ខេត្តបន្ទាយមានជ័យ ៖ អគ្គីភ័យបានឆាបឆេះផ្ទះអ្នកគ្រូពេទ្យម្នាក់ក្លាយជាផេះផង់ទាំងព្រឹកកាលពីថ្ងៃទី១២ ធ្នូ២០១៨ ក្នុងភូមិនិមិត្ត៣ សង្កាត់និមិត្ត ក្រុងប៉ោយប៉ែត។
ផ្ទះដែលត្រូវអគ្គិភ័យឆាបឆេះខាងលើមានទំហំ៩ម៉ែត្រគុណនឹង១២ម៉ែត្រ ជញ្ជាំងឈើ ប្រក់ស័ង្កសី ក្រាលការ៉ូ (ជាប្រភេទផ្ទះតៀម) ។
ផ្ទះកើតហេតុជារបស់អ្នកគ្រូពេទ្យម្នាក់ឈ្មោះឯម សារឿន អាយុ៤៨ឆ្នាំ បំរើការងារនៅមណ្ឌលសុខភាព ក្នុងឃុំកូប ស្រុកអូរជ្រៅ ខេត្តបន្ទាយមានជ័យ។
លោកវរសេនីយ៍ទោសេស វិបុល អធិការនគរបាលស្រុកអូរជ្រៅប្រាប់ថា ករណីឆាបឆេះខាងលើបណ្តាលមកពីទុស្សេខ្សែភ្លើងទូទឹកកកនៅក្នុងផ្ទះ ប៉ុន្តែសំណាងល្អ កូនតូចៗប្រុសស្រីទាំង៣នាក់របស់អ្នកគ្រូពេទ្យដែលស្ថិតនៅក្នុងផ្ទះកើតហេតុនោះពុំមាននរណាម្នាក់រងគ្រោះថ្នាក់ឡើយ។
លោកអធិការបន្តថា ក្រោយពីទទួលបានព័ត៌មានខាងលើភ្លាម កម្លាំងនគរបាលក្រុងប៉ោយប៉ែត និងស្រុកអូរជ្រៅ, អាជ្ញាធរនិងប្រជាការពារភូមិបានសហការគ្នាជួយពន្លត់ មានទាំងរថយន្តពន្លត់អគ្គីភ័យចំនួន២គ្រឿងដែរ ប៉ុន្តែមិនអាចជួយបាន ព្រោះកន្លែងកើតហេតុនៅឆ្ងាយ។
គិតមកដល់ម៉ោងជាង៤រសៀលថ្ងៃដដែល សមត្ថកិច្ចបានឱ្យដឹងថា មិនទាន់ដឹងពីទំហំខូចខាតនៅឡើយ គ្រាន់តែបញ្ជាក់ថា ទ្រព្យសម្បត្តិក្នុងផ្ទះត្រូវភ្លើងឆេះអស់ទាំងស្រុងតែម្តង ព្រោះពេលកើតហេតុ ម្ចាស់ផ្ទះជាប់រវល់បំរើការងារនៅឯមណ្ឌលសុខភាព៕
ចែករំលែកព័តមាននេះ