រាជធានីភ្នំពេញ ៖ ក្រសួងសាធារណការ និងដឹកជញ្ជូន នឹងដាក់ឲ្យដំណើរការកម្មវិធី (App) មួយដែលអនុញ្ញាតឲ្យប្រជាពលរដ្ឋដោនឡូតលើទូរស័ព្ទដៃ សម្រាប់រាយការណ៍ដោយផ្ទាល់ពីស្ថានភាពផ្លូវខូចដូចជា ផ្លូវជង្ហុក ផ្លូវសំបុកមាន់ជាដើម ដើម្បីឲ្យអាជ្ញាធរជួសជុលបានទាន់ពេលវេលា ។
កម្មវិធីថែទាំផ្លូវនេះ ឈ្មោះថា «ROAD CARE mobile app» ដែលនឹងដាក់ឱ្យសាធារណជនដោនឡូតនៅលើ App Store និង Play Store ក្នុងទូរស័ព្ទដៃ ចាប់ពីថ្ងៃទី១៣ ខែធ្នូ ឆ្នាំ២០១៨ នេះ ។
ក្រសួងសាធារណការបានឲ្យដឹងទៀតថា រាល់ព័ត៌មានទាំងអស់អំពីជង្ហុកសំបុកមាន់ និងផ្លូវខូចដែលត្រូវបានរាយការណ៍ដោយប្រជាពលរដ្ឋតាមរយៈការបង្ហោះជារូបថត និងវីដេអូនៅក្នុងកម្មវិធីថែទាំផ្លូវនេះ នឹងត្រូវបានបញ្ជូនទៅកាន់ក្រុមការងារទទួលបន្ទុករបស់ក្រសួង មន្ទីរសាធារណការ និងដឹកជញ្ជូននៅទូទាំង២៥ និងអាជ្ញាធរពាក់ព័ន្ធដើម្បីធ្វើការជួសជុល ។
កម្មវិធីនេះបង្កើតឡើងក្នុងគោលបំណងដើម្បីពង្រឹងគុណភាពផ្លូវ ដែលទាមទារឲ្យមានការជួសជុល និងថែទាំទូទាំងប្រទេស តាមរយៈការរាយការណ៍ពីស្ថានភាពជង្ហុក សំបុកមាន់ និងផ្លូវខូចដោយអ្នកប្រើប្រាស់ និងបង្ហាញពីការតាំងចិត្តរបស់រាជរដ្ឋាភិបាល ក្នុងការកសាង និងថែទាំផ្លូវថ្នល់ឲ្យមានលក្ខណៈកាន់តែល្អប្រសើរសម្រាប់ប្រជាពលរដ្ឋអ្នកប្រើប្រាស់ផ្លូវ ។
កម្មវិធីនេះ នឹងក្លាយជាកិច្ចខិតខំប្រឹងប្រែងរួមគ្នារវាងអាជ្ញាធរពាក់ព័ន្ធក្នុងការជួសជុលថែទាំផ្លូវដែលស្ថិតនៅក្រោមសមត្ថកិច្ចរបស់ក្រសួងសាធារណការ និងដឹកជញ្ជូន និងរដ្ឋបាលថ្នាក់ក្រោមជាតិទាំង២៥ ។
ក្រសួងបញ្ជាក់ថា ៖«កម្មវិធីថែទាំផ្លូវនេះ នឹងគ្របដណ្តប់ទៅលើការជួសជុលថែទាំផ្លូវជាតិទាំង៧៥ខ្សែ គ្រប់ផ្លូវនៅក្នុងរាជធានីភ្នំពេញ និងផ្លូវក្នុងក្រុងរបស់ខេត្តទាំង២៤ ។ កម្មវិធីថែទាំផ្លូវនេះ នឹងចូលរួមចំណែកក្នុងការអភិវឌ្ឍប្រទេសឲ្យកាន់តែរីកចម្រើនដើម្បីកាត់បន្ថយគ្រោះថ្នាក់ចរាចរណ៍ដែលកើតឡើងដោយសារជង្ហុកសំបុកមាន់ និងផ្លូវខូច ព្រមទាំងជួយឲ្យប្រជាពលរដ្ឋធ្វើដំណើរប្រកបដោយសុវត្ថិភាព» ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងកាលពីពេលថ្មីៗនេះថា ការដាក់ឱ្យដំណើរការ Appនេះ ដើម្បីឱ្យបងប្អូនពលរដ្ឋទាំងអស់បានចូលរួមថែរក្សាផ្លូវ ពេលឃើញសំបុកមាន់ អាចថតហើយផ្ញើមកក្រសួង ហើយក្រសួងនឹងផ្ញើព័ត៌មាននេះ ទៅតាមមន្ទីរចុះធ្វើការត្រួតពិនិត្យ ។
លោកទេសរដ្ឋមន្ត្រីបន្ដថា ៖« Appនេះ ពេលបញ្ជូនរូបភាពផ្លូវសំបុកមាន់មកភ្លាម វាចេញជារូបពណ៌ក្រហម យើងដឹងទីតាំងពិតប្រាកដថាតើថតនៅកន្លែងណា ហើយម៉ោងណាគាត់ថតផ្ញើមក។ ពេលបាននូវព័ត៌មាននេះហើយយើងផ្តល់ជូនទៅមន្ទីរឬមន្ត្រីជំនាញរបស់យើងចុះទៅពិនិត្យឬជួសជុលផ្លូវសំបុកមាន់នោះ »។
លោកទេសរដ្ឋមន្ត្រីបន្ថែមថា ៖« រូបថតដែលផ្ញើមកនោះ វានឹងបង្ហាញជាពណ៌បៃតង វិញ នៅពេលយើងជួសជុលចប់សព្វគ្រប់ ។ ដូចនេះពេលបញ្ចេញ Appនេះទៅ អត់មានលាក់លៀមផ្លូវសំបុកមាន់ណា យើងមិនធ្វើនោះទេ ឱ្យតែប្រជាពលរដ្ឋផ្ញើមក យើងនឹងដឹងលឺទាំងអស់គ្នា ហើយខ្ញុំនឹងដាក់រូបថតប្រធានមន្ទីរសាខាទាំង២៥ខេត្តក្រុងនេះឱ្យប្រជាពលរដ្ឋស្គាល់មុខថែមទៀត »។
លោកថា ៖« ខ្ញុំមិនអាចតាមមើលការងារទាំង២៥ខេត្តក្រុងទេ យើងពឹងផ្អែកទៅលើសេនាធិការរបស់យើង គឺមន្ទីរសាធារណការនិងដឹកជញ្ជូនខេត្តក្រុងទាំងអស់ »៕
ចែករំលែកព័តមាននេះ