ខេត្តឧត្តរមានជ័យ ៖ ដីព្រៃរាប់រយហិកតា ត្រូវបានលោកផ្កាយ២ អ៊ុក គឹមលី ដាក់គ្រឿង ចក្រ៤គ្រឿងធ្វើការឈួសឆាយចាប់តាំងពីចុងខែវិច្ឆិការហូតមកទល់នឹងដើមខែធ្នូនេះ ស្ថិតនៅក្នុងភូមិសាមគ្គី ឃុំត្រពាំងប្រីយ៍ ស្រុកអន្លង់វែង ។ តាមក្រុមមន្ត្រីថា ដីដែលឈូសឆាយនោះជាដីរបស់រដ្ឋ ។
ប្រជាពលរដ្ឋដែលមានទីលំនៅក្នុងឃុំត្រពាំងប្រីយ៍ ឲ្យដឹងថា នៅក្នុងឃុំនេះនរណាក៏ល្បីថា លោកផ្កាយ២រូបនេះមានដីច្រើនកន្លែងដែរ សូម្បីដីដែលប្រជាពលរដ្ឋរស់នៅសព្វថ្ងៃតាមដងផ្លូវយុទ្ធសាស្ត្ររបស់សម្តេចតេជោ ហ៊ុន សែន ស្ថិតក្នុងភូមិថ្គាមរមាស ក៏លោកផ្កាយ២បានប្តឹងចោទប្រកាន់ពួកគាត់ថារស់នៅលើដីរបស់លោកដែរ ។ ជាក់ស្តែងនាពេលថ្មីៗនេះ លោកផ្កាយ២អ៊ុក គឹមលី បានយកគ្រឿងចក្រ៤គ្រឿងធ្វើការឈួសឆាយដីព្រៃរបស់រដ្ឋ ។
ចំពោះការចោទប្រកាន់នេះ លោកផ្កាយ២ អ៊ុក គឹមលី នាយរងការិយាល័យទំនាក់ទំនងព្រំដែនកម្ពុជា-ថៃ-វៀតណាម-ឡាវ បានឲ្យដឹងតាមទូរស័ព្ទថា ដីដែលធ្វើកាឈួសឆាយនេះមានជាង២០០ហិកតា ជាដីដែលលោកប្រមូលទិញហើយបានធ្វើប័ណ្ណកម្មសិទ្ធិកាន់កាប់ប្រើប្រាសដីនេះដោយស្របច្បាប់មានរយៈពេលជាង១០ឆ្នាំមកហើយ មិនមែនជាដីគម្របព្រៃរដ្ឋទេ ។ លោកអះអាងថា ការដាក់គ្រឿងចក្រឈូសឆាយដីនេះឲ្យបានរាបស្មើ គឺដើម្បីងាយស្រួលដាំដំណាំផ្សេងៗ ។
លោក ស៊ូ ណាត មេឃុំត្រពាំងប្រីយ៍ នាព្រឹកថ្ងៃទី១១ ខែធ្នូ ខណៈអ្នកយកព័ត៌មានទូរស័ព្ទសុំឲ្យជួយបំភ្លឺពីរឿងដីធ្លីរបស់លោកផ្កាយ២រូបនេះ គឺលោកបានអះអាងថា ដីនោះជារបស់លោក អ៊ុក គឹមលី មែនដែលមានសិទ្ធិប្រើប្រាស់ត្រឹមត្រូវ តែលោកបន្ថែមថា ក្នុងការដាក់គ្រឿងចក្រឈូសឆាយ គួរតែធ្វើសំណើឲ្យមន្ត្រីពាក់ព័ន្ធរួមទាំងអាជ្ញាធរបានដឹងឮផង ៕
ចែករំលែកព័តមាននេះ