រាជធានីភ្នំពេញ ៖ វិមានឈ្នះឈ្នះនឹងដាក់បង្ហាញស្នាដៃនៃការតស៊ូកសាងជាតិចាប់ពីចំណុចសូន្យរបស់កម្ពុជា ក្រោមការតស៊ូរបស់សម្តេចតេជោ ហ៊ុន សែន នាយករដ្ឋមន្ត្រី ។
នេះតាមសម្តេចពិជ័យសេនា ទៀ បាញ់ ឧបកនាយករដ្ឋមន្ត្រី និង និងរដ្ឋមន្ត្រីក្រសួងការពារជាតិ ។ សម្តេចពិជ័យបានលើកឡើងក្នុងសន្និសីទសារព័ត៌មាននាព្រឹកថ្ងៃទី១៧ ធ្នូ នៅវិមានឈ្នះឈ្នះថាក្រោមពីដាក់សម្ភោធដំណើរការវិមានឈ្នះឈ្នះយើងនឹងដាក់ស្នាដៃនៃការតស៊ូរបស់សម្តេចតេជោ ហ៊ុន សែន ចាប់ដើមឡើយ តាមរយៈគោលនយោបាយឈ្នះឈ្នះ ។ សម្តេចបានបញ្ជាក់ថា «យើងមានសាក្សីដែលធ្វើដំណើរជាមួយសម្តេចតេជោចាប់ពីថ្ងៃទី២០ មិថុនា ឆ្នាំ១៩៧៧ ក្នុងនោះយើងមាន៥នាក់ ក្នុងនោះ ប៉ុន្តែ២រូបបានពលីកម្មបាត់ហើយ» ។ សម្តេចបានបន្ថែមថា «យើងមានសច្ចភាពពិតតាមដំណាក់ៗរហូតដល់នយោបាយឈ្នះឈ្នះដែលយើងនឹងរំលេចនៅទីនេះ ។
វិមានឈ្នះឈ្នះនេះនឹងប្រមូលអត្ថន័យទាំងអស់នូវសភាពទាំងឡាយដែលជាសច្ចភាពដែលកម្ពុជាយើងមាន ដើម្បីប្រមូលមកទុកតម្កល់នៅទីនេះ» ។ ជាមួយគ្នានោះដែរសម្តេចពិជ័យសេនាក៏បានលើកឡើងថា តម្កល់ភស្តុងតាងនៅវិមានឈ្នះឈ្នះនេះ គឺដើម្បីជៀសវាងការធ្វើបកស្រាយណាមួយសុខពីការពិតដែលបានកើតឡើងផងដែរ ។ ទីនេះ គឺជាតឹកតាំងជាលាក់ពិតប្រាកដទាំងអស់ ទោះបីជាមិនបាន១០០% ក៏វាកៀកនឹង១០០%ដែរ ។ សម្តេចគូសបញ្ជាក់ថា «កន្លែងនេះវាមិនធំប៉ុន្មានទេ ប៉ុន្តែវាធំសម្រាប់អត្ថន័យនៃប្រវត្តិសាស្ត្រធំណាស់ៗ ហើយខ្ញុំចាត់ទុកជាព្រទ្យសម្បត្តិដ៏មហាសាលនៃប្រវត្តិសាស្ត្រសម្រាប់អ្នកជំនាន់ក្រោយៗទៀតក្នុងការសិក្សាដឹងពីរឿងរ៉ាវទាំងឡាយមកដល់ពេលនេះថា មានអ្វីខ្លះ ? វាបានឆ្លង់កាត់មកដល់ពេលនេះ គឺវាវែងឆ្ងាយណាស់» ។
សម្តេចទៀ បាញ់ ក៏បានលើកឡើងថា ការតម្កល់តឹកតាំងនេះមានទាំងសៀវភៅដែលនិយាយពីវិមានឈ្នះឈ្នះក៏មានការឆ្លាក់ខ្លឹមសារមួយចំនួននៅលើកផ្ទាំងថ្មី ដើម្បីកុំឲ្យបាត់ភស្តុតាងនៃគុណតម្លៃនេះ ។ សម្តេចពិជ័យសេនាក៏បានលើកឡើងថា តាមប្រសាសន៍សម្តេចតេជោ ហ៊ុន សែន នាយករដ្ឋមន្ត្រីថា នឹងធ្វើពិធីសម្ភោធវិមានឈ្នះឈ្នះនេះឲ្យមានលក្ខណៈធំរហូតដល់៣ យប់៣ថ្ងៃ ។
ការសម្ភោធវិមានឈ្នះឈ្នះក៏ចំថ្ងៃនៃការបញ្ចប់សង្គ្រាមស៊ីវិលតាមរយៈនយោបាយឈ្នះឈ្នះរបស់រាជរដ្ឋាភិបាល គឺមានរយៈពេល២០ឆ្នាំមកហើយ ។ សម្តេចក៏បានអះអាងថា ពិធី៣យប់ ៣ ថ្ងៃនេះ គឺជាវិធីដ៏ធំមួយ ជាងពិធីណាៗទាំងអស់ ខណៈដែលកម្ពុជាបានធ្វើបុណ្យទន្លេបុណ្យសមុទ្រ បុណ្យុអ៊ុំទូក …។ ក្នុងរយៈពេល៣ថ្ងៃនឹងមានកម្មវិធីចាប់ពីពេលព្រលឹមរហូតដល់ព្រលប់ ប្លែកច្រើនដល់ភ្ញៀវសម្រាប់ទស្សនាផងដែរ ។ សម្តេចក៏បានលើកឡើងពីគុណតម្លៃនៃវិមានឈ្នះឈ្នះក៏ដើម្បីបង្ហាញពីការបញ្ចប់សង្គ្រាមយ៉ាងពេញលេញតាំងពីមុនមកនាំឲ្យជាតិមាតុភូមិមានឯកភាពជាតិដែលចាំណាយពេលរាប់រកឆ្នាំដែលមិនធ្លាប់មាននោះទេ ។
សម្តេចក៏បានលើកឡើងថាបន្ទាប់សម្ភោធដាក់ឲ្យដំណើររួចមកវិមានឈ្នះឈ្នះនឹងបើកឲ្យភ្ញៀវជាតិ និងអន្តរជាតិចូលទស្សនាស្វែងយល់ផងដែរ ។ ជាងនេះវិមានឈ្នះឈ្នះក៏ជាកន្លែងស្តុបទុកឯកសារដែលជាស្នាដៃនៃការតស៊ូរបស់សម្តេចតេជោ ហ៊ុន សែន ចាប់ដំបូងផងដែរ ។ នៅជុំវិញវិមានក៏មានរូបសំណាក់ដែលនិយាយពីប្រវត្តិតស៊ូរហូតដល់ចប់ ។
សូមជម្រាបថាវិមានឈ្នះឈ្នះនឹងសម្ភោធចាប់ពីថ្ងៃទី២៩ ដល់ថ្ងៃទី៣១ ធ្នូ ឆ្នាំ២០១៨ ខាងមុខនេះ ៕
ចែករំលែកព័តមាននេះ