កំពូលខ្សែប្រយុទ្ធសញ្ជាតិអាហ្សង់ទីនគឺ Lionel Messi របស់ក្លិប Barcelona និយាយថា ខ្លួនមិនដែលស្រមៃថាទទួលបានជោគជ័យខ្លាំងដូច្នេះទេ បន្ទាប់ពីរូបគេឈ្នះពានស្បែកជើងមាសទ្វីបអឺរ៉ុបលើកទី៥ជាឯតទគ្គកម្ម។ Lionel Messi…
កំពូលខ្សែប្រយុទ្ធសញ្ជាតិអាហ្សង់ទីនគឺ Lionel Messi របស់ក្លិប Barcelona និយាយថា ខ្លួនមិនដែលស្រមៃថាទទួលបានជោគជ័យខ្លាំងដូច្នេះទេ បន្ទាប់ពីរូបគេឈ្នះពានស្បែកជើងមាសទ្វីបអឺរ៉ុបលើកទី៥ជាឯតទគ្គកម្ម។
Lionel Messi រកបាន៣៤គ្រាប់ពីការលេង៣៦ប្រកួតក្នុងក្របខ័ណ្ឌ La Liga រដូវកាល២០១៧-២០១៨ ធ្វើឱ្យលោកក្លាយជាអ្នករកបានគ្រាប់បាល់ច្រើនបំផុតក្នុងចំណោមលីគ
ធំបំផុតទាំង៥របស់អឺរ៉ុប នៅពីលើកីឡាករសញ្ជាតិអេសុីប Mohamed Salah របស់ក្លិប Liverpool ដែលរកបាន៣២គ្រាប់ ។
ការឈ្នះពាន European Golden Shoe លើកទី៥នេះ នាំឱ្យ Messi នាំមុខកីឡាករ
សញ្ជាតិព័រទុយហ្កាល់ Cristiano Ronaldo របស់ក្លិបJuventus ដែលបានឈ្នះពាន
ស្បែកជើងមាសទ្វីបអឺរ៉ុបនេះ៤ដង ។
Messi និយាយថា៖«ការពិតគឺខ្ញុំមិនដែលគិតថាជោគជ័យបែបនេះនឹងកើតឡើងឡើយពេលខ្ញុំចាប់ផ្ដើមអាជីពដំបូង ។ ខ្ញុំបានស្រមៃលេងបាល់ទាត់អាជីព និងរីករាយជាមួយជោគជ័យ ។ ខ្ញុំស្រឡាញ់ការប្រកួត ប៉ុន្តែខ្ញុំមិនដែលស្រមៃថាខ្ញុំនឹងមានជោគជ័យច្រើនដូច្នេះឡើយ»។
ដោយឡែក ខ្សែប្រយុទ្ធអង់គ្លេស Harry Kane ឈរនៅលេខរៀងទី៣នៃការប្រជែងពានស្បែកជើងមាសអឺរ៉ុបរដូវកាល២០១៧-២០១៨ ដោយរកបាន៣០គ្រាប់សម្រាប់ក្លិប Tottenham ក្នុងក្របខ័ណ្ឌ Premier League ។
Ronaldo ដែលរដូវកាលនេះកំពុងលេងឱ្យ Juventus រដូវកាលមុនរកបាន២៦គ្រាប់ពី២៧ប្រកួតនៅ La Liga ។ ចំណែក Messi ក្នុងរដូវកាល២០១៨-២០១៩នេះក៏កំពុងនាំមុខគេក្នុងតារាងអ្នកស៊ុតចូលទីច្រើនក្នុងលីគធំបំផុតទាំង៥របស់អឺរ៉ុបដែរ ដោយរកបាន១៤គ្រាប់រួចហើយ៕
ចែករំលែកព័តមាននេះ