ពិតណាស់ ដែលខ្សែក្រវាត់ឡានគឺផ្តល់សារសំខាន់បំផុត…យ៉ាងណាសូមរំលែកទុក្ខដ៏ធំនេះផង
- កំពង់ឆ្នាំង
ខេត្តកំពង់ឆ្នាំង ៖ សេចក្តីរាយការណ៍បន្តឱ្យដឹងថា នៅព្រឹកថ្ងៃទី២១ ធ្នូ នេះ លោកស្រី ប៉ុក ណាឌី អាយុ៤៩ឆ្នាំ…
ខេត្តកំពង់ឆ្នាំង ៖ សេចក្តីរាយការណ៍បន្តឱ្យដឹងថា នៅព្រឹកថ្ងៃទី២១ ធ្នូ នេះ លោកស្រី ប៉ុក ណាឌី អាយុ៤៩ឆ្នាំ…
ខេត្តកំពង់ឆ្នាំង ៖ សេចក្តីរាយការណ៍បន្តឱ្យដឹងថា នៅព្រឹកថ្ងៃទី២១ ធ្នូ នេះ លោកស្រី ប៉ុក ណាឌី អាយុ៤៩ឆ្នាំ ជាអភិបាលរងខេត្តបន្ទាយមានជ័យដែលរងរបួស គឺកំពុងសម្រាកព្យាបាលនៅក្នុងមន្ទីរពេទ្យបង្អែកខេត្តកំពង់ឆ្នាំងនៅឡើយ ។ ដោយឡែក សាកសពលោកស្រី សោ មុន្នីរ័ត្ន ជាអភិបាលរងខេត្តប៉ៃលិនបានបញ្ជូនចេញពីមន្ទីរពេទ្យបង្អែកខេត្ត ទៅកាន់លំនៅឋាននៅឯខេត្តប៉ៃលិនកាលពីយប់ថ្ងៃទី២០ ធ្នូ ដើម្បីរៀបចំធ្វើបុណ្យទៅតាមប្រពៃណី ។ រីឯកូនប្រុសលោកស្រីឈ្មោះ គិន ណាំចូក ជាអ្នកបើកបររថយន្តដែលរងរបួសស្រាល ក៏បានត្រឡប់ទៅផ្ទះ ជាមួយសាកសពម្តាយគាត់ផងដែរ ។
សេចក្តីរាយការណ៍បន្តថា នៅក្នុងហេតុការណ៍គ្រោះថ្នាក់ចរាចរណ៍ដ៏រន្ធត់នេះ សមត្ថកិច្ចបានពិនិត្យឃើញថា លោកស្រីអភិបាលរងខេត្តប៉ៃលិន គឺបានបាក់.កស្លាប់ខណៈគាត់ជិះនៅផ្នែកក្រោយរថយន្ត ហើយមិនបានពាក់ខ្សែក្រវាត់នោះទេ ។ ចំពោះអ្នកដែលរងរបួស គឺមានកូនប្រុសលោកស្រីអភិបាលរងខេត្តប៉ៃលិន និងលោកស្រីអភិបាលរងខេត្តបន្ទាយមានជ័យគឺជិះផ្នែកខាងមុខ ប៉ុន្តែគាត់ទាំង២បានពាក់ខ្សែក្រវាត់ការពារ ទើបអាចរួចពីសេចក្តីស្លាប់នេះ ។
គួររំលឹកថា អភិបាលរងខេត្តប៉ៃលិនលោកស្រី សោ មុន្នីរ័ត្ន បានស្លាប់ខណៈដឹកទៅសង្គ្រោះនៅមន្ទីរពេទ្យបង្អែកខេត្ត បន្ទាប់ពីជួបឧប្បតិ្តហេតុគ្រោះថ្នាក់ចរាចរណ៍មួយ រវាងរថយន្ត៣គ្រឿងប៉ះទង្គិចគ្នាលើដងផ្លូវជាតិ ។ ហេតុការណ៍នេះ កើតឡើងកាលពីវេលាម៉ោង២ និង៣០នាទីរសៀលថ្ងៃទី២០ ខែធ្នូ នៅលើកំណាត់ផ្លូវជាតិលេខ៥ ចន្លោះបង្គោលគីឡូម៉ែត្រលេខ១០៤ និងលេខ១០៥ ស្ថិតក្នុងភូមិថ្មកែវ ឃុំស្វាយជ្រំ ស្រុករលាប្អៀរ ។
