ខេត្តស្វាយរៀង ៖ តម្លៃដីធ្លី និងសំណង់អគារនានានៅក្រុងបាវិត កំពុងហក់ឡើងយ៉ាងលឿន ជាពិសេសតំបន់ទីប្រជុំជនក្នុងសង្កាត់បាវិតតែម្ដង ដោយមានជនជាតិចិនបានមកដេកចាំទិញដីសាងសង់អគារខ្ពស់ៗសម្រាប់ធ្វើអាជីវកម្ម ដូចជា ខុនដូ សណ្ឋាគារ ផ្ទះសំណាក់ កាស៊ីណូ ក្លិបកម្សាន្ដ ផ្សារទំនើប និងតូបលក់ដូរជាដើម ។
សព្វថ្ងៃនេះ អាជីវកម្មជនជាតិចិនបានបើកដំណើរការជាបន្ដបន្ទាប់ ដោយលើកស្លាកយីហោជាអក្សរចិនព្រោងព្រាតនៅតាមដងផ្លូវតូចធំគួរឲ្យភ្ញាក់ផ្អើលជាប្រវត្តិសាស្ត្រ មិនធ្លាប់មានសម្រាប់ទឹកដីខេត្តស្វាយរៀង។ មិនត្រឹមតែប៉ុណ្ណោះ ក៏មានភ្ញៀវទេសចរជាតិ និងអន្តរជាតិកំពុងធ្វើដំណើរយ៉ាងមមាញឹកចេញចូលមិនដាច់នៅច្រកទ្វារព្រំដែនអន្តរជាតិបាវិត ដែលធ្វើសកម្មភាពសេដ្ឋកិច្ចរីកចម្រើនគួរឲ្យកត់សម្គាល់ដែរ ។
អ្វីដែលមហាជនចាប់អារម្មណ៍ និងមានការភ្ញាក់ផ្អើលនោះគឺស្លាកយីហោអាជីវកម្ម និងប៉ានណូកាត់ផ្លូវខ្វាត់ខ្វែងជាអក្សរខ្មែរ និងចិន ធំៗដាក់ឈ្មោះថា « ទីក្រុងហេងហេង » ហើយកាន់តែពិសេសទៀតនោះ ពីមុនភូមិសាស្ត្រខេត្តនេះធ្លាប់តែចាយលុយដុងវៀតណាម លុយរៀល និងលុយដុល្លារអាមេរិក តែឥឡូវក៏មានចរាចរលុយយន់ចិនព្រោងព្រាតពេញហាងចិននៅតំបន់នោះដែរ ។
មន្ត្រីអាជ្ញាធរក្រុងបាវិត បាននិយាយថា ក្រុងបាវិតសព្វថ្ងៃមានការអភិវឌ្ឍខ្លាំង ខុសពីមុនដូចមេឃនិងដី ពិសេសបន្ទាប់ពីជនជាតិចិនចូលមកបណ្ដាក់ទុនវិនិយោគធ្វើឲ្យសេដ្ឋកិច្ចក្នុងខេត្តរីកចម្រើនយ៉ាងលឿនគួរឲ្យកត់សម្គាល់ ។
ជាក់ស្ដែង លោកថា ៖« ពីមុន ក្រុងបាវិត គេចាយលុយដុងវៀតណាមច្រើន បន្ទាប់មកលុយរៀល និងលុយដុល្លារ ដោយសារទំនិញភាគច្រើននាំចូលពីវៀតណាម និងមានជនជាតិវៀតណាមចូលមកលេងកាស៊ីណូច្រើន គេទើបលំហូររូបិយប័ណ្ណប្រទេសគេនៅតំបន់នេះក៏ច្រើនដែរ តែបន្ទាប់ពីវិនិយោគិនចិនចូលមកវាយលុកខ្លាំង គេឃើញមានការចរាចរលុយយន់ចិនមានកំណើនខ្ពស់ ពិសេសនៅតាមហាងលក់ទំនិញចិនតែម្ដង »។
លោកបន្ថែមថា ៖« ការចរាចរលុយយន់ចិននេះ ភាគច្រើនតែនៅតាមហាង និងអាជីវកម្មរបស់ជនជាតិចិនទេ ព្រោះផ្សារចិនគឺមានតែជនជាតិចិនប៉ុណ្ណោះដែលចូលទិញ ។ ចំណែកយើងបើទោះជាទទួលបានផលចំណេញពីការវិនិយោគទាំងនេះមែន តែក៏បាត់បង់ផលប្រយោជន៍ខ្លះដែរពីការចាយវាយរូបិយប័ណ្ណបរទេសបែបនេះ»។
