ខេត្តបន្ទាយមានជ័យ ៖ បុរសម្នាក់ដែលវាយធ្វើបាបកូនប្រុសតូចរបស់ខ្លួនរហូតមានរបួស ព្រោះតែដើរសុំទានមិនបានលុយ បានត្រូវកងរាជអាវុធហត្ថឃាត់ខ្លួនពីបទប្រើហិង្សានិងធ្វើទារុណកម្ម រួចបញ្ជូនទៅសាលាដំបូងខេត្តកាលពីថ្ងៃទី១០ ខែធ្នូ ។ លោកវរសេនីយ៍ត្រី នួន…
ខេត្តបន្ទាយមានជ័យ ៖ បុរសម្នាក់ដែលវាយធ្វើបាបកូនប្រុសតូចរបស់ខ្លួនរហូតមានរបួស ព្រោះតែដើរសុំទានមិនបានលុយ បានត្រូវកងរាជអាវុធហត្ថឃាត់ខ្លួនពីបទប្រើហិង្សានិងធ្វើទារុណកម្ម រួចបញ្ជូនទៅសាលាដំបូងខេត្តកាលពីថ្ងៃទី១០ ខែធ្នូ ។
លោកវរសេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែត បានឱ្យដឹងថា ក្រោយពេលឃើញបណ្តាញសង្គមហ្វេសប៊ុក ផ្សាយពីក្មេងប្រុសម្នាក់មានរបួសឈ្មោះ ធី នុល ហៅប៉ូយ អាយុ៤ឆ្នាំ រស់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ដោយសារការវាយធ្វើបាប កម្លាំងជំនាញក៏បានចុះស្រាវជ្រាវរកឃើញក្មេងប្រុសរងគ្រោះ ។
លុះពេលសាកសួរត្រូវបានប្រាប់ថា របួសនេះបណ្តាលមកពីឪពុកវាយធ្វើបាបស្ទើររាល់ថ្ងៃ នៅពេលទៅដើរសុំទានមិនបានលុយ ។ ក្រៅពីវាយធ្វើបាប ថែមទាំងបង្អត់បាយក៏មានដែរ ទើបអ្នកជិតខាងឃើញសភាពរបួស ក៏ថតបង្ហោះរូបភាពរបួស ហើយកម្លាំងកងរាជអាវុធហត្ថបានឃាត់ខ្លួនឪពុក ដែលវាយធ្វើបាបកូនរបស់ខ្លួននៅថ្ងៃទី៩ ខែធ្នូ ។
លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តថ្លែងថា បុរសជាឪពុកឈ្មោះ ហ៊ុ រ៉ា អាយុ៣៦ឆ្នាំ ក្រោយពេលនាំយកមកសាកសួរបានសារភាពថា ខ្លួនពិតជាធ្វើវាយបាបកូនរបស់ខ្លួន ដោយបង្ខំឱ្យទៅដើរសុំទានមិនបានលុយឱ្យខ្លួនទិញស្រាផឹកនិងជក់គ្រឿងញៀន ។ លោកថ្លែងទៀតថា បុរសជាឪពុករូបនេះ ត្រូវបានឃាត់ខ្លួនកសាងសំណុំរឿងបញ្ជូនទៅសាលាដំបូងខេត្ត ។
ចំណែកក្មេងប្រុសរងគ្រោះ យកទៅឲ្យរស់នៅជាមួយជីដូនបង្កើតឈ្មោះ សោម សារ៉េត អាយុ៦៤ឆ្នាំ នៅភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ។ ជាមួយនេះ លោកបានណែនាំឱ្យនាំយកអំណោយ
ទៅផ្តល់ជូនមាន អង្ករ៥០គីឡូក្រាម ទឹកត្រី១យួរ ទឹកស៊ីអុីវ១យួរ ត្រីខ១០កំប៉ុង អំបិលអុីយ៉ូត១គីឡូក្រាម ស្ករស១គីឡូក្រាម និងប្រាក់១សែនរៀល ៕
ចែករំលែកព័តមាននេះ