រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងថាការធ្វើវិសោធនកម្មច្បាប់ស្តីពីគណបក្សនយោបាយ ដើម្បីដកបម្រាមអ្នកនយោបាយដែលត្រូវតុលាការកំពូលហាមឃាត់ធ្វើនយោបាយ ប៉ុន្តែអាស្រ័យលើបុគ្គលហើយមិនចាប់បង្ខំឡើយ ។ ការលើកឡើងនេះបន្ទាប់ពីក្រុមអ្នកនយោបាយមួយចំនួនរបស់អតីតគណបក្សសង្គ្រោះជាតិបានប្រកាស…
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងថាការធ្វើវិសោធនកម្មច្បាប់ស្តីពីគណបក្សនយោបាយ ដើម្បីដកបម្រាមអ្នកនយោបាយដែលត្រូវតុលាការកំពូលហាមឃាត់ធ្វើនយោបាយ ប៉ុន្តែអាស្រ័យលើបុគ្គលហើយមិនចាប់បង្ខំឡើយ ។
ការលើកឡើងនេះបន្ទាប់ពីក្រុមអ្នកនយោបាយមួយចំនួនរបស់អតីតគណបក្សសង្គ្រោះជាតិបានប្រកាស និងទទួលយក ឬស្នើសុំដើម្បីនីតិសម្បទាក្នុងការមានសិទ្ធិធ្វើនយោបាយនោះទេ ។
លោក សុខ ឥសាន បានធ្វើការពន្យល់នៃគោលបំណង និងសំណូមពរនៃការធ្វើវិសោធនកម្មច្បាប់ស្តីពីគណបក្សនយោបាយថា ជាការបើផ្លូវដល់អ្នកនយោបាយជាប់បម្រាមតុលាការកំពូល ហើយអាស្រ័យលើបុគ្គលម្នាក់ៗ ។ លោក សុខ ឥសាន បានឲ្យដឹងតាមប្រពន្ធតេឡេក្រាមនៅទី១៥ ធ្នូ ថា សេចក្តីថ្លែងការណ៍របស់រាជរដ្ឋាភិបាលកម្ពុជាបានបញ្ជាក់ច្បាស់ហើយថា ដើម្បីដោះស្រាយបណ្តាបញ្ហាដែលកើតមានឡើងនៅកម្ពុជាក្នុងគោលបំណងពង្រឹងលទ្ធិប្រជាធិបតេយ្យនីតិរដ្ឋ និងអនុវត្តនយោបាយបង្រួបបង្រួមជាតិ ។
លោកបញ្ជាក់ថា ផ្អែកលើមូលដ្ឋាននេះដំណើរការធ្វើវិសោធនកម្មច្បាប់នេះត្រូវបានប្រព្រឹត្តទៅស្របតាមនីតិវិធីជាធរមាននៃការធ្វើវិសោធនកម្ម និងស្របតាមគោលការណ៍ដែលមានក្នុងរដ្ឋធម្មនុញ្ញ ។ រាល់ការមានមតិ គឺជាសិទ្ធិបញ្ចេញមតិប៉ុណ្ណោះមិនអាចមករារាំងដល់ដំណើរការធ្វើវិសោធនកម្មច្បាប់បានជាដាច់ខាត» ។ លោកបន្តថា ឥឡូវការធ្វើវិសោធនកម្មនេះត្រូវបានរដ្ឋសភាអនុម័តរួចហើយដោយសម្លេង ១១៥/១១៥ ហើយសេចក្តីស្នើច្បាប់នេះនឹងត្រូវបញ្ជូនទៅព្រឹទ្ធសភាពិនិត្យទៀត និងត្រូវឆ្លងក្រុមប្រឹក្សាធម្មនុញ្ញជាចុងក្រោយមុននឹងដាក់ថ្វាយព្រះមហាក្សត្រឡាយព្រះហស្ថលេខាលើព្រះរាជក្រមប្រកាសឲ្យប្រើប្រាស់ ។
ខណៈដែលសមាជិកក្រុមអ្នកនយោបាយប្រឆាំងមួយចំនួនដែលមាននិន្នាការតាមលោក សម រង្ស៊ី បានប្រកាសមិនទទួលយក ឬស្នើសុំ ដើម្បីបានសិទ្ធិធ្វើនយោបាយវិញអ្នកនាំពាក្យបក្សកាន់អំណាចបានគូសយ៉ាងដូច្នេះថា« ខ្លឹមសារវិសោធនកម្ម គឺបើកផ្លូវឲ្យអ្នកនយោបាយដែលជាប់បម្រាមធ្វើនយោបាយមាននីតិសម្បទានយោបាយឡើងវិញ ។ តែច្បាប់មិនចាប់បង្ខំសាម៉ីជននោះៗត្រូវតែធ្វើទេ បើក្នុងករណីសាម៉ីខ្លួនមិនចង់បាន» ។
លោកបន្ថែមថា នៅពេលចប់រយៈពេលហាមរបស់តុលាការកំពូលហើយ បើសាម៉ីជនមិនទទួលយកនីតិសម្បទាឡើងវិញទេក៏បាន សាម៉ីជននៅតែកុំធ្វើនយោបាយទៅបានហើយមានអ្នកណាចាប់បង្ខំ ? លោកបន្ថែមទៀតថា នៅពេលច្បាប់ចូលជាធរមាន បើសាម៉ីជនណាមិនចង់បានសិទ្ធិធ្វើនយោបាយឡើងវិញទេកុំដាក់សំណើរទៅនាយករដ្ឋមន្ត្រី ឬទៅក្រសួងមហាផ្ទៃទៅជាការស្រេច ឬបើមានបញ្ជីពីក្រសួងមហាផ្ទៃកុំតែអនុវត្តទៅមានអ្នកណាថា អីវាអាស្រ័យលើសាម៉ីជនម្នាក់ៗទេកុំបាច់ជជែកវែកញែកវែងឆ្ងាយធ្វើអី ? ដូច្នេះការធ្វើវិសោធនកម្មច្បាប់ស្តីពីគណបក្សនយោបាយ ដើម្បីផ្តល់នីតិសម្បទានយោបាយឲ្យអ្នកនយោបាយដែលជាប់បម្រាមរបស់តុលាការកំពូលមានសិទ្ធិធ្វើនយោបាយឡើងវិញ បើសាម៉ីខ្លួនចង់បាន។
លោកសង្កត់ធ្ងន់ថា« ច្បាប់បើកផ្លូវជូនហើយ តែបើសាម៉ីជនមិនចង់បានទេ ចេះតែនៅតទៅទៀត ទៅមានអ្នកណាថាអី ? អាស្រ័យលើសិទ្ធិរបស់ម្នាក់ៗប៉ុណ្ណោះ ហើយកុំបន្ទោសអ្នកដទៃទៀត» ។ លោកថា សូមបញ្ជាក់ថា មិនមានច្បាប់កំណត់ឲ្យធ្វើវិសោធនកម្មច្បាប់ប៉ុន្មានដងៗទេ វាអាស្រ័យលើសំណូមពរចាំបាច់នៃសភាពការណ៍នយោបាយដែលត្រូវធ្វើ សូមលោកអ្នកច្បាប់ជ្រាប៕
ចែករំលែកព័តមាននេះ