ខេត្តពោធិ៍សាត់ ៖ គ្រោះថ្នាក់ចរាចរណ៍ពីរករណីរបានកើតឡើងក្នុងថ្ងៃតែមួយ គឺថ្ងៃទី១៤ ខែធ្នូ ឆ្នាំ២០១៨ នៅកន្លែងផ្សេងគ្នាបណ្ដាលឲ្យស្លាប់ម្នាក់ និងរងរបួសយ៉ាងធ្ងន់ធ្ងរម្នាក់បានបញ្ជូនទៅសង្គ្រោះនៅមន្ទីរពេទ្យបង្អែកខេត្ត ។
សមត្ថកិច្ចឲ្យដឹងថា គ្រោះថ្នាក់ចរាចរណ៍លើកទីមួយបានកើតឡើងវេលាម៉ោង១៥រសៀលនៅលើផ្លូវកៅស៊ូ ស្ថិតក្នុងភូមិទួលម្កាក់ ឃុំអន្លង់ត្នោត ស្រុកក្រគរ ដែលបង្កឡើងដោយរថយន្ដបុកម៉ូតូបណ្ដាលឲ្យអ្នកបើកម៉ូតូរបួសយ៉ាងធ្ងន់ធ្ងរ ។ រថយន្ដម៉ាកកាមរី ពណ៌កណ្តុរល្មេះ ពាក់ស្លាកលេខភ្នំពេញ 2E-0047 ធ្វើដំណើរពីត្បូងទៅជើងទៅដល់ចំណុចកើតហេតុបានរ៉េចង្កូតទៅបុកម៉ូតូដែលកំពុងធ្វើដំណើរបញ្ច្រាសទិសគ្នាទាំងកម្រោល ដែលម៉ូតូម៉ាកហុងដា ពណ៌ខ្មៅ ពាក់ស្លាកលេខ ពោធិ៍សាត់ បណ្ដាលឲ្យអ្នកបើកម៉ូតូដួលបែកក្បាលហូរឈាមនិងសន្លប់ស្ដូកស្ដឹងនៅលើផ្លូវ ។
ចំណែកអ្នកបើកបររថយន្ដមិនស្គាល់អត្តសញ្ញាណ ក្រោយកើតហេតុទុករថយន្ដចោលនៅទីនោះគេចខ្លួនបាត់ស្រមោល ។ ជនរងគ្រោះឈ្មោះ ហឿន លឿម ភេទប្រុស អាយុ២៨ឆ្នាំ រស់នៅភូមិខ្លាក្រពើ ឃុំអន្លង់ត្នោត ស្រុកក្រគរ ។
ដោយគ្រោះថ្នាក់ចរាចរណ៍លើកទី២ កើតឡើងវេលាម៉ោង២០និង២០នាទីយប់ នៅចម្ងាយពីមណ្ឌលសុខភាពព្រែកត្នោត ប្រហែល២០០ម៉ែត្រ ស្ថិតក្នុងសង្កាត់រលាប ក្រុងពោធិ៍សាត់ ដែលបង្កឡើងដោយម៉ូតូបុកគោយន្ដពីក្រោយ បណ្ដាលឲ្យអ្នកជិះម៉ូតូស្លាប់នៅនឹងកន្លែងកើតហេតុ ។
ម៉ូតូម៉ាកហុងដា ពណ៌ខ្មៅ ស៊េរី២០១៩ បើកក្នុងទិសដៅពីត្បូងទៅជើងក្នុងល្បឿនលឿនទៅដល់កន្លែងកើតហេតុ ត្រង់ចំណុចផ្លូវកោងបានបុកពីក្រោយគោយន្ដ បណ្ដាលឲ្យស្លាប់ភ្លាមៗនៅនឹងកន្លែងកើតហេតុ ។
ចំណែកគោយន្ដឃើញសភាពការបែបនេះបន្ថែមល្បឿនរកកន្លែងលាក់ខ្លួនបាត់ស្រមោល ។ ជនរងគ្រោះដែលស្លាប់ឈ្មោះ ហារី ភេទស្រី អាយុ១៦ឆ្នាំ រស់នៅភូមិស្ដុកជុំ ឃុំកោះជុំ ស្រុកកណ្ដៀង ។ ជនរងគ្រោះសម្រាកព្យាបាលនៅមន្ទីរពេទ្យបង្អែកខេត្ត សាកសពប្រគល់ឲ្យក្រុមគ្រួសារនៃសពយកទៅធ្វើបុណ្យតាមប្រពៃណី ចំណែកម៉ូតូគោយន្ដ និងរថយន្ដដែលបង្កគ្រោះថ្នាក់រក្សាទុកនៅអធិការដ្ឋាននគរបាល ដើម្បីដោះស្រាយតាមច្បាប់ចរាចរណ៍ផ្លូវគោក ៕
ចែករំលែកព័តមាននេះ