ខេត្តរតនគិរី ៖ រថយន្តសាំយុងដឹកឈើប្រណិតខុសច្បាប់ចំនួន២គ្រឿងត្រូវបានកម្លាំងសមត្ថកិច្ចចម្រុះស្រុកអូរយ៉ាដាវបង្ក្រាបបានប្រគល់ឱ្យជំនាញរដ្ឋបាលព្រៃឈើបរកែវចាត់ការបន្តដោយប្រតិបត្តិការបង្ក្រាបនេះដឹកនាំដោយលោក ស៊ឹម លីន អភិបាលរងស្រុកអូរយ៉ាដាវបាន ចុះធ្វើឡើងនៅវេលាម៉ោង២រសៀល ថ្ងៃទី២០ ខែធ្នូ ឆ្នាំ២០១៨ លើកំណាត់ផ្លូវជាតិលេខ៧៨ ស្ថិតនៅក្នុងភូមិសោមត្រក ឃុំសោមធំ ស្រុកអូរយ៉ាដាវ ខេត្តរតនគិរី ។
បើតាមសមត្ថកិច្ចដែលចុះទៅបង្ក្រាបបានឱ្យដឹងថា រថយន្តលួចដឹកឈើប្រណិតខុសច្បាប់ទាំងពីរគ្រឿងខាងលើមានទី១-ម៉ាកសាំយ៉ុង ពណ៌ស ពាក់ផ្លាកលេខ ភ្នំពេញ 2D-2047 ដោយផ្ទុកឈើប្រណិតប្រភេទធ្នង់ចំនួន៧០៥គីឡូក្រាម និងឈើសុក្រំចំនួន០,៣៦៨ម៉ែត្រគូប និងទី២-ជារថយន្តម៉ាកសាំយ៉ុងដូចគ្នា ពណ៌ស ពាក់ផ្លាកលេខ បាត់ដំបង 2A-0159 បានផ្ទុកឈើប្រណិតប្រភេទធ្នង់ចំនួន២៣៥គីឡូក្រាម និងឈើសុក្រំចំនួន០,៣៥៣ម៉ែត្រគូប ។
សមត្ថកិច្ចបន្តទៀតថា រថយន្តទាំង២គ្រឿងខាងលើនេះបានធ្វើចរាចរណ៍ដឹកឈើតាមផ្លូវជាតិលេខ៧៨ដោយឆ្លងកាត់ស្រុកអូរយ៉ាដាវយកទៅលក់នៅប្រទេសវៀតណាម ប៉ុន្តែត្រូវកម្លាំងសមត្ថកិច្ចចម្រុះស្រុកអូរយ៉ាដាវ ចុះធ្វើការបង្ក្រាបបានតែម្តង និងរឹបអូសយករថយន្តទាំង២គ្រឿងនេះមក ប្រគល់ឱ្យជំនាញរដ្ឋបាលព្រៃឈើបរកែវចាត់ការបន្ត ។ បទល្មើសព្រៃឈើនៅខេត្តរតនគិរីភាគច្រើនគឺក្រុមឈ្មួញប្រើរូបភាពបន្លំភ្នែកសមត្ថកិច្ចដោយដឹកឈើទាំងនោះបន្លំជារថយន្តដឹកទំនិញ ដឹកបន្លែ ជាដើម ៕
ចែករំលែកព័តមាននេះ