រាជធានីភ្នំពេញ ៖ អតីតប្រធានគណបក្សសង្គ្រោះជាតិលោក សម រង្ស៊ី បានប្រកាសពី ប្រទេសបារាំងថា លោកនឹងវិលចូលមកស្រុកខ្មែរនៅពេលឆាប់ៗនេះ គឺនៅឆ្នាំ២០១៩ ខាងមុខ នេះ ។
ការប្រកាសរបស់អតីតមេបក្សប្រឆាំងនេះ គឺសង្កេតឃើញជាច្រើនលើកមកហើយ ប៉ុន្តែមិនហ៊ានចូលមកនោះទេ ។ យ៉ាងណាក្តីប្រកាសនេះត្រូវស្វាគមន៍ពីគាំទ្រលោក ពិសេសនោះពី សំណាក់គណបក្សកាន់អំណាចតែម្តង ។ ក្នុងវេទិកាសាធារណៈនៅទីក្រុងប៉ារីសប្រទេសបារាំង កាលពីថ្ងៃទី១៥ ធ្នូ លោក សម រង្ស៊ី បានបញ្ជាក់ថា «ខ្ញុំសូមប្រកាសខ្ញុំនឹងវិលមកប្រទេសខ្មែរវិញ ដើម្បីនិយាយប្រាប់ប្រជាពលរដ្ឋថា សម រង្ស៊ី ធ្វើអ្វី? អត់ទេបងប្អូនយើងត្រូវ តែប្រាប់ប្រជាពលរដ្ឋខ្មែរថា ត្រូវតែមានក្បាលម៉ាស៊ីនមួយច្បាស់លាស់ ។ ហើយជាមួយអន្តរជាតិក៏អីញ្ចឹងដែរបើយើងគ្មានក្បាលម៉ាស៊ីនតើយើងនិយាយជាមួយអ្នកណា ?» ។
លោក សម រង្ស៊ី ក៏អះអាងថា រចនាសម្ព័ន្ធថ្មីរបស់គណបក្សសង្គ្រោះជាតិ និងចេញហើយបងប្អូន ។ ខ្ញុំនឹងទៅស្រុកខ្មែរវិញបងប្អូនមិនមែនម្នាក់ឯងទេ ។ តែយើងនៅស្ងៀមយើងត្រូវតែមានក្បាលម៉ាស៊ីន ដើម្បីឲ្យពលរដ្ឋដឹង និងងើបឈរតតាំងជាមួយសម្តេច ហ៊ុន សែន នៅឆ្នាំ ២០១៩ ។
ទាក់ទិននឹងការលើកឡើងរបស់មេបក្សប្រឆាំងនេះ ត្រូវបានអ្នកនាំពាក្យគណបក្សប្រជាជនកម្ពុជាលោក សុខ ឥសាន បានលើកឡើងថា លោកសម រង្ស៊ី មិនហ៊ានមកទេ ប៉ុន្តែបើមក មែន លោកស្វាគមន៍ព្រោះពន្ធនាគារកំពុងរង់ចាំ ។ លោកបន្តថា ក្នុងកិច្ចប្រជុំមួយដែល សម រង្សី ថានៅទីក្រុងប៉ារីស សម រង្សី បានអះអាងជាមួយអ្នកចូលប្រជុំមួយចំនួនតូចថា ខ្លួននឹងចូលមកស្រុកខ្មែរនៅឆ្នាំ២០១៩ខាងមុខនេះ ។
ទន្ទឹមនឹងនេះទណ្ឌិត សម រង្ស៊ី ក៏បានបំផុសញុះញង់ឲ្យប្រជាជនមួយចំនួនដែលគាំទ្រខ្លួនងើបឡើងតស៊ូជាមួយខ្លួនប្រឆាំងនឹងការដឹកនាំបស់រាជរដ្ឋាភិបាលកម្ពុជារបស់សម្តេចតេជោហ៊ុន សែន ។ លោកបញ្ជាក់ថា ប្រជាជនកម្ពុជារង់ចាំមើល តើទណ្ឌិតសម រង្ស៊ី ហ៊ានចូលស្រុកដែរ ឬទេ នៅឆ្នាំ២០១៩នេះព្រោះនៅតែ១ខែទៀតទេនឹងមកដល់ហើយ ។ ការដែល សម រង្សីនិយាយថា នឹងមកចូលស្រុកនេះមានច្រើនដងហើយរាប់មិនអស់ទេ តែគេនៅតែមិនឃើញ ទណ្ឌិតរូបនេះអើតក្បាលចូលមកក្នុងស្រុកសោះ» ។
លោកបន្ថែមថា ការប្រកាសរបស់ទណ្ឌិតសម រង្ស៊ី វាគ្រាន់តែជាការភូតកុហក់ ដើម្បីស្ទង់មើលសភាពការណ៍ និងប្រតិកម្មនានាតែប៉ុណ្ណោះតាមការពិត សម រង្ស៊ី ជាជនកំសាកមិនហ៊ាន ចូលមកទេ ពីព្រោះគុកនៅរង់ចាំស្វាគមន៍ទណ្ឌិតនេះគ្រប់ពេលឲ្យតែឃើញក្បាល គឺគ្រឹបតែម្តង ។
នៅក្នុងវេទិការនោះដែរ លោក សម រង្ស៊ី ក៏បានលើកឡើងទៀតថា សម្តេចតេជោ ហ៊ុន សែនកំពុងសម្លុតអ្នកនយោបាយ១១៨នាក់ ដែលឲ្យមានសិទ្ធិធ្វើនយោបាយវិញ តាមរយៈវិសោធនកម្មច្បាប់ស្តីពីគណបក្សនយោបាយផងដែរ ។ លោកបញ្ជាក់ថា «គួរអស់សំណើចសិទ្ធិធ្វើនយោបាយ គឺជាសិទ្ធិដែលយើងមានស្រាប់ ដែលមានចែងក្នុងរដ្ឋធម្មនុញ្ញ គឺគ្មានអ្នកដកហូតពីយើងនោះទេ បើយើងគ្មានទោស ឬកំហុសអ្វីនោះទេ ។
ចំពោះមន្ត្រីគណបក្សសង្គ្រោះជាតិ១១៨នាក់ គ្មានទោសទេគេចោទតែ កឹម សុខា ថា ក្បត់ជាតិ តែម្នាក់ តែ១១៨នាក់មិនដែលទទួលការចោទប្រកាន់អ្វីសោះស្រាប់តែមកដកសិទ្ធិយើងទទេរ » ។ លោកក៏បានលើកឡើងថា អ្នកដែលចង់បានសិទ្ធិធ្វើនយោបាយវិញ តាមរយៈសំណើរ ទៅរដ្ឋមន្ត្រីក្រសួងមហាផ្ទៃ ឬទៅសម្តេច ហ៊ុន សែន ដើម្បីថ្វាយព្រះមហាក្សត្រនោះ គឺជាមនុស្សឆ្កួតសុទ្ធ ។ លោកថា អ្នកនយោបាយណាដែលស្នើសុំសិទ្ធិធ្វើនយោបាយ ឬចុះគណបក្សសង្គ្រោះជាតិ គឺជាអ្នកក្បត់ជាតិ និងក្បត់បក្ស ៕
ចែករំលែកព័តមាននេះ