ខេត្តបន្ទាយមានជ័យ ៖ ការរកស៊ីបន្លំឬបំភ័ន្តបែបទុច្ចរិត ត្រូវបានរកឃើញនៅតាមស្ថានីយប្រេងមួយចំនួន ។ សម្រាប់ខេត្តបន្ទាយមានជ័យ ឃើញថាបានលេចមុខមុនគេ សម្រាប់ការលក់ប្រេងឥន្ធនៈលួចបន្លំចំណុះលីត្រ រហូតមានការប្តឹងទៅតុលាការតែម្តង ។
មន្ត្រីកាំកុងត្រូលបានឱ្យដឹងថា លើកទី១ មន្ត្រីជំនាញដែលបានទៅពិនិត្យស្ថានីយប្រេងមួយរកឃើញមានការលួចក្នុងចំណុះប្រេងសាំង១០០លីត្រ ស៊ីអស់១០លីត្រ ក៏បានឱ្យធ្វើកិច្ចសន្យា និងណែនាំ ។ លុះត្រួតពិនិត្យលើកទី២ ឃើញស៊ី៨លីត្រក្នុង១០០លីត្រ គឺមិនរាងចាល ទើបចាត់ការតាមច្បាប់ចំពោះម្ចាស់ស្ថានីយ ដោយបញ្ជូនទៅសាលាដំបូងខេត្ត កាលពីថ្ងៃទី៩ ធ្នូ ។
លោក សាន វិជ្ជាសារ៉ាវុធ ប្រធានសាខាកាំកុងត្រូលខេត្ត ដោយមានការណែនាំពីរដ្ឋមន្ត្រីក្រសួងពាណិជ្ជកម្ម និងការដាក់វិធានការពីអគ្គនាយកដ្ឋានកាំកុងត្រូល មន្ត្រីជំនាញបានចុះពិនិត្យស្ថានីយប្រេងក្នុងខេត្ត ដើម្បីពិនិត្យទាំងគុណភាពប្រេងសាំង និងម៉ាស៊ូត និងពិនិត្យចំណុះទៅតាមភាពអនុលោមនៃច្បាប់(លម្អៀងយ៉ាង ច្រើន១លីត្រ ក្នុង១០០លីត្រ ។
លោកបញ្ជាក់ថា កាលពីថ្ងៃទី១៨ ខែសីហា ឆ្នាំ២០១៨ កន្លងទៅ មន្ត្រីសាខាកាំកុងត្រូលខេត្ត បានចុះពិនិត្យស្ថានីយប្រេង ក្នុងទូទាំងខេត្តរកឃើញស្ថានីយប្រេងមួយកន្លែងនៅក្បែព្រំដែន ដែលមានម្ចាស់ឈ្មោះ ឃាង សឿន ភេទប្រុស អាយុ៤៨ឆ្នាំ រស់នៅភូមិអូរបីជាន់ ឃុំអូរបីជាន់ ស្រុកអូរជ្រៅ ។ ការចុះពិនិត្យលើកទី១ រកឃើញថា ចំណុះប្រេងសាំង១០០លីត្រ បាត់អស់១០លីត្រ ហើយមន្ត្រីជំនាញបានណែនាំឲ្យធ្វើកិច្ចសន្យាបញ្ឈប់ការលួចបន្លំអតិថិជនតទៅទៀត ។
លោកបញ្ជាក់ថា លុះនៅថ្ងៃទី៥ ខែធ្នូ ឆ្នាំ២០១៨ មន្ត្រីសាខាកាំកុងត្រូលខេត្តបានចុះពិនិត្យជាលើកទី២ លុះធ្វើរង្វាស់រង្វាល់រកឃើញថា ក្នុងចំណុះប្រេងសាំង១០០លីត្របាត់អស់៨លីត្រ។ ដូច្នេះ ដោយសារជាការរំលោភកិច្ចសន្យា នៅលើកលើកទី១ហើយ ដល់លើកទី២ទៀត មិនព្រមកែខ្លួន ទើបមន្ត្រីសាខាកាំកុងត្រូលសម្រេចកសាងសំណុំរឿងបញ្ចូនឈ្មោះឃាង សឿន ម្ចាស់ស្ថានីយ បញ្ជូនទៅសាលាដំបូងខេត្ត ដើម្បីអនុវត្តទៅតាមច្បាប់ ។
លោក សាន វិជ្ជាសារ៉ាវុធ ក៏បានអំពាវនាវដល់ម្ចាស់ស្ថានីយប្រេងឯទៀតៗ ត្រូវកែតម្រូវទៅតាមភាពអនុលោមនៃច្បាប់(លម្អៀងយ៉ាងច្រើនបំផុត១លីត្រ ក្នុងចំណុះ១០០លីត្រ) ។ បើសិនជារកឃើញស្ថានីយឬដេប៉ូណាដែលអតិថិជនចាក់សាំងបាត់ចំណុះលីត្រ សូមរាយការណ៍មកមន្ត្រីសាខាកាំកុងត្រូលខេត្ត ដើម្បីមានវិធានការតាមច្បាប់ ៕
ចែករំលែកព័តមាននេះ