រាជធានីភ្នំពេញ៖ សមាគមភាពយន្តកម្ពុជាជ្រើសរើសបានប្រធាន និងអនុប្រធានថ្មីហើយ បន្ទាប់ពីប្រធានសមាគមចាស់លោកឆាយ បូរ៉ា បានប្រកាសលាឈប់ ។ សមាគមភាពយន្តកម្ពុជាបានប្រកាសពីសមាសភាពប្រធាន និងអនុប្រធានថ្មីដែលបានជ្រើសរើសក្នុងសន្និបាតវិសាមញ្ញថ្ងៃទី១២ ខែធ្នូ…
រាជធានីភ្នំពេញ៖ សមាគមភាពយន្តកម្ពុជាជ្រើសរើសបានប្រធាន និងអនុប្រធានថ្មីហើយ បន្ទាប់ពីប្រធានសមាគមចាស់លោកឆាយ បូរ៉ា បានប្រកាសលាឈប់ ។ សមាគមភាពយន្តកម្ពុជាបានប្រកាសពីសមាសភាពប្រធាន និងអនុប្រធានថ្មីដែលបានជ្រើសរើសក្នុងសន្និបាតវិសាមញ្ញថ្ងៃទី១២ ខែធ្នូ ឆ្នាំ ២០១៨ ។
យោងតាមការប្រកាសពីហ្វេសប៊ុកសមាគមភាពយន្តកម្ពុជាឲ្យដឹងថា សមាគមភាពយន្តកម្ពុជាបានរៀបចំការបោះឆ្នោតជ្រើសរើសប្រធាន និងអនុប្រធានថ្មី ក្រោមវត្តមានលោកសិុន ចាន់សាយ៉ា ទីប្រឹក្សាក្រសួងវប្បធម៌ និងវិចិត្រសិល្បៈ ដែលជាប្រធានក្រុមប្រឹក្សាភិបាលរបស់សមាគមភាពយន្តកម្ពុជា ព្រមទាំងសមាជិកដែលជាម្ចាស់ផលិតកម្ម ទូរទស្សន៍អនឡាញចំនួន១៨នាក់នៃសមាជិកសរុបដល់ទៅ២៧នាក់ ។
ដោយសារពេលកន្លងទៅ ថ្មីៗនេះ លោក ឆាយ បូរ៉ា បានប្រកាសលាលែងចេញពីតំណែងជាប្រធានសមាគមភាពយន្តកម្ពុជាដោយមូលហេតុសុខភាព និងកិច្ចការផ្ទាល់ខ្លួន ដូច្នេះហើយសមាគមភាពយន្តក៏ជ្រើសរើសប្រធានថ្មី ។
បេក្ខភាពឈរឈ្មោះបោះឆ្នោតមានចំនួន ៥ នាក់ពីស្ថាប័នទាក់ទងនឹងវិស័យភាពយន្ត៖ ១.លោក ជុំ សុភា ម្ចាស់ផលិតកម្មរាហ៊ូ ។ ២.លោកលៀក លីដា ម្ចាស់ផលិតកម្ម LD Pictures ។ ៣.លោកអិុន សុភិន ម្ចាស់ផលិតកម្មមហាហង្ស ។ ៤. លោកហ៊ុយ យ៉ាឡេង ម្ចាស់ផលិតកម្មមាតុចក្រ ។ នង៥.លោកព្រំ សិលា ម្ចាស់ក្រុមហ៊ុនចែកចាយភាពយន្តឯករាជ្យ ។
ឆ្លងតាមរបៀបវីរៈ ផ្សេងៗរបស់អង្គប្រជុំ ដែលមានដូចជាការទទួលស្គាល់ការលាលែងពីតំណែងរបស់ប្រធាន និងអគ្គលេខាធិការ និងការរំលាយចោលគណៈកម្មការប្រតិបត្តិចាស់ ព្រមទាំងការប្រកាសសមាភាពថ្មី អង្គប្រជុំបានបោះឆ្នោតដើម្បីជ្រើសរើសប្រធាន និងអនុប្រធានថ្មី ។ ការបោះឆ្នោតធ្វើឡើង២ជុំពោលគឺជុំទី១ដើម្បីជ្រើសរើសប្រធាន ដែលមានបេក្ខភាពតែ៤រូបប៉ុណ្ណោះព្រោះលោក លៀក លីដា ស្ម័គ្រចិត្តឈរឈ្មោះជាអនុប្រធាន ។ ជុំទី២គឺជាការបោះឆ្នោតជ្រើសរើសអនុប្រធាន ។ លទ្ធផលបានទៅលោកព្រំ សិលា ដែលទទួលបានការគាំទ្រសំឡេង១២ លើ១៨សំឡេង ហើយក្នុងជុំទី ២លោកលៀក លីដាបានទទួលដំណែងជាអនុប្រធាន ។
លោកព្រំ សិលាគឺជាអ្នកចែកចាយ និងផ្សព្វផ្សាយភាពយន្តក្នុងស្រុក ដែលរឿងរបស់លោកបានចែកចាយកន្លងមកមានដូចជា រឿងធ្មប់ កំពូលអ្នកថតរូបSelfie វិប្បល្លាស/រចនា បាតដៃខ្មៅ និងរឿងស្នូរជើងអ្នកណា ? ជាដើម។ លោកក៏ធ្លាប់រៀបចំមហោស្រពភាពយន្តខ្លីដូចជាមហោស្រពភាពយន្តខ្លីចតុម្មុខជាដើម។
លោកលៀក លីដា ដែលបានទទួលតំណែងជាអនុប្រធានរបស់សមាគមភាពយន្តគឺជាម្ចាស់ ផលិតកម្ម LD Pictures ដែលផលិតភាពយន្តខ្នាតធំបានច្រើនជាងគេជារៀងរាល់ឆ្នាំ ៕
ចែករំលែកព័តមាននេះ