យោងតាមប្រធានប្រចាំប្រទេសចិន លោក Kwon Kye-hyun របស់ Samsung បានឲ្យដឹងថា Samsung មានគោលដៅត្រលប់ទៅកាន់ប្រទេសចិនវិញ ខណៈដែលពួកគេចេញលក់ទូរស័ព្ទតម្លៃមធ្យមដែលមានបំពាក់ដោយបច្ចេកវិទ្យាទំនើបជាងគេរបស់ក្រុមហ៊ុន ។
លោកបាននិយាយកាលពីថ្ងៃចន្ទថា ៖« ខ្ញុំចង់ប្រាប់អ្នកថា Samsung China បានត្រលប់មកវិញហើយ ។ ដោយមានការចេញលក់ផលិតផលនៅថ្ងៃនេះ ពួកយើងអាចប្រកួតប្រជែងជាមួយនឹងយីហោផ្សេងបាន »។ លោក Kwon បាននិយាយដូច្នេះនៅកម្មវិធីសម្ពោធផលិតផល Samsung Galaxy A8s ។
Samsung មិនប្រកាសពីតម្លៃវាទេ ប៉ុន្តែក្រុមហ៊ុននេះប្រកាសពីការផ្លាស់ប្តូរយុទ្ធសាស្ត្រទៅកាន់ការចេញលក់ទូរស័ព្ទតម្លៃមធ្យមដែលមានបំពាក់ដោយការបង្កើតថ្មី និងបច្ចេកវិទ្យាទំនើបៗជាងគេ ។
ក្រុមហ៊ុននេះក៏នឹងផ្លាស់ប្តូរយុទ្ធសាស្ត្រទីផ្សាររបស់ខ្លួនក្នុងប្រទេសចិនដែរ ដោយផ្តោតសំខាន់ជាងមុនលើការប្រើប្រាស់តារាដើម្បីផ្សព្វផ្សាយពីផលិតផលរបស់ខ្លួន រួមជាមួយនឹងសហការជាមួយយីហោផ្សេងៗជាដើម ។
បើទោះជា Samsung គឺជាអ្នកនាំមុខក្នុងចំណោមក្រុមហ៊ុនលក់ស្មាតហ្វូនដទៃពិតមែនក្តី ការគ្រប់គ្រងទីផ្សារចិនរបស់Samsung បានធ្លាក់ចុះពី១%មកស្មើប្រមាណ០,៨%ប៉ុណ្ណោះកាលពីត្រីមាសទី២នាឆ្នាំនេះ ។
ការអន់ថយនេះមួយផ្នែកគឺមកពីការងើបឡើងនៃយីហោស្មាតហ្វូនចិនដែលមានផលិតផលតម្លៃសមរម្យ ។ ការផ្ទុះទូរស័ព្ទ Galaxy Note 7 កាលពីឆ្នាំ២០១៦ ក៏បានបង្កឲ្យមានការរិះគន់យ៉ាងខ្លាំងក្នុងប្រទេសចិនដែរ ព្រោះ Samsung មិនព្រមប្តូរទូរស័ព្ទដែលប៉ះពាល់ជូនអតិថិជនចិន ដោយអះអាងថា ទូរស័ព្ទទាំងនោះមានបំពាក់ដោយថ្មដែលមានសុវត្ថិភាពបើទោះជាមានហេតុការណ៍ផ្ទុះជាច្រើនករណីកើតមានឡើងពិតមែនក្តី ៕
ចែករំលែកព័តមាននេះ