សហរដ្ឋអាមេរិក-តួកគី ៖ ពេលកំពុងមានភាពតានតឹងរវាងសហរដ្ឋអាមេរិកនិងតួកគី ព្រោះតែចេតនារបស់តួកគីចង់ទិញមីស៊ីលS-400ពីរុស្ស៊ី កាលពីថ្ងៃទី១៩ធ្នូក្រសួងការទេសអាមេរិក បានអនុម័តលើការលក់មីស៊ីលPATRIOTដល់ទៅ៨០គ្រឿង ព្រមទាំងឧបករណ៍យោធាឯទៀតៗដល់ក្រុងអង់ការ៉ា។ ទោះបីយ៉ាងណានោះពុំទាន់មានន័យថា កុងត្រាត្រូវបានចុះហត្ថលេខានៅឡើយ។
មន្ទីរប៉ង់តាហ្គោនក្រោយពីផ្ដល់ព័ត៌មាននោះដល់សភាប្រកាសថា ក្រសួងការបរទេសអាមេរិកបានយល់ព្រមដល់ការលក់ជាយថាហេតុឲ្យដល់តួកគី ប្រព័ន្ធមីស៊ីលដី-អាកាសPATRIOT មានទឹកប្រាក់៣,៥ពាន់លានដុល្លារ។ ប៉ុន្តែនីតិវិធីនោះពុំមានន័យថា កុងត្រាមួយរវាងក្រុងវ៉ាស៊ិនតោននិងក្រុងអង់ការ៉ាត្រូវបានចុះហត្ថលេខានៅឡើយ។
តួកគីបានចុះហត្ថលេខាកាលពីដំណាច់ឆ្នាំ២០១៧ជាមួយរុស្ស៊ី លើកុងត្រាមួយមានទឹកប្រាក់២,៥ពាន់លានដុល្លារ សម្រាប់ទិញប្រព័ន្ធមីស៊ីលការពារអាកាសS-400។ ការផ្ដល់មីស៊ីលរុស្ស៊ីទាំងនេះដល់តួកគីធ្វើ្វឲ្យបណ្ដាសម្ព័ន្ធមិត្តក្នុងអង្គការអូតង់មានការព្រួយបារម្ភ ពិសេសព្រោះមីស៊ីលS-400ពុំអាចបញ្ចូលក្នុងរចនាសម្ព័ន្ធយោធាអូតង់។
បណ្ដាតំណាងអាមេរិកបានព្រមានដល់ក្រុងអង់ការ៉ាថា កុងត្រាចុះហត្ថលេខាជាមួយរុស្ស៊ី អាចប៉ះពាល់ដល់ការទិញយន្តហោះបំបាំងកាយF-35អាមេរិក ហើយអាចនាំឲ្យមានការដាក់ទណ្ឌកម្មទៀតផង៕
ចែករំលែកព័តមាននេះ