ខេត្តកំពង់ឆ្នាំង ៖ ពលរដ្ឋប្រកបរបរឆ្អើរត្រីលក់នៅភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង កំពុងតែបារម្ភនឹងវាសនាមុខរបររបស់ខ្លួន ព្រោះឆ្នាំនេះមិនត្រឹមតែត្រីឡើងថ្លៃទេ ថែមទាំងអុសឡើងថ្លៃទៀត ដែលធ្វើឲ្យមុខរបរពឹងលើរងើកភ្លើងនេះកំពុងតែប្រឈមនឹងការបាត់បង់ ។
អ្នកប្រកបរបរទាំងនោះនិយាយថា ៖« ត្រីឆ្នាំនេះឡើងថ្លៃ ហើយអុសក៏ឡើងថ្លៃដែរ ដូច្នេះហើយមុខរបរនេះអាចនឹងបាត់បង់ នៅពេលឈ្មួញមិនជួយឡើងថ្លៃទៅតាមទីផ្សារដែរ »។ ពួកគាត់បញ្ជាក់ថា ៖« កាលពីឆ្នាំកន្លងទៅ ត្រីរៀល ត្រីលេញធំៗ ក្នុង១គីឡូក្រាម តម្លៃត្រឹមតែ៣.០០០ទៅ៣.៥០០រៀលប៉ុណ្ណោះ ប៉ុន្តែឆ្នាំនេះឡើងថ្លៃរហូតដល់៤.៥០០រៀល ហើយថ្ងៃខ្លះអាចឡើងដល់៥.០០០រៀលឯណោះ ថែមទាំងរកត្រីទិញមិនបានទៀត ។ ក្នុងនោះសូម្បីតែត្រីស្លឹកឫស្សី ដែលជាប្រភេទត្រីតូចៗបំផុតនោះ ក៏មានតម្លៃ៤.០០០រៀលដែរ ក្នុង១គីឡូក្រាម បើធៀបនឹងឆ្នាំមុនៗ តម្លៃមិនដល់ម្លឹងទេ »។
ពួកគាត់បន្ថែមថា ៖« ក្រៅពីត្រីឡើងថ្លៃហើយ អុសដែលធ្លាប់ទិញតម្លៃ១២.០០០រៀល ក្នុង១ម៉ែត្រគូប តែឥឡូវឡើងដល់១៨.០០០រៀលទៅហើយ ហើយបើមិនទិញ គឺគ្មានអុសដុតឆ្អើរត្រីដែរ ម្លោះហើយត្រូវតែទិញ ។ ចំណែកថ្លៃឈ្នួលដោតត្រីជាចង្កាក់វិញ មិនឡើងមិនចុះទេ គឺ១០ចង្កាក់ ថ្លៃ៥០០រៀលដដែល ។ ដូច្នេះហើយពួកយើងរំពឹងថា ម៉ូយដែលធ្លាប់មកទិញ នឹងឡើងថ្លៃទៅតាមទីផ្សារផងចុះ បើសិនជាឲ្យតមលៃដូចឆ្នាំមុនៗ ពួកយើងពិតជាខាត »។ ពួកគាត់បន្ថែមថា អ្នកនៅតំបន់នេះ ក្រៅពីធ្វើស្រែចម្ការ ការឆ្អើរត្រីលក់គឺជាមុខរបរប្រចាំត្រកូលរាប់ជំនាន់មកហើយ ។
យ៉ាងណាក៏ដោយពួកគាត់លើកឡើងថា តម្លៃត្រីឡើងថ្លៃនេះ ដោយសារតែភ្លៀងធ្លាក់ស្ទើររាល់ថ្ងៃ ធ្វើឲ្យត្រីមិនចុះ ហើយសង្ឃឹមថា នៅរដូវខ្នើតខែក្រោយ ត្រីនឹងសម្បូរឡើងវិញ ហើយរំពឹងថា តម្លៃនឹងធ្លាក់ចុះមកធម្មតា ។
ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង លោក ងិន ហ៊ុន បានប្រាប់កោះសន្ដិភាព កាលថ្ងៃទី១៨ ធ្នូ កន្លងមកថា ត្រីពិតជាមិនសំបូរមែននៅពាក់កណ្តាលខ្នើតខែមិគសិរនេះ ព្រោះតែមានភ្លៀងធ្លាក់ ។ យ៉ាងនេះក្ដីលោកបានបញ្ជាក់ថា ៖« ត្រីបានត្រូវរយៈពេល៣ថ្ងៃដែរ កាលពីសប្ដាហ៍មុន គឺនៅថ្ងៃព្រហស្បតិ៍ ថ្ងៃសុក្រ និងថ្ងៃសៅរ៍ ហើយក៏ចាប់ផ្ដើមស្ងាត់វិញ ក្រោយពីមានភ្លៀងធ្លាក់។ លោកសង្ឃឹមថា ៖« ត្រីនឹងសម្បូរឡើងវិញ នៅខ្នើតខែក្រោយៗទៀត » ៕
ចែករំលែកព័តមាននេះ