ខេត្តមណ្ឌលគិរី ៖ កសិករដាំដុះដំឡូងមីនៅខេត្តមណ្ឌលគិរី បានអះអាងថា តម្លៃដំឡូងមីបច្ចុប្បន្នកំពុងលក់បានថ្លៃ តែសោកស្តាយទិន្នផលធ្លាក់ចុះជាងឆ្នាំមុនៗបន្ដិច ធ្វើឲ្យពួកគាត់អន្ទះសាគ្រប់គ្នា ព្រោះគ្មានផលិតផលសម្រាប់លក់ឲ្យឈ្មួញ ។ បើតាមកសិកឈ្មោះ…
ខេត្តមណ្ឌលគិរី ៖ កសិករដាំដុះដំឡូងមីនៅខេត្តមណ្ឌលគិរី បានអះអាងថា តម្លៃដំឡូងមីបច្ចុប្បន្នកំពុងលក់បានថ្លៃ តែសោកស្តាយទិន្នផលធ្លាក់ចុះជាងឆ្នាំមុនៗបន្ដិច ធ្វើឲ្យពួកគាត់អន្ទះសាគ្រប់គ្នា ព្រោះគ្មានផលិតផលសម្រាប់លក់ឲ្យឈ្មួញ ។
បើតាមកសិកឈ្មោះ ញឿន ញ៉ាញ់ ដែលដាំដំណាំដំឡូងមី នៅភូមិអូរអាម ឃុំស្រែខ្ទុម ស្រុកកែវសីមា បានឱ្យដឹងថា ទិន្នផលដំឡូងមីឆ្នាំនេះបានថយចុះជាងឆ្នាំមុន តែចំពោះតម្លៃនៅលើទីផ្សារវិញ គឺអាចទទួលយកបាន ។ លោកបន្តថា ឆ្នាំមុនៗ ការប្រមូលផលដំឡូងមីក្នុង១ហិកតា អាចទទួលបានផលប្រហែល១៥ទៅ២៥តោន តែឆ្នាំនេះពុំសូវមានមើមធំៗល្អនោះទេ ។ និយាយរួមគឺខុសគ្នាដាច់ស្រឡះពីឆ្នាំមុនតែម្តង ។
លោកបញ្ជាក់ថា ៖« ឆ្នាំនេះ ដំណាំដំឡូងមីរបស់ខ្ញុំក្នុង១ហិកតាបានផលត្រឹមតែ៨ទៅ១០តោនប៉ុណ្ណោះ ។ ចំពោះតម្លៃវិញ បើអ្នកប្រមូលផលមុនគេលក់បានរហូតទៅដល់៣៩០ដល់៤១៥រៀល ដែលអាចមានលទ្ធភាពចំណេញបានខ្លះ ហើយខ្ញុំសង្ឃឹមថា តម្លៃដំឡូងមីឆ្នាំនេះ នឹងមិនធ្លាក់ចុះវិញទេ នៅពេលដែលដំឡូងមី ដល់រដូវប្រមូលផលពេញលេញនោះ » ។
លោក ស៊ុ ជីវ័ន្ត ម្ចាស់ដេប៉ូទទួលទិញដំឡូងមីក្នុងស្រុកកែវសីមា បានឲ្យដឹងថា តម្លៃដំឡូងមីឆ្នាំនេះល្អជាងឆ្នាំមុនៗ ព្រមទាំងមានទីផ្សារល្អទៀតផង ។ លោកបញ្ជាក់ថា ៖« បច្ចុប្បន្នតាមដេប៉ូទទួលទិញដំឡូងមីក្នុងតម្លៃចន្លោះពី៣៩០ទៅ៤១៥រៀល ក្នុង១គីឡូក្រាម »។
ប្រធានមន្ទីរកសិកម្ម រុក្ខប្រមាញ់ និងនេសាទខេត្តមណ្ឌលគិរី លោក សុង ឃាង បានឲ្យដឹងថា ទូទាំងខេត្តមណ្ឌលគិរី មានផ្ទៃដីដាំដុះដំឡូងមីប្រមាណ១ម៉ឺន២ពាន់ហិកតា បើធៀបនឹងឆ្នាំមុនគឺប្រហាក់ប្រហែលគ្នា ។
