ខេត្តបន្ទាយមានជ័យ ៖ តាមសេចក្តីរាយការណ៍បឋមបានឱ្យដឹងថា សិស្សអនុវិទ្យាល័យបាលិលេយ្យជិត១០នាក់បានដួលសន្លប់ជាបន្តបន្ទាប់ កាលពីព្រឹកថ្ងៃទី២១ ធ្នូ ២០១៨ មិនទាន់ដឹងមូលហេតុ។ ករណីខាងលើនេះគ្រូៗនិយាយថា មិនមែនជាការពុលចំណីអាហារនោះទេ…
ខេត្តបន្ទាយមានជ័យ ៖ តាមសេចក្តីរាយការណ៍បឋមបានឱ្យដឹងថា សិស្សអនុវិទ្យាល័យបាលិលេយ្យជិត១០នាក់បានដួលសន្លប់ជាបន្តបន្ទាប់ កាលពីព្រឹកថ្ងៃទី២១ ធ្នូ ២០១៨ មិនទាន់ដឹងមូលហេតុ។
ករណីខាងលើនេះគ្រូៗនិយាយថា មិនមែនជាការពុលចំណីអាហារនោះទេ សង្ស័យដោយសារតែសិស្សម្នាក់ដួលសន្លប់ ហើយសិស្សផ្សេងទៀតបានឃើញក៏ភ័យដួលសន្លប់តាមគ្នា។
គ្រូខ្លះទៀតនិយាយថា អាចបណ្តាលមកពីសិស្សៗចូលរួមទិវាបរិស្ថានបោសសំអាតអនាម័យតាមដងផ្លូវជាតិជាមួយអាជ្ញាធរ ហើយអស់កម្លាំង លុះពេលវិលមកដល់សាលាវិញក៏កើតរឿងបែបនេះតែម្តង។
ទោះជាបីជាយ៉ាងណា ករណីសិស្សដួលសន្លប់ទាំងនេះត្រូវបានលោកគ្រូអ្នកគ្រូអន្តរាគមន៍ហៅរថយន្តសង្គ្រោះដឹកយកទៅសង្គ្រោះនៅមន្ទីរពេទ្យភ្លាមៗផងដែរ ក្នុងនោះមានទាំងរថយន្តនគរបាល និងអាវុធហត្ថហើយសិស្សមួយចំនួនបានចូលទៅព្យាបាលក្នុងគ្លីនិកឯកដែលនៅជិតៗនោះជាបណ្តោះអាសន្នទៀតផង។
ជុំវិញករណីខាងលើ នាយកសាលាអនុវិទ្យាល័យបាលិលេយ្យ លោកស្មិញ សឿត មិនអាចទាក់ទងសុំការអត្ថាធិប្បាយលម្អិតបានទេ ដោយទូរស័ព្ទចូល២ដង ម្តងគ្មានអ្នកទទួល ហើយម្តងទៀតឲ្យកូនរបស់លោកជាអ្នកទទួល ដោយបានឆ្លើយថា ប៉ាមិនដឹងទៅណាទេ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