនជាប់ចោទពីបទប៉ុនប៉ងរំលោភទៅលើប្អូនថ្លៃស្រីឈ្មោះ ឡោម លឿយ ភេទប្រុស អាយុ៣៣ឆ្នាំ មានប្រពន្ធ និងមានកូនម្នាក់ មុខរបរកសិករ រស់នៅក្នុងភូមិឡសែនជ័យ ឃុំបេង ស្រុកបន្ទាយអម្ពឹល ខេត្តឧត្តរមានជ័យ ដោយឡែកស្ត្រីដែលរងគ្រោះអាយុ៣០ឆ្នាំ ត្រូវជាប្អូនថ្លៃ ក៏មានកូនប្រុសម្នាក់ មុខរបរជាកសិករ។
យោងតាមការរៀបរាប់ពីស្ត្រីរងគ្រោះថា មុនពេលកើតហេតុ ទាំង២នាក់ប្តីប្រពន្ធបានត្រឡប់ពីច្រូតស្រូវវិញ ហើយបានទិញស្រា.សមួយលីត្រយកមកផឹកស៊ីនៅនឹងផ្ទះរបស់ខ្លួន ខណៈនោះក៏មានបងប្អូនបង្កើត រួមទាំងប្តីមានគ្នា៤នាក់ ក្រោយពីផឹកស៊ីចប់ហើយក៏បែកគ្នាទៅផ្ទះរៀងៗខ្លួន ចំណែកជនសង្ស័យដែលត្រូវជាបងថ្លៃនោះបានបបួលប្តីរបស់ខ្លួនទៅរាំលេងដែលគេចាក់ធុងបាស់នៅកន្លែងអាពាហ៍ពិពាហ៍កូនប្រុសស្រីនៅម៉ោង៧យប់ថ្ងៃទី១៩ ធ្នូនោះ។
ស្ត្រីរងគ្រោះបានបញ្ជាក់ថា លុះនៅម៉ោងប្រមាណ២យប់ឈានចូលថ្ងៃទី២០ ធ្នូ ស្រាប់តែបងថ្លៃដើរចូលទៅក្នុងផ្ទះបន្លំជាប្តីរបស់ខ្លួន ហើយស្រវ៉ាអោបនាង តែនាងបានដឹងទាន់ ក៏បានទាញពិលឆ្លុះបញ្ចាំងមើល ស្រាប់តែឃើញបងថ្លៃ ខណៈនោះខ្លួនបានរត់ទៅប្តឹងលោកមេភូមិទាំងយប់ឲ្យទូរស័ព្ទហៅប៉ូលិសមកចាត់ការតាមផ្លូវច្បាប់ភ្លាមៗផងដែរ។
បើតាមប៉ូលិសអធិការស្រុកបន្ទាយអម្ពឹល បានឲ្យដឹងថា ក្រោយពីទទួលនូវព័ត៌មានពីលោកមេភូមិរួចមក កម្លាំងប៉ូលិសបានចុះទៅដល់លំនៅឋានជនជាប់ចោទធ្វើការឃាត់ខ្លួននាំយកមកអធិការដ្ឋានធ្វើការសាកសួរ ។
យោងតាមចម្លើយជនជាប់ចោទបានសារភាពថា ខ្លួនពិតជាបានប៉ុនប៉ងរំលោភទៅលើប្អូនថ្លៃស្រីពិតប្រាកដមែន និងយោងទៅលើពាក្យបណ្តឹងពីស្ត្រីរងគ្រោះ សមត្ថកិច្ចបានកសាងសំណុំរឿងបញ្ជូនជនសង្ស័យទៅស្នងការដ្ឋាននគបាលខេត្តឧត្តរមានជ័យ ដើម្បីចាក់ការបន្តតាមនីតិវិធីច្បាប់៕
ចែករំលែកព័តមាននេះ