ឧត្តរមានជ័យ ៖ រឿងរាវមួយបានកើតឡើងយឺតយាវបន្តិច តែអ្វីគួរឲ្យសោកស្តាយមានប្រជាពលរដ្ឋខ្មែរ២នាក់ឆ្លងដែនចូលទៅក្នុងទឹកដីថៃពេលយប់ ត្រូវបានក្រុមទាហានថៃបាញ់៤គ្រាប់រត់ចែកជើងគ្នា កាលពីវេលាម៉ោងប្រមាណ៨ទៅ៩យប់ ថ្ងៃទី១៦ ធ្នូ ២០១៨ ។
ហេតុការណ៍នេះកើតនៅចំណុចខាងលិចកាស៊ីណូសាងាំរីសត នៅក្បែផ្លូវកៅស៊ូ ក្នុងភូមិស្រែព្រៃ ឃុំផៃផាត់តាណា ស្រុកភូស៊ិញ ខេត្តស៊ីសាកេតប្រទេសថៃ ដែលស្ថិតនៅទុលមុខច្រកទ្វារអន្តរជាតិជាំ សាងាំ ។
ប្រជាពលរដ្ឋដែលលួចចូលទៅក្នុងទឹកដីថៃទាំងយប់នោះ មានឈ្មោះ យ៉េប រ៉ូសេប ភេទប្រុសអាយុ៣៧ឆ្នាំ រស់នៅភូមិបេងធំ ឃុំសៀមបូក ស្រុកសៀមបូក ខេត្តស្ទឹងត្រែង បច្ចុប្បន្នមកស្នាក់នៅភូមិជាំ ឃុំត្រពាំងប្រិយ៍ ស្រុកអន្លង់វែង ខេត្តឧត្តរមានជ័យ មុខរបរមិនពិតប្រាកដនឹងម្នាក់ទៀតឈ្មោះ ស៊ិន សុំ (ហៅតាវែង) រស់នៅភូមិជាំ ឃុំត្រពាំងប្រិយ៍ ស្រុកអន្លង់វែង ខេត្តឧត្តរមានជ័យ មុខរបរមិនពិតប្រាកដ ។
លោកវរសេនីយ៍ឯកស៊ុ សារឿន មេបញ្ជាការកងវរសេនាតូចលេខ៩០៥ ប៉ូលិសការពារព្រំដែនគោកកម្ពុជាថៃបានឲ្យដឹងថា នៅយប់កើតហេតុ កាលពីវេលាម៉ោងប្រមាណ៨ទៅ៩យប់ក្នុងថ្ងៃទី១៦ ឆ្នាំ២០១៨ ក្រោយពីក្រុមទាហានឈុតខ្មៅថៃផ្ទុះអាវុធនោះលោកបានបញ្ជាកងកម្លាំងដែលឈរជើងតាមគោលដៅត្រៀមនឹងធ្វើការស៊ើបអង្កេតស្រាវជ្រាវរកអំពីមូលហេតុនៃការផ្ទុះ ឯអាវុធរបស់ក្រុមទាហានថៃផងដែរ ។
លោកវរសេនីយ៍ឯកបានបន្តថា អំពីមូលហេតុនៅក្នុងហេតុការនោះ ខណៈសមត្ថកិច្ចបានឃាត់ខ្លួនបុរស២នាក់ មកធ្វើការសាកសួរនាំ កាលពីព្រឹកថ្ងៃទី១៧ ធ្នូ ២០១៨ ហើយបុរសទាំង២នាក់បានឆ្លើយថា ចូលទៅរកឈើគ្រញូង តែសមត្ថកិច្ចបានធ្វើការសនិ្នដ្ឋានមិនមែនរកឈើគ្រញូងទេ នៅចំណុចនោះ រឿងដែលគួរឲ្យចាប់អារម្មណ៍នោះ គឺជននេះនឹងអាចរកស៊ីទិញម៉ូតូក្តៅពីក្រុមជនទុច្ចរិតប្រជាពលរដ្ឋថៃក៏អាចថាបានដែរ ក្រោយពីបានសាកសួរួចមក សមត្ថកិច្ចបានធ្វើការអប់រំ រួចឲ្យវិលត្រឡប់ទៅលំនៅឋានវិញ ៕
ចែករំលែកព័តមាននេះ