ខេត្តមណ្ឌលគិរី ៖ មន្ទីររៀបចំដែនដីនគររូបនីយកម្មសំណង់ និងសុរិយោដីខេត្តបានរៀបចំពិធីបិទផ្សាយ ជាសាធារណៈនូវឯកសារនៃការវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធដល់ម្ចាស់ក្បាលដីសរុបចំនួន ២៣៥គ្រួសារ ដែលបានប្រព្រឹត្តទៅនៅសាលាសង្កាត់ ស្ពានមានជ័យ ក្រុងសែនមនោរម្យនៅព្រឹកថ្ងៃទី១២ ខែ ធ្នូ ឆ្នាំ២០១៨ ។
លោកម៉ៅ ចំរើន ប្រធានមន្ទីររៀបចំដែនដីនគរូបនីយកម្មសំណង់ និងសុរិយោដីខេត្តបានឲ្យដឹងថា ការបិទផ្សាយជាសាធារណៈនូវឯកសារនៃការវិនិច្ឆ័យក្នុងចុះបញ្ជីដីធ្លីមានក្បាលដីសរុបចំនួន២៨៩ក្បាលដី ដែលមានទំហំផ្ទៃដីសរុបស្មើនឹង១៣៦ហិកតាស្មើនឹង២៣៥គ្រួសារក្នុងនោះមានដីលំនៅឋានចំនួន ២៦៨ក្បាលដី ដីរដ្ឋមានចំនួន០២ក្បាលដី និងគ្មានទិន្នន័យចំនួន១៩ក្បាលដី លោកបានបន្តថា ការបិទផ្សាយជាសាធារណៈនូវឯកសារនៃការវិនិច្ឆ័យក្នុងចុះបញ្ជីដីធ្លីនេះមានរយៈពេល១៥ថ្ងៃ គឺចាប់ពីថ្ងៃទី១២ ខែធ្នូ រហូតដល់ថ្ងៃទី២៦ ខែធ្នូ ឆ្នាំ២០១៨នេះ ដើម្បីទុកអោយម្ចាស់ក្បាល ដីទាំងអស់មកពិនិត្យ ទិន្នន័យក្បាលដីរបស់ខ្លួនពិតជាត្រឹមត្រូវ ឬអត់ដូចជា មានកំហុសឆ្គងឈ្មោះ ថ្ងៃខែឆ្នាំកំណើត អាយុ ភេទ ទំហំ រូបរាងដី ទីតាំងក្បាលដី និងប្រភេទព្រទ្យជាដើម ។
លោក ស្វាយ សំអាង អភិបាលខេត្តបានមានប្រសាសន៍ថា ការចុះបញ្ជីដីធ្លីនេះ ពិតជាសារៈសំខាន់ សម្រាប់ប្រជាពលរដ្ឋដែលជាម្ចាស់ដីទាំងអស់ ជាពិសេសអាជ្ញាធរកាន់កាប់ដីរដ្ឋក្នុងការចូលរួមគ្រប់ជំហ៊ាន តាំងពីការវាស់វែងទីតាំងតំបន់ដែលពាក់ព័ន្ធការវាស់វែងក្បាលដី និងការស្រង់ទិន្នន័យម្ចាស់ដីរហូតដល់ការបិទផ្សាយនូវក្បាលដីទាំងអស់នោះសម្រាប់ទុកអោយម្ចាស់ដីធ្វើការផ្ទៀងផ្ទាត់សុំកែតម្រូវទិន្នន័យ បន្ទាប់មកនឹងផ្តល់ប័ណ្ណកម្មសិទ្ធិស្របច្បាប់ជូនប្រជាពលរដ្ឋ ។
អភិបាលខេត្តបានបញ្ជាក់ថា ចំពោះដីនៅក្នុងបរិវេណអតីតផ្សារសែនមនោរម្យ ដែលត្រូវភ្លើងឆេះកន្លង ទៅនេះ បច្ចុប្បន្នបាន និងកំពុងសាងសង់ផ្ទះ ឬហៅថា ភូមិផ្សារ ឬបុរីផ្សារនោះ សាងសង់ បាន៦០ភាគរយ រួចហើយដែលរាជរដ្ឋាភិបាលបានសម្រេចចេញប័ណ្ណកម្មសិទ្ធិស្របច្បាប់ជូនប្រជាពលរដ្ឋ និងអាជីវករ ក្នុងផ្សារនេះផងដែរ ។
ទន្ទឹមនឹងនោះអភិបាលខេត្តបានជម្រុញដល់អាជ្ញាធរពាក់ព័ន្ធត្រូវពន្លឿនការសាងសង់ប្រព័ន្ធលូផ្លូវភ្លើង និងត្រូវដោះស្រាយនូវបញ្ហាផលប៉ះពាល់អោយបានឆាប់រហ័ស និងសំណូមពរដល់ប្រជាលរដ្ឋទាំងអស់ ត្រូវចូលរួមសហការជាមួយអាជ្ញាធរពាក់ព័ន្ធ ដើម្បីអោយដំណើរការសាងសង់សំណង់ផ្សារនេះឲ្យមានភាពរលូត ៕
ចែករំលែកព័តមាននេះ