ខេត្តព្រៃវែង ៖ កំពុងតែហ៊ោសប្បាយកងរំពងព្រៃ ស្រាប់តែកម្លាំងអាវុធហត្ថ ចុះទៅដល់ធ្វើឲ្យក្រុមអ្នកវក់នឹងល្បែងបញ្ជល់មាន់រាប់សិបនាក់ ផ្អើលរត់ចែកជើងគ្នាទាំងព្រលឹងចុងសក់ ដោយមិននឹកស្មានថា មានសមត្ថកិច្ចចុះទៅចាប់សោះ ព្រោះគេប្រកាសថា កុំភ័យខ្លាចបានចរចារួចអស់ហើយ ។
ប្រតិបត្តិការឆ្មក់ចុះបង្ក្រាបទីតាំងសង្វៀនបញ្ជល់មាន់ខាងលើនេះ បានធ្វើឡើងកាលពីវេលាម៉ោង១និង៣០នាទីរសៀលថ្ងៃទី១៦ ខែធ្នូ នៅភូមិគោកព្រាល ឃុំស្មោងជើង ស្រុកកំចាយមារ ។ កម្លាំងអាវុធហត្ថដែលចុះបង្ក្រាបនេះ មាន១២នាក់ ដឹកនាំដោយលោកវរសេនីយ៍ឯក ញ៉ែម វីរៈជួប មេបញ្ជាការរងកងរាជអាវុធហត្ថខេត្ត ដោយប្រើប្រាស់រថយន្ត១គ្រឿង និងម៉ូតូ៥គ្រឿងជាមធ្យោបាយ ។
លោកវរសេនីយ៍ត្រី ផាត់ សុជោត ប្រធានមន្ទីរយុត្តិធម៌នៃកងរាជអាវុធហត្ថខេត្តបានឲ្យដឹងថា ក្នុងប្រតិ បត្តិការនេះ កម្លាំងអាវុធហត្ថចាប់បានមាន់ជល់៤ក្បាល មេអាប៉ោងចំនួន៣ និងម៉ូតូអ្នកទៅលេងបញ្ជល់ មាន់ចំនួន៣៩គ្រឿង ។ វត្ថុតាងទាំងអស់នេះក្រោយពីចាប់ ត្រូវបានបញ្ជូនមកបញ្ជាការដ្ឋានកងរាជ អាវុធ ហត្ថខេត្តដើម្បីបំពេញនីតិវិធី ។
ដោយឡែក ប្រភពព័ត៌មានពីប្រជាពលរដ្ឋនៅក្នុងឃុំស្មោងជើងបានប្រាប់ឲ្យដឹងថា ទីតាំងសង្វៀនបញ្ជល់មាន់នេះ គេបើកលេងតាំងពីយូរឡើងដុះស្លែទៅហើយ ។ ចំណែកសមត្ថកិច្ចក្នុងមូលដ្ឋានវិញ កុំថាឡើយទៅចាប់ សូម្បីតែទៅក្បែរ ក៏មិនដែលទៅដែរ ព្រោះម្ចាស់សង្វៀននេះគេបានសែនត្រូវអស់ហើយ ។
ការចុះបង្ក្រាបដោយមន្ត្រីអាវុធហត្ថនាពេលនេះ មិនត្រឹមតែធ្វើឲ្យក្រុមអ្នកញៀននឹងល្បែងបញ្ជល់មាន់ទាំងនោះភ័យស្លន់ស្លោនាំគ្នារត់បាតជើងសព្រាតប៉ុណ្ណោះទេ ប៉ុន្តែក៏ធ្វើឲ្យពួកគេគ្រប់គ្នាឆ្ងល់ជាខ្លាំងផងដែរ ហេតុអ្វីមានកម្លាំងអាវុធហត្ថចុះចាប់…? ក្រែងម្ចាស់សង្វៀនបានដើរសែនត្រូវអស់ហើយតើ…?
ចំណែកអ្នកខ្លះបានអះអាងថា បើសែនត្រូវហើយ គេមិនដែលចុះចាប់ទេ មកពីមិនសែននាំគ្នាលេងលោតឆត្រ… ថ្ងៃក្រោយបើមិនរាងទេ សុំកុំរាង !
ចែករំលែកព័តមាននេះ