ខេត្តកំពង់ឆ្នាំង ៖ សេចក្តីរាយការណ៍ឱ្យដឹងថា គ្រឿងចក្រនិងរថយន្ត២គ្រឿង ក្នុងចំណោម៤គ្រឿង ត្រូវបានសមត្ថកិច្ចជំនាញរដ្ឋបាលព្រៃឈើនៃមន្ទីរកសិកម្ម រុក្ខាប្រមាញ់ និងនេសាទខេត្ត រួមសមត្ថកិច្ចចម្រុះចុះបង្ក្រាបបាន ខណៈកំពុងធ្វើសកម្មភាពឈូសឆាយដីសហគមន៍ នៅចំណុចភូមិជ័រ ឃុំប្រស្នឹប ស្រុករលាប្អៀរ ខេត្តកំពង់ឆ្នាំង ។
ហេតុការណ៍ឃាត់គ្រឿងចក្រទាំង២គ្រឿងនេះ ធ្វើឡើងនៅរសៀលថ្ងៃទី២០ ធ្នូ បន្ទាប់ពីមានសេចក្តីរាយការណ៍របស់ក្រុមអ្នកសារព័ត៌មានរួចមក ។ ចំណែកគ្រឿងចក្រ១គ្រឿង និងរថយន្ត១គ្រឿងទៀត បើក គេចបាត់ ។
តាមសេចក្តីរាយការណ៍ពីប្រជាពលរដ្ឋនៅកន្លែងកើតហេតុថា ដីស្ថិតក្នុងទីតាំងដីខាងលើ គឺស្ថិតនៅក្នុង
ដីសហគមន៍ភូមិជ័រ ឃុំប្រស្នឹប ស្រុករលាប្អៀរ ដែលសហគមន៍នេះ បានបង្កើតឡើងនៅឆ្នាំ២០០៦ និង២០០៧ មានចំនួន១៧៤ហិកតា ក្នុងចំណោមដីសរុបចំនួន៥០០ហិកតា។ ប៉ុន្តែដីសហគមន៍ទាំង១៧៤ហិកតា នេះ ត្រូវបានជនខិលខូចឃុបឃិតគ្នា ជាមួយសហគមន៍អាជ្ញាធរមូលដ្ឋាន យកមេដៃប្រជាពលរដ្ឋធ្វើជាខែល ដើម្បីដោះដូរដីសហគមន៍ខាងលើ ទៅដាក់ទីតាំងផ្សេង ហើយក៏បានលក់ដីនោះទៅឱ្យចិន ដែលមានប្រពន្ធជាជនជាតិខ្មែរ ។
ប្រភពដដែលបញ្ជាក់ថា ការដោះដូរខាងលើ គឺមិនមានដល់អាជ្ញាធរខេត្ត ឬក្រសួងដឹងឮឡើយ គឺឃុបឃិតតែបក្សពួកគ្នាឯងថ្នាក់ក្រោមតែប៉ុណ្ណោះ ដោយគ្មានការទទួលស្គាល់ពីក្រសួង និងមានចេញ ស.ជ.ណអ្វីឡើយ ។ ជាមួយគ្នានេះ អាជ្ញាធរស្រុករលាប្អៀរ ក៏បានចេញលិខិតមួយច្បាប់ទៅឲ្យក្រុមហ៊ុនខាងលើចូលឈូសឆាយដីព្រៃចំណុចខាងលើនេះដែរ ដែលជាការខុសនឹងផ្លូវច្បាប់ យ៉ាងធ្ងន់ធ្ងរផងដែរ ។
ទោះយ៉ាងនេះក្តី លោក សោម វឺន អភិបាលស្រុករលាប្អៀរ បានបញ្ជាក់តាមទូរស័ព្ទថា លោកមិនបានដឹង
ថា គេឈូសឆាយដីព្រៃនៅតំបន់នោះទេ ប៉ុន្តែគ្រាន់តែដឹងថា ក្រុមហ៊ុនខាងលើ មកសុំអនុញ្ញាតឈូសធ្វើផ្លូវតែប៉ុណ្ណោះ ទើបលោកក៏ចេញច្បាប់អនុញ្ញាតទៅ ដោយមិនបានសុំការអនុញ្ញាតទៅខេត្តនោះឡើយ។
ដោយឡែក លោក ងិន ហុន ប្រធានមន្ទីរ កសិកម្មរុក្ខាប្រមាញ់ និងនេសាទក៏បានឱ្យដឹងដែរថា ការឃាត់គ្រឿងចក្រខាងលើ គឺបានចំនួន២គ្រឿង ក្នុងនោះប្រភេទអេស្កាវ៉ាទ័រមួយគ្រឿងនិង អាប៊ុលឈូសដី ១គ្រឿង ។ គ្រឿងចក្រទាំង២គ្រឿង រួមទាំងអ្នកបើកបរចំនួន២នាក់ កំពុងកសាងសំណុំរឿងបញ្ជូនទៅតុលាការតាមផ្លូវច្បាប់ ។
លោកបានបញ្ជាក់ថា ការកសាងសំណុំរឿងត្រូវដឹងថា ដីនោះវាស្ថិតក្នុងគម្របព្រៃរបស់រដ្ឋ ឬស្ថិតក្នុងដីសហគមន៍ ហើយទំហំការខូចខាងមានប៉ុន្មាន ។ ប៉ុន្តែលោកបដិសេធន៍ថា «គ្មានការរត់ការដោះលែងនោះ
ទេ» ។
ចែករំលែកព័តមាននេះ