តាំងពីបុរមបុរាណមកតាមទំនៀមទម្លាប់ខ្មែរយើងមានវប្បធម៌មួយមុននឹងសាងសង់លំនៅឋាន ម្ចាស់ផ្ទះតែងទៅរកគ្រូហោរគុណគូរមើលដីភូមិឋានគួរធ្វើផ្ទះបែរទៅទិសណាដែលល្អជាមុនសិន ទើបហ៊ានសាងសង់ជាក្រោយ ដែលភាគច្រើនគេនិយមសង់លំនៅឋានបែរមុខទៅទិសខាងកើត និងទិសត្បូង ដែលគាត់មានជំនឿថា ទិសទាំងពីរនេះនឹងនាំសុខចម្រើន នាំឱ្យរកស៊ីមានបាន នាំលាភ នាំសំណាងចូលផ្ទះ គ្រួសារគ្មានជំងឺដង្កាត់ ។
រឿងការប្រកាន់ទិសនេះបើតាមលោកតាមុត បឿនជាអាចារ្យវត្តខេមរារាមនៅក្នុងខេត្តកំពុងចាមបានរៀបរាប់ថា តាំងពីដើមមកទំនៀមខ្មែរយើងភាគច្រើនដែលគាត់មានជំនឿប្រកាន់លើទិសដោយមានផ្នត់គំនិតថា ការរកទទួលទានកាក់កបឬមិនគាប់ប្រសើរនោះក៏មកពីការរៀបចំអ្វីមួយត្រឹមត្រូវ ឬមិនត្រូវទៅតាមទិស ។ ដោយហោចទៅសូម្បីតែហោមពិធីនានាដូចជា ពិធីក្រុងពាលី ពិធីបន់ស្រន់អារុក្ខអារក្ស ទេវតា អ្នកតា ពិធីសែនព្រេនជាដើម តែងឃើញចាស់ទុំក្នុងភូមិរៀបចំទីកន្លែងធ្វើពិធីបែរមុខទៅទិសណាដែលគាត់យល់ថា នាំសុខចម្រើននាំលាភសំណាងដល់កូនចៅ ។
លោកតាបានពន្យល់បន្តថា ទិសធំៗនៅក្នុងតម្រាចាស់បុរាណមាន៤គឺៈ
១-ទិសខាងកើត លោកទុកដូចជាមាតាបិតា។ បានជាលោកប្រៀបទិសនេះទៅនឹងឪពុកម្តាយ ព្រោះឪពុកម្តាយជាអ្នកបង្កើតកូនប្រុសស្រី លោកមានគុណូបការៈច្រើនឥតគណនា តាំងពីប្រសូតកូនមក រហូតមានស្វាមីភរិយា។
២-ទិសខាងត្បូងទុកដូចជាគ្រូបាអាចារ្យ។ គ្រូអាចារ្យដែលលោកប្រៀបទៅនឹងទិសទក្សិណ ដោយសារទិសនេះទុកដូចជាដៃស្តាំដែលនឹងធ្វើឱ្យសម្រេចប្រយោជន៍ដល់សិស្សគណៈបាន។
៣-ទិសខាងលិចទុកដូចជាប្រពន្ធ ។ ភរិយាដែលលោកប្រៀបទៅនឹងទិសបស្ចិម ដោយសារតែនាងជាស្ត្រីដើរ ឬធ្វើកិច្ចការអ្វីៗតែងតាមក្រោយស្វាមី ។
៤-ទិសខាងជើងទុកដូចជាមិត្តសម្លាញ់ ដែលលោកប្រៀបទិសឧត្តរទៅនឹងមិត្តសម្លាញ់ ព្រោះទិសនេះទុក ដូចដៃឆ្វេងដែលសម្រាប់ជួយដៃស្តាំឱ្យសម្រេចប្រយោជន៍នោះៗបាន ។
លោកតាបានបញ្ជាក់ថា បណ្តាទិសធំៗទាំង៤នេះបើតាមទំនៀមខ្មែរមានការនិយមទិសកើត និងទិសត្បូងជាងព្រោះគេមានជំនឿថាការធ្វើលំនៅឋានបែរទៅទិសណាមួយនៃទិសទាំងពីរនេះ នឹងនាំសុខចម្រើន នាំសុភមង្គល សិរីសួស្តីដល់គ្រួសារ ហើយរកទទួលទានមានបាន ។
ទោះជាយ៉ាងណាលោកតាបានបង្ហើរសម្តីថា បើតាមទស្សនៈខ្ញុំ សកម្មភាពសព្វបែបយ៉ាងដែលយើងធ្វើដោយសុចរិត៣យ៉ាងគឺ កាយសុចរិត វចីសុចរិត និងមនោសុចរិត ប្រាកដជានឹងនាំសុខសួស្តីចូលផ្ទះសម្បែង។ រឿងការប្រកាន់ទិសនោះគ្រាន់តែជាហេតុផលបន្ទាប់បន្សំប៉ុណ្ណោះ តែយើងក៏មិនអាចបោះបង់ចោលទំនៀមនេះបានដែរ ។ ឯកសារទំនៀមទម្លាប់ខ្មែរ
ចែករំលែកព័តមាននេះ