លោកបន្ដថា ក្នុងចំណោមក្រុង-ស្រុកទាំង៥របស់ខេត្ត គឺស្រុកកែវសីមា និងស្រុកពេជ្រាដា មានកសិករដាំដំឡូងមីច្រើនជាងគេ ។ លោកបញ្ជាក់ថា ៖« ពាក់ព័ន្ធនឹងទិន្នផលដំឡូងមីឆ្នាំនេះមិនសូវមានមើមធំៗ គឺមកពីកត្តាដីខ្វះជីជាតិ ព្រោះតែបងប្អូនកសិករដាំដំណាំដដែលៗលើដីចាស់ដែលនាំឲ្យខ្សោះជីជាតិ ហើយករណីនេះខាងមន្ទីរជំនាញ ក៏ធ្លាប់បានចុះណែនាំឲ្យផ្លាស់ប្តូរមុខដំណាំដែរ ដើម្បីប្រែក្លាយដីឲ្យមានជីជាតិឡើងវិញ តែទោះជាយ៉ាងណា តម្លៃដំឡូងមីឆ្នាំនេះគឺកសិករអាចទទួលយកបាន និងមានចិត្តសប្បាយរីករាយគ្រប់គ្នា »។ វិស័យដំឡូងមីកម្ពុជា កាន់តែរីកចម្រើន បន្ទាប់ពីមានដៃគូវិនិយោគ និងភាគីពាក់ព័ន្ធ បានចូលមកអភិវឌ្ឍន៍ជាបន្ដបន្ទាប់ ពិសេសក្រោយពេលមានរោងចក្រកែច្នៃដំឡូងមីនៅស្រុកចិត្របុរី ខេត្តក្រចេះ បានចាប់ផ្ដើមដំណើរការសង្វាក់ផលិតកម្មកែច្នៃដំឡូងមីសម្រាប់នាំចេញមក ធ្វើឲ្យតម្លៃ និងទីផ្សារដំឡូងមីហក់ឡើងតែម្ដង ។
គួររំឭកថា កាលពីថ្ងៃទី២៣ សីហា កន្លងមក អង្គការUNDP ប្រចាំកម្ពុជា និងក្រុមហ៊ុនGreen Leader ដែលជាក្រុមហ៊ុនបាននិងកំពុងវិនិយោគរោងចក្រកែច្នៃដំឡូងមីនៅខេត្តក្រចេះ បានចុះកិច្ចព្រមព្រៀងមួយក្នុងការជំរុញលើកកម្ពស់វិស័យដំឡូងមីកម្ពុជា ប្រកបដោយបរិយាប័ន្ន និងមាននិរន្តរភាព ស្របតាមគោលនយោបាយអភិវឌ្ឍន៍វិស័យដំឡូងមីរបស់កម្ពុជា ។
យោងតាមរបាយការណ៍អគ្គនាយដ្ឋានកសិកម្មបានបង្ហាញថា កាលពីឆ្នាំ២០១៧ កន្លងទៅ ការនាំចេញផលិតផលចំណិតដំឡូងមីស្ងួតទៅកាន់ទីផ្សារបរទេសមានប្រមាណជាង២,៣លានតោន ខណៈដែលការនាំចេញដំឡូងមីស្រស់ មានចំនួនជាង៧៥ម៉ឺនតោន ក្នុងនោះប្រទេសថៃ និងវៀតណាម ត្រូវបានចាត់ទុកថា ជាទីផ្សារធំបំផុតក្នុងការនាំចេញ ខណៈទីផ្សារនាំចេញទៅប្រទេសចិនផ្ទាល់ ហាក់មានតិចតួចនៅ
ឡើយ ៕
ចែករំលែកព័តមាននេះ