លោក សេង សិលា អភិបាលក្រុងបាវិត ក៏បានឲ្យដឹងកាលពីព្រឹកថ្ងៃទី៤ ធ្នូ កន្លងមកថា ការរីកចម្រើននៃក្រុងបាវិត ដោយសារតែមានជនជាតិចិនចូលមកច្រើន ។ ជាក់ស្ដែងគម្រោងអភិវឌ្ឍន៍ទីក្រុងរណបហេងហេង ដែលជាគម្រោងរបស់លោកឧកញ៉ា លឹម ហួ លើផ្ទៃដីប្រមាណជិត១០ហិកតា ភាគច្រើនសាងសង់ជួលឲ្យជនជាតិចិន និងវិនិយោគឲ្យក្រុមហ៊ុនចិន។ លោកថា ៖« បើគ្មានចិនចូលមកវិនិយោគ ឬជួលនិងទិញទេ ក៏មិនអាចដំណើរការបានដែរ »។
លោកបញ្ជាក់ថា ៖« ដីនិងអចលនទ្រព្យមានតម្លៃហក់ឡើងខ្ពស់ គឺដោយសារមានចិនមកប្រមូលទិញ ហើយចិនទិញតែក្នុងទីប្រជុំជនក្នុងសង្កាត់បាវិតទេ ជាពិសេសជិតកាស៊ីណូក្បែរព្រំដែន ដូចជា នៅបរិវេនកាស៊ីណូម៉ុកប៉ាយ តម្លៃចាប់ពី១លានដុល្លារទៅ៣លានដុល្លារក្នុង១ហិកតា, ដីជាប់កាស៊ីណូ ឡឺម៉ាកាវ តម្លៃ៤លានដុល្លារក្នុង១ហិកតា »។
លោកបញ្ជាក់បន្ថែមថា ៖« សម្រាប់ដីទំនេរ ឬដីស្រែ ក៏កើនឡើងដែរ បើធៀបនឹងឆ្នាំមុនៗ ក្នុងនោះ បើដីមិនទាន់ចាក់បំពេញ ក្នុង១ម៉ែត្រការ៉េ តម្លៃ១០ទៅ២០ដុល្លារ, ដីក្រវាត់ក្រុងតាមដងផ្លូវវាង ផ្លូវកុងតឺន័រ តម្លៃ៣០ដុល្លារ ក្នុង១ម៉ែត្រការ៉េ, ដីជាប់ផ្លូវតាមបណ្តោយផ្លូវជាតិលេខ១ តម្លៃ៨០ដុល្លារ ក្នុង១ម៉ែត្រការ៉េ និងដីជាប់ថ្នល់ជាតិលេខ១ ក្នុងសង្កាត់បាទី សង្កាត់ច្រកម្ទេស ក្នុង១ម៉ែត្រការ៉េ តម្លៃ២០ដុល្លារ ។
ចំណែកសកម្មភាពអាជីវកម្មពុះដីឡូត៍ក៏កំពុងមានទីផ្សារដែរ គឺចាប់ផ្ដើមស្ទុះឡើង ក្រោយពីបោះឆ្នោតអាណត្តិទី៦នេះរួចមក ពិសេសបន្ទាប់ពីមានជនជាតិចិនចូលមកវិនិយោគនិងស្នាក់នៅរកស៊ីលក់ដូរ និងធ្វើការងារច្រើននៅទីនេះ ។
លោក ស៊ូ ឡាំងស៊ឹង តំណាងក្រុមប្រឹក្សាភិបាលក្រុមហ៊ុនហេង ហ៊ី គ្រប់ ដែលកំពុងអភិវឌ្ឍន៍ទីក្រុងរណបហេងហេង បាននិយាយថា ក្រុមហ៊ុនកំពុងបោះទុន១.៧០០លានដុល្លារ នៅលើផ្ទៃដីប្រមាណ២ពាន់ហិកតា សម្រាប់សាងសង់សណ្ឋាគារ កន្លែងកម្សាន្តនៅខេត្តព្រះសីហនុ និងខេត្តពោធិ៍សាត់ ហើយនៅក្នុងក្រុងបាវិតនេះ ក្រុមហ៊ុនមានផ្ទៃដីកំពុងសាងសង់ចំនួន៧ហិកតា សម្រាប់សាងសង់ សណ្ឋាគារ កាស៊ីណូ អគារការិយាល័យ អាផាតម៉ិន និងផ្សារទំនើប និងក្លិបកម្សាន្ដជាដើម ដើម្បីរួមចំណែកការអភិវឌ្ឍក្នុងក្រុងបាវិត ។
