AFP ប្រចាំប្រទេសឥណ្ឌាផ្សាយកាលពីពេល ថ្មីៗកន្លងមកថាទីតាំងអនុស្សាវរីយ៍នៃក្ដីស្រឡាញ់«Taj Mahal» នៅក្រុងAgra ជាតំបន់ទេសចរណ៍ដ៏សំខាន់របស់ឥណ្ឌា មធ្យមមានភ្ញៀវទេសចរជនជាតិឥណ្ឌាក្នុងមួយថ្ងៃចូលប្រហែលពី១០.០០០ ទៅ១៥.០០០នាក់ និងកាលពីឆ្នាំ២០១៦មានភ្ញៀវសរុប៦,៥លាននាក់ ។
បច្ចុប្បន្នរដ្ឋាភិបាលឥណ្ឌាដែលមានតួនាទីក្នុងការថែរក្សាពីការសឹករេចរឹលវិមាន«Taj Mahal» បានប្រកាសដំឡើងថ្លៃសំបុត្រចូលទស្សនាសម្រាប់ពលរដ្ឋឥណ្ឌាពី៥០រូពី ទៅ២៥០រូពី។
ចំណែកភ្ញៀវទេសចរបរទេសត្រូវទិញសំបុត្រចូលទស្សនាពី១៥ដុល្លារ ទៅ១៩ដុល្លារវិញ ការដំឡើងថ្លៃគឺជាផ្នែកមួយក្នុងការកាត់បន្ថយភ្ញៀវ និងកាត់បន្ថយការខូចខាតសឹករេចរឹល ។
មន្ត្រីពីនាយកដ្ឋានបុរាណវិទ្យាបញ្ជាក់ថាមូលហេតុដែលដំឡើងថ្លៃសំបុត្រនេះ ដើម្បីកាត់បន្ថយការជាន់សឹករេចរឹលបង្កឲ្យមានការខូចខាត និងកាត់បន្ថយចំនួនភ្ញៀវក្នុងមួយថ្ងៃបានប្រហែលពី១៥ ទៅ២០ភាគរយ ។
អ្នកជំនាញបានក្រើនរំលឹកថាចំនួនភ្ញៀវទេសចរដែលចូលទស្សនាកាន់តែខ្ពស់នឹងបង្កឲ្យមានការខូចខាត មិនវិលទៅរកភាពប្រក្រតីបាន ដោយសារមានកំណើនលើការសឹករេចរឹល និងអាកាសធាតុពុលកើនខ្ពស់នៅក្នុងទីក្រុង ។ ក្រៅពីនេះការខូចខាតក៏កើតពីកាកសំណល់នានាផងដែរ ៕
ចែករំលែកព័តមាននេះ