រាជធានីភ្នំពេញ ៖ ទោះបីជាមានសេចក្តីស្នើវិសោធនកម្មច្បាប់ស្តីពីគណបក្សនយោបាយបានបើកផ្លូវឲ្យអ្នកនយោបាយដែលត្រូវតុលាការកំពូលហាមឃាត់ធ្វើនយោបាយ៥ឆ្នាំយ៉ាងណាក្តី ក្រុមអ្នកនយោបាយដែលមាននិន្នាការគាំទ្រលោក សម រង្ស៊ី ប្រកាសមិនទទួលយកនោះទេ ។
ការលើកឡើងរបស់ក្រុមអ្នកនយោបាយប្រឆាំងលើកឡើងបន្ទាប់ពីរដ្ឋសភាបានអនុម័តដោយសេចក្តីស្នើវិសោធនកម្មច្បាប់ស្តីពីគណបក្សនយោបាយ កាលពីថ្ងៃទី១៣ ខែធ្នូ កន្លងមកនេះដោយសម្លេង១១៥ នៃចំនួនសមាជិកសភាទាំងមូល ។
លោក អ៊ូ ច័ន្ទរិទ្ធ អតីតមន្ត្រីជាន់ខ្ពស់គណបក្សសង្គ្រោះជាតិប្រកាសថា លោកមិនទទួលយកការផ្តល់និតីសម្បទាក្នុងការធ្វើនយោបាយឡើងវិញនោះទេ។លោកបានបញ្ជាក់លើបណ្តាញសង្គម នៅថ្ងៃទី១៤ ធ្នូ យ៉ាងដូច្នេះថា «ក្នុងចំណោម១១៨នាក់មានតែអ្នកទទួលស្គាល់ សាលដីកាតុលាការទេ ដែលអាចទទួលសិទ្ធធ្វើនយោបាយឡើងវិញ ។ ដូច្នេះបុគ្គលណាស្នើសុំការដកបម្រាមនយោបាយនេះស្មើនឹង ។ ១- មិនត្រូវការគណបក្សសង្គ្រោះជាតិ ដំណើរឡើងវិញ ២-មិនត្រូវការ បោះបង់មន្ត្រីមូលដ្ឋានជាប់ឆ្នោតទាំង៥០០៧នាក់ ៣- មិនត្រូវការការបោះឆ្នោតឡើងវិញ» ។
ជាមួយគ្នានោះដែរ លោក អ៊ូ ច័ន្ទរិទ្ធ ក៏បានលើកឡើងថា អ្នកដែលទទួលយក ឬស្នើសុំផ្តល់នីតិសម្បទាធ្វើនយោបាយឡើងវិញ គឺជាអ្នកដែដាក់បន្ទុកបន្ថែមលើកកឹម សុខា ដែលកំពុងស្ថិតក្រោមការគ្រង់គ្រងរបស់តុលាការ ។ លោកថា«មិនតែប៉ុណ្ណេះថែមទាំងដាក់បន្ទុកកាន់តែធ្ងន់ធ្ងរថែមទៀតទៅលើលោកប្រធាន កឹម សុខា ដោយទទួលស្គាល់ការចាប់ និងឃុំខ្លួនតាមការចោទប្រកាន់ពីទោសក្បត់ជាតិ» ។ ក្នុងចំណោមអ្នកត្រូវបានតុលាការហាមឃាត់ធ្វើនយោបាយចំនួន១១៨នាក់ផងដែរ លោកគឹម ស៊ូភិរិទ្ធ បានបញ្ជាក់ថា« មិនខុស គឺមិនសុំ «អត់សិទ្ធធ្វើនយោបាយ មិនសំខាន់ទេសម្រប់ខ្ញុំរឿងដែលធំ គឺខ្ញុំខ្លាចបាត់ជាតិខានធ្វើនយោបាយ»។