សមត្ថកិច្ចនគរបាលនៅកន្លែងកើតហេតុបានឲ្យដឹងថា រថយន្តរបស់លោកស្រី សោ មុនី្នរ័ត្ន អភិបាលរងខេត្តប៉ៃលិន ម៉ាកឡិចស៊ីស GS ៣០០ ពណ៌ស ពាក់ផ្លាកលេខ ភ្នំពេញ ២T -៨៩៧១ ធ្វើដំណើរក្នុងទិសដៅពីខេត្តប៉ៃលិនឆ្ពោះទៅរាជធានីភ្នំពេញ តាមបណ្តោយផ្លូវជាតិពីខាងជើងទៅខាងត្បូង ។ លុះមកដល់ចំណុចខាងលើ បានបុកជាមួយនឹងរថយន្តទួរីសមួយគ្រឿង ពណ៌ស ពាក់ផ្លាកលេខ ភ្នំពេញ ២AF-១៣៤៥ ក្នុងទិសដៅបញ្ច្រាសគ្នា ។
ក្រោយពេលប៉ះទង្គិចជាមួយរថយន្តទួរីសហើយ រថយន្តរបស់លោកស្រីអភិបាលរងខេត្តក៏ជ្រុលទៅបុកជាមួយនឹងរថយន្តធុនធំប្រភេទយីឌុបមួយគ្រឿងទៀត ពាក់ផ្លាកលេខ ភ្នំពេញ ៤A-២៣៨៣ បណ្តាលឱ្យរថយន្តទាំង៣គ្រឿងខ្ទាតធ្លាក់ចេញពីផ្លូវរៀងៗខ្លួន ។ ក្រោយពេលកើតហេតុ គេដឹងថារថយន្តរបស់លោកស្រីអភិបាលរងខេត្តប៉ៃលិន ដែលជិះគ្នា៣នាក់សុទ្ធតែរងរបួសធ្ងន់ ។
ក្នុងនោះលោកស្រីអភិបាលរងខេត្តប៉ៃលិន សោ មុនីរ័ត្ន ដែលជិះនៅខាងក្រោយរងរបួសធ្ងន់ជាងគេ ហើយត្រូវបានដឹកទៅសង្គ្រោះនៅមន្ទីរពេទ្យបង្អែកខេត្តភ្លាមៗតែជាអកុសលលោកស្រីក៏បានស្លាប់នៅក្នុងមន្ទីរពេទ្យ ។ ចំណែកអ្នករងរបួសធ្ងន់២នាក់ទៀត គឺលោកស្រី ប៉ុក ណាឌី អាយុ៤៩ឆ្នាំ អភិបាលរងខេត្តបន្ទាយមានជ័យ និងកូនប្រុសលោកស្រី សោ មុន្នីរ័ត្ន ឈ្មោះ គិន ណាំចូក ជាអ្នកបើកបររថយន្ត ។ ដោយឡែកអ្នកជិះក្នុងរថយន្តទួរីស និងរថយន្តយីឌុបគ្រាន់តែរងរបួសស្រាលប៉ុណ្ណោះ។
រថយន្តទាំង៣គ្រឿង ត្រូវបានសមត្ថកិច្ចនគរបាលខេត្ត យកទៅរក្សាទុកដើម្បីរង់ចាំការដោះស្រាយតាមផ្លូវច្បាប់ ។ ឯសពលោកស្រីអភិបាលរងខេត្ត ត្រូវបានក្រុមគ្រួសាររៀបចំដឹកយកទៅធ្វើបុណ្យតាមប្រពៃណី ។ មានការកត់សម្គាល់ថា មានថ្នាក់ដឹកនាំខេត្តចំនួន៣រូបហើយដែលជួបគ្រោះថ្នាក់រហូតបាត់បង់ជីវិតដោយសារគ្រោះថ្នាក់ចរាចរណ៍ ដែលកន្លងមកមាន លោក ខាំ ភឿន អភិបាលខេត្តក្រចេះ លោក ទ្រី ណា
រិន អភិបាលខេត្តបន្ទាយមានជ័យ និងពេលនេះលោកស្រី សោ មុនីរ័ត្ន អភិបាលរងខេត្តប៉ៃលិន ៕
ចែករំលែកព័តមាននេះ