រាជធានីភ្នំពេញ ៖ តារាកំប្លែងជើងចាស់២ដួង គឺនាយ ក្តឹប និងនាយ សាន ម៉ៅ ស្ថិតក្នុងស្ថានភាពនៃអាការៈជំងឺគួរឲ្យមានការព្រួយបារម្ភដូចគ្នា បន្ទាប់អ្នកទាំងពីរត្រូវបានក្រុមគ្រួសារយកមកសង្គ្រោះបន្ទាន់នៅមន្ទីរពេទ្យកាលពីពេលថ្មីៗនេះ។
តារាកំប្លែងក្នុងក្រុមនាយ កុយ គឺនាយ សាន ម៉ៅ ត្រូវបានក្រុមគ្រួសារបញ្ជូនមកធ្វើការសង្គ្រោះបន្ទាន់ភ្លាមៗនៅមន្ទីរពេទ្យកាល់ម៉ែត បន្ទាប់ពីអាការៈជំងឺរបស់លោកបានចាប់ផ្តើមរើ និងធ្វើទុក្ខខ្លាំង។ តារាកំប្លែងរូបនេះ បានចូលមកព្យាបាលនៅក្នុងបន្ទប់សង្គ្រោះបន្ទាន់នៅមន្ទីរពេទ្យកាល់ម៉ែត កាលពីថ្ងៃទី១៨ ខែធ្នូ ឆ្នាំ២០១៨ ដោយសារជំងឺបេះដូងជំហ និងជំងឺហើមសួត។
បើតាមក្រុមគ្រួសាររបស់លោកបញ្ជាក់ថា បន្ទាប់ពីការពិនិត្យ និងព្យាបាលយ៉ាងយកចិត្តទុកដាក់ពីក្រុមគ្រូពេទ្យ លោក សាន ម៉ៅ ហាក់មានសភាពធូរស្រាលបន្តិច បើគិតមកដល់ថ្ងៃទី២១ ធ្នូនេះ ប៉ុន្តែលោកនៅតែស្ថិតក្នុងបន្ទប់សង្គ្រោះបន្ទាន់ដដែល ដោយសារតែលោកនៅពិបាកក្នុងការដកដង្ហើម ហើយត្រូវការអុកស៊ីហ្ស៊ែនជាជំនួយចាំបាច់។
ជាការកត់សម្គាល់កាលពីដើមឆ្នាំ២០១៨ នាយ សាន ម៉ៅ តារាកំប្លែងវ័យ៥៤ឆ្នាំនេះ ក៏ធ្លាប់ត្រូវបានក្រុម គ្រួសារដឹកបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែតម្តងមកហើយ ដោយសារជំងឺបេះដូង និងទឹក ក្នុងសួតធ្ងន់ធ្ងរ ប៉ុន្តែព្យាបាលបានមួយរយៈក៏មានអាការៈធូរស្បើយវិញ។
ដោយឡែកតារាកំប្លែងនៅក្នុងក្រុមនាយ ក្រឹម គឺនាយ ក្តឹប ក៏ត្រូវបានក្រុមគ្រួសារបញ្ជូនមកសង្គ្រោះបន្ទាន់ជាថ្មីផងដែរ បន្ទាប់ពីតារាកំប្លែងរូបនេះទទួលរងនូវជំងឺស្ពតរសសៃឈាមខួរក្បាល។ តារាកំប្លែងរូបនេះបានទទួលការព្យាបាលពីក្រុមគ្រូពេទ្យទាំងនៅក្នុងស្រុក និងក្រៅស្រុក ប៉ុន្តែដោយសារជំងឺមានសភាពធ្ងន់ធ្ងរពេក លោកបានទទួលរងនូវការស្លាប់មួយចំហៀងខ្លួនជាមួយអាការៈជំងឺកាន់តែធ្ងន់ធ្ងរ។
បើតាមលោក សុះ ម៉ាច ដែលបានចុះទៅសួរសុខទុក្ខ និងនាំយកអំណោយទៅជូននាយ ក្តឹប ដោយផ្ទាល់បានឲ្យដឹងថា តារាកំប្លែងរូបនេះបានចូលមកសង្គ្រោះបន្ទាន់នៅមន្ទីរពេទ្យព្រះកេតុមាលា បន្ទាប់ពីអាការៈជំងឺបានរើឡើងវិញក្នុងសភាពមួយគួរឲ្យព្រួយបារម្ភ។
លោកបញ្ជាក់ថា នាយក្តឹបមានអាការ:ហត់ពិបាកដកដង្ហើម ហើយនាយបានតែទឹក១តំណក់ៗប៉ុណ្ណោះ ។ បើតាមសំដីរៀបរាប់របស់ភរិយាដែលលោកគ្រូពេទ្យបានប្រាប់ថា លោកហាក់គ្មានសង្ឃឹមទេ ដូចនេះគាត់ចង់យកនាយទៅផ្ទះធ្វើបុណ្យសង្ឃទានជូននាយវិញ តែយ៉ាងណាសុខចិត្តបន្តព្យាបាលឱ្យអស់ចិត្តសិន។
គួររំលឹកថា ទាំងនាយ សាន ម៉ៅ និងនាយ ក្តឹប គឺជាតារាកំប្លែងក្នុងចំណោមតារាកំប្លែងនាយ សង់ ស៊ីស និងតា ផ្លុង មឿក និងតារាកំប្លែងមួយចំនួនទៀតដែលបាននិងកំពុងតែញាំញីដោយសារជំងឺ ក្នុងអាការៈមួយគួរឲ្យព្រួយបារម្ភ ខណៈពេលតារាកំប្លែងនាយ វីតាមីនសេ បានទទួលមរណភាពដោយសារជំងឺដ៏កាចសាហាវនេះកាលពីពេលកន្លងទៅ៕
ចែករំលែកព័តមាននេះ