ចំណែកលោក មុត ចន្ថា មនុស្សជំនិតលោក កឹម សុខា បានលើកឡើងថា សិទ្ធិនយោបាយ និងជម្រើសនយោបាយ គឺជាសិទ្ធិបុគ្គល និងជាការសម្រេចរបស់បុគ្គលដែលត្រូវបានធានាដោយរដ្ឋធម្មនុញ្ញ និងកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយឆ្នាំ១៩៦៦ ដែលកម្ពុជាបានផ្តល់សច្ចាប័ននៅឆ្នាំ១៩៩២ ។ លោកបញ្ជាក់ថា «ខ្ញុំពុំមានអ្វីត្រូវនិយាយ ឬប្រឆាំងចំពោះសិទ្ធិនេះ និងការសម្រេចរបស់បុគ្គលដែលសិទ្ធិស្វ័យសម្រេច» ។
សូមជម្រាបថា ការលើកឡើងខាងលើនេះ បន្ទាប់ពីលោក គង់ គាំ អតីតឧត្តមក្រុមប្រឹក្សាគណបក្សសង្គ្រោះជាតិ និងជាមនុស្សជំនិតលោក សម រង្ស៊ី បានអះអាងថា លោកនឹងស្នើសុំធ្វើន យោបាយវិញ នៅពេលសេចក្តីស្នើច្បាប់ស្តីពីគណបក្សនយោបាយចូលជាស្ថាពរ ។ លោកសម រង្ស៊ី អតីតប្រធានគណបក្សសង្គ្រោះជាតិបានប្រកាសមិនឲ្យអ្នកនយោបាយរបស់អតីតបក្សគណបក្សសង្គ្រោះជាតិដែលត្រូវបានតុលាការកំពូលហាមឃាត់ទទួលយកនីតិសម្បទាក្នុងការធ្វើនយោបាយឡើងវិញនោះទេ ។
គួរឮកផងដែរ សម្តេចតេជោ ហ៊ុន សែន កាលពីពេលថ្មីនេះធ្លាប់ប្រសាសន៍ថា ការធ្វើវិសោធនកម្មច្បាប់ស្តីពីគណបក្សនយោបាយមិនមែនសំដៅលើគណបក្សនយោបាយណាមួយ ឬក្រុមអ្នកនយោបាយណាមួយនោះទេ ។ សម្តេចថា អ្នកដែលត្រូវបានតុលាការកំពូលហាមឃាត់ធ្វើនយោបាយ (១១៨នាក់ CNRP) អាចស្នើសុំដោយបុគ្គលផ្ទាល់ខ្លួនបាន ។ សម្តេចបានបញ្ជាក់ថា «ត្រូវចាំអ្នកដែលប្រឆាំងនឹងសាលដីការតុលាការកំពូលមិនមែនត្រឹមតែអត់មានសិទ្ធិធ្វើនយោបាយនោះទេ ត្រូវជាប់គុកថែមទៀតផង ។ ព្រោះថា កាលណាសាលដីកាតុលាការកំពូលដូចជា អាចជាប់គុក២ឆ្នាំកន្លះ ។
អីញ្ចឹងទេនៅពេលច្បាប់ចូលរួមធរមានខ្ញុំត្រៀមទទួលយកសំណើររបស់សាម៉ីជនម្នាក់ៗមិនមែនតំណាងឲ្យបក្សនយោបាយណាមួយមកស្នើទេ ។ គឺបុគ្គលម្នាក់ គឺត្រូវស្នើមកនាយករដ្ឋមន្ត្រី ឬស្នើទៅរដ្ឋមន្ត្រីក្រសួងមហាផ្ទៃស្នើនាយករដ្ឋមន្ត្រីហើយនាយករដ្ឋមន្ត្រីស្នើថ្វាយព្រះមហាក្សត្រ ។ ដូច្នេះរដ្ឋមន្ត្រីក្រសួងមហាផ្ទៃត្រូវយល់ដឹងមិនមែនចេញច្បាប់ហើយរួចទាំងអស់ទេ គឺម្នាក់ម្តងៗ ។ ម្នាក់មានព្រះរាជក្រឹត្យមួយ ឬ៤ ឬ៥ នាក់សុំមកមានព្រះរាជ្យក្រឹត្យមួយ» ៕
ចែករំលែកព័តមាននេះ