លោកបណ្ឌិត គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឲ្យដឹងកន្លងមកថា មួយរយៈចុងក្រោយនេះ ទីក្រុងបាវិត មានសកម្មភាពអភិវឌ្ឍន៍ច្រើន ដោយសារបច្ចុប្បន្នមានតំបន់សេដ្ឋកិច្ចពិសេសចំនួន៥នៅក្នុងទីក្រុងនេះ ដែលផ្តល់ការងារដល់ប្រជាពលរដ្ឋរាប់សិបម៉ឺននាក់ ពិសេសការចូលទៅវិនិយោគរបស់ជនជាតិចិន កាន់តែច្រើននៅក្នុងទីក្រុងនេះ ដែលធ្វើឲ្យសកម្មភាពពាណិជ្ជកម្មមានភាពរសរវើក ។
លោកបន្តថា ៖« ជាមួយនឹងសកម្មភាពអភិវឌ្ឍន៍ និងកំណើននៃការវិនិយោគបច្ចុប្បន្ន បានធ្វើឲ្យតម្លៃដីធ្លីកើនឡើងទ្វេដង ធៀបនឹងឆ្នាំមុន និងជាអ្វីដែលប្រជាពលរដ្ឋរស់នៅទីក្រុងនេះកំពុងរីករាយនឹងសកម្មភាពអភិវឌ្ឍន៍របស់ក្រុងជាយដែនមួយនេះ »។
បច្ចុប្បន្នជនបរទេសដែលកំពុងស្នាក់នៅរកស៊ី និងវិនិយោគនៅខេត្តស្វាយរៀងមានចំនួនប្រមាណ២ម៉ឺននាក់ ក្នុងនោះមកពីជប៉ុន, កូរ៉េ, វៀតណាម, ហ្វីលីពីន, ឥណ្ឌូណេស៊ី និងចិន ជាដើម ប៉ុន្ដែការគ្រប់គ្រងនៅស្មុគស្មាញនៅឡើយ ។ ទោះបីយ៉ាងនេះក្ដី រដ្ឋបាលក្រុងបាវិតកំពុងមានផែនការជំរឿនជនបរទេសផងដែរដើម្បីងាយស្រួលក្នុងការគ្រប់គ្រង ។
បើតាមលោក សេង សិលា អភិបាលក្រុងបាវិត បានបញ្ជាក់ ៖« អាជ្ញាធរក្រុងបាវិតមានគម្រោងធ្វើរដ្ឋបាលជំរឿនជនបររទេសមកស្នាក់នៅក្នុងក្រុងបាវិតក្នុង១សប្តាហ៍ឬ២សប្តាហ៍ម្តង »។ លោកថា ៖« បើរកឃើញមានការស្នាក់នៅ ប្រកបមុខរបរ និងធ្វើការងារគ្មានបណ្ណ័ឬសៀវភៅការងារទេ នឹងចាត់ការទៅតាមច្បាប់»។
នៅក្នុងគោលនយោបាយអភិវឌ្ឍន៍វិស័យឧស្សាហកម្ម ឆ្នាំ២០១៥-២០២៥ រាជរដ្ឋាភិបាលបានកំណត់ប៉ូលសេដ្ឋកិច្ចសំខាន់៣ គឺក្រុងព្រះសីហនុ ក្រុងបាវិត និងក្រុងប៉ោយប៉ែត ជាតំបន់សេដ្ឋកិច្ចពិសេស និងជាតំបន់ស្នូលសម្រាប់ការសម្រួលពាណិជ្ជកម្ម ការដឹកជញ្ជូន និងការទាក់ទាញការវិនិយោគពីអ្នកវិនិយោគនៅប្រទេសជិតខាង ហើយប្រើប្រាស់ទីក្រុងនេះជាទីតាំងស្តុកទំនិញ និងផ្លាស់ប្តូរពាណិជ្ជកម្ម៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