រាជធានីភ្នំពេញ៖ រឿងអាស្រូវទាំងឡាយក្នុងពិភពសិល្បៈនៅមិនអាចលៀងជ្រះឡើយរហូតមកដល់ពេលនេះ ក្នុងពេលដែលរឿងអាម៉ាស់ដែលថាមានតារាខ្លះហ៊ានលះបង់ខ្លួនប្រាណដើម្បីប្តូរមកវិញនូវភាពល្បីឈ្មោះ និងភាពហ៊ឺហានៅក្នុងជីវិត ។ ទោះបីជាយ៉ាងណាក្តីមានតារាមួយចំនួនគេចផុតពីរឿងនេះ ដោយពួកគេបានតាំងចិត្តយកភាពថ្លៃថ្នូរជាធំ ។ ការតាំងចិត្តប្រកាន់ភាពថ្នៃថ្នូររបស់អ្នកសិល្បៈ ម្នាក់ៗគឺជាដំណោះស្រាយមួយដ៏សំខាន់…
រាជធានីភ្នំពេញ៖ រឿងអាស្រូវទាំងឡាយក្នុងពិភពសិល្បៈនៅមិនអាចលៀងជ្រះឡើយរហូតមកដល់ពេលនេះ ក្នុងពេលដែលរឿងអាម៉ាស់ដែលថាមានតារាខ្លះហ៊ានលះបង់ខ្លួនប្រាណដើម្បីប្តូរមកវិញនូវភាពល្បីឈ្មោះ និងភាពហ៊ឺហានៅក្នុងជីវិត ។ ទោះបីជាយ៉ាងណាក្តីមានតារាមួយចំនួនគេចផុតពីរឿងនេះ ដោយពួកគេបានតាំងចិត្តយកភាពថ្លៃថ្នូរជាធំ ។
ការតាំងចិត្តប្រកាន់ភាពថ្នៃថ្នូររបស់អ្នកសិល្បៈ ម្នាក់ៗគឺជាដំណោះស្រាយមួយដ៏សំខាន់ សម្រាប់ឲ្យពួកគេអាចគេចផុតពីរឿងអាស្រូវផ្លូវភេទ បើទោះបីជារងការទាក់ទាញពីបុរសមានទ្រព្យ និងអ្នកដឹកនាំសម្តែងក៏ដោយ ។ ការគេចវេះ និងការតាំងចិត្តនេះក៏អាចបង្កជាហានិភ័យផងដែរសម្រាប់តារាទាំងនោះ ក្នុងពេលដែលពួកគេរងសម្ពាធ និងការគម្រាមពីបុរសមានអំណាច និងសម្បូរទ្រព្យខ្លះ (វាមិនទាំងអស់នោះទេ)។
ជាការកត់សម្គាល់ករណីរបស់តារាចម្រៀងកញ្ញាទូច ស៊ុននិច និងកញ្ញាពៅ បញ្ញាពេជ្រ និងតារាមួយចំនួនទៀតត្រូវគេដាក់ការសង្ស័យថា ការលបវាយប្រហារលើពួកនាង គឺអាចជាប់ទាក់ទងការមិនព្រមទទួលយកស្នេហា និងការទទួលយកស្នេហាពីបុរសដែលមានអំណាច និងមានទ្រព្យធនដែលមានប្រពន្ធកូនរួចហើយ។ ករណីនេះបានក្លាយជាប្រធានបទ និងមេរៀនដ៏គួរឲ្យភ័យខ្លាចមួយសម្រាប់តារាផ្សេងទៀតសម្រាប់ទុកជាមេរៀន និងបទពិសោធន៍ ។ ករណីនេះអាចទាញយកនូវហេតុផលមួយដែលធ្វើឲ្យតារាផ្សេងទៀតហាក់មិនហ៊ានប្រកែក ឬក៏មិនទទួលយកស្នេហាពីប្រភេទបុរសបែបនោះឡើយ ព្រោះអាចនឹងមានរឿងកើតឡើងដល់ខ្លួនដែរ តែវាក៏មិនប្រាកដថាបុរសទាំងនោះជាប្រភពគ្រោះថ្នាក់ដែរព្រោះវាគ្មានភស្តុតាងអ្វីទេ ។
