ខេត្តពោធិ៍សាត់ ៖ បុរសអត់ឃ្លានម្នាក់បានទៅម៉ាស្សា ប៉ុន្តែពេលចូលដល់ក្នុងបន្ទប់ម៉ាស្សាមិនទាន់ទាំងបានម៉ាស្សាផងក្រឡេកឃើញកាបូបលុយនារីម៉ាស្សាទុកចោល បានលួចរត់ចេញមកក្រៅ ពេលនោះក៏ត្រូវក្រុមអ្នកបម្រើការងារក្នុងកន្លែងម៉ាស្សាក្របួចជាប់ប្រគល់ឲ្យប៉ូលិសតែម្ដង ។
ករណីនេះបានកើតឡើង កាលពីថ្ងៃទី២០ ខែធ្នូ ឆ្នាំ២០១៨ វេលាម៉ោង១៣និង៤០នាទីរសៀល នៅកន្លែងម៉ាស្សាមួយកន្លែងស្ថិតក្នុងភូមិរ៉ា សង្កាត់ផ្ទះព្រៃ ក្រុងពោធិ៍សាត់ ។
សមត្ថកិច្ចឲ្យដឹងថា ជនសង្ស័យឈ្មោះ ថន សុភាថុន ភេទប្រុស អាយុ២៣ឆ្នាំ មានទីលំនៅភូមិស្ពានថ្ម សង្កាត់រលាប ក្រុងពោធិ៍សាត់ ។ នៅថ្ងៃនោះជននេះបានទៅម៉ាស្សានៅកន្លែងខាងលើ ។ ខណៈពេលដែលនារីៗម៉ាស្សាកំពុងរៀបចំខ្លួននៅខាងក្រៅ ជននេះបានចូលទៅក្នុងបន្ទប់មុន ។ ពេលចូលដល់ក្នុងបន្ទប់មិនទាន់ទាំងបានធ្វើម៉ាស្សាផងក្រឡេកឃើញកាបូបលុយនារីម៉ាស្សាទុកចោលក៏លួចយក ហើយរត់ចេញមកក្រៅ ពេលនោះត្រូវអ្នកបម្រើការងារព្រួតគ្នាចាប់ប្រគល់ឲ្យប៉ូលិសតែម្ដង ។
ក្នុងកាបូបលុយមានប្រាក់ដុល្លារចំនួន១៩៥ដុល្លារ ប្រាក់រៀល១៩ម៉ឺនរៀល និងកងដៃប្លាទីន០១ ជារបស់នារីឈ្មោះ គាវ ស្រីម៉ាន់ ភេទស្រី អាយុ២៨ឆ្នាំ រស់នៅភូមិសង្កាត់ខាងលើ ។ ជាមួយគ្នានេះសមត្ថកិច្ចបានឆែកឆេរក្នុងខ្លួនជនសង្ស័យ រកឃើញម្ស៉ៅក្រាមសថ្លាចំនួន០២កញ្ចប់តូច ស្រោមអនាម័យ និងឧបករណ៍ជក់ថ្នាំញៀនមួយចំនួនទៀត ។
ជនសង្ស័យ និងវត្ថុតាងសមត្ថកិច្ចបានបង្កសំណុំរឿងបញ្ជូនទៅសាលាដំបូងខេត្ត ដើម្បីចាត់ការបន្តតាមនីតិវិធី ៕
ចែករំលែកព័តមាននេះ