រឿងអាស្រូវស្នេហានេះវាអាចនឹងមិនមែនកើតឡើងសម្រាប់តារាគ្រប់រូបឡើយ ពោលមានតារាជាច្រើនបានតាំងចិត្តមិនទទួលយកការដោះដូរខ្លួនដើម្បីភាពហ៊ឺហា និងភាពល្បីឈ្មោះនៅក្នុងពិភពសិល្បៈឡើយ ។ ជាក់ស្តែងកាលពីពេល ថ្មីៗកន្លងមកតារាចម្រៀងកញ្ញាអេនី ហ្សាម ធ្លាប់បង្ហោះសារតាមហ្វេសប៊ុកថា «មិនប្រាកដថាលុយអាចទិញសេចក្តីសុខបានទេ តែបើដូរការសប្បាយបានជឿ មនុស្សមានលុយអាចដូរការសប្បាយបាន អាចទិញមនុស្សស្រីមកកំដរបាន តែមិនអាចទិញចិត្តបេះដូងគេបានទេ បើចង់បានត្រឹមស្រួលយកចុះ ព្រោះអ្នកមានមួយចំនួនអាងខ្លួនមានលុយចង់ទិញស្រីមួយណាក៏បាន ឲ្យតែគេអ្នកចង់បានលុយ មិនខ្វះទេ ព្រោះសម័យនេះbrand brand អ៊ីចឹងមនុស្សត្រូវការលុយខ្លាំងណាស់ បើមិនរកស៊ីអីផងមានតែយកខ្លួនដូរលុយហ្នឹងឯងបានមានលុយ ព្រោះសម័យនេះអ្នកមានបានគេរាប់ ។ អ៊ីចឹង ម្នាក់ៗសុខចិត្តលះបង់ខ្លួន ដើម្បីលុយ យកបានត្រឹមខ្លួនហ្នឹងទៅ ។ ខ្ពើម! ខ្ញុំរស់នៅបែបខ្ញុំតទៅទៀតទៅ ពីមុនរស់យ៉ាងម៉េចឥឡូវក៏រស់បានដែរ»។
ចំណែកតារាចម្រៀងវ័យក្មេងស្រស់ស្អាតកញ្ញារាប៊ី ក៏បានអះអាងប្រាប់សារព័ត៌មាននៅក្នុងស្រុកមួយថា «ទោះមានលុយច្រើនយ៉ាងណា តែមិនស្នេហាតាតាជាដាច់ខាត »។
ដោយឡែកនារីវ័យក្មេងមួយរូបដែលមានគណនេយ្យហ្វេសប៊ុកឈ្មោះ Oun Mey ក៏បានទម្លាយអាថ៌កំបាំងពីអ្នកដឹកនាំសម្តែងមួយរូបបានឆាតសុំនាងគេងជាមួយ ជាថ្នូរនឹងការថតស្ប៉តពាណិជកម្ម និងសម្តែងMV ឲ្យល្បីល្បាញ។ ជាការឆ្លើយតបនាងបានអះអាងទៅវិញថា «ថត sport and Mv ហ្នឹងអត់ខ្វះអ្នកហៅខ្ញុំទៅថតទេ គេហៅខ្ញុំទៅថតដោយអត់អស់ខ្លួនទៀត ខ្ញុំអត់ចង់ល្បីទេ ខ្ញុំធ្វើតែ ធម្មតាៗក៏មានមុខដែរ ។ ជួយឲ្យខ្លួនឯងល្បីសិនទៅ តារាសណ្តែកដីឬទាល់តែបានដេកទើបបានល្បីឈ្មោះបានធ្វើតារា !»។
ជុំវិញរឿងនេះពិធីករទូរទស្សន៍CTN លោក អុឹង រដ្ឋា ហៅទុយ ក៏បានបង្ហោះសារតាមហ្វេសប៊ុករបស់ខ្លួន ដោយទទួលស្គាល់ថា មានពិត ហើយលោកជឿក្នុងសង្គមសិល្បៈ ។ «គួរតែបញ្ឈប់ការដោះដូរបែបនេះពិតជាគួរឲ្យថោកទាបមែន»។
ចំណែកលោកតាន់ គឹនសួរ បានបង្ហោះសារថ្កោលទោសចំពោះរឿងអាស្រូវដែលបានកើតឡើងនេះផងដែរថា«សំបូរពួកអាឆ្កែអស់នេះម្ល៉េះ វាកំពុងតែយកសិល្បៈមកជាន់ឈ្លីហើយ ។ ជួយប្រាប់បន្តិចបានទេថា អានេះវានៅផលិតកម្មណាដែរ រកមុខពួកអស់នេះយូរហើយ»៕
ចែករំលែកព័តមាននេះ