ខេត្តបាត់ដំបង ៖ រថយន្តម៉ាកវីហ្គោមួយគ្រឿង បានបើកបុករូបសំណាកដំរីសទាំងកំរោល បណ្ដាលឱ្យរលំផ្ងារជើងបាក់បែកគ្មានសល់ កាលពីវេលាម៉ោង២រំលងអធ្រាត្រឈានចូលថ្ងៃទី១២ ធ្នូ នេះ ស្ថិតនៅចំណុចខាងមុខវត្តដំរីស ក្នុងភូមិកម្មករ…
ខេត្តបាត់ដំបង ៖ រថយន្តម៉ាកវីហ្គោមួយគ្រឿង បានបើកបុករូបសំណាកដំរីសទាំងកំរោល បណ្ដាលឱ្យរលំផ្ងារជើងបាក់បែកគ្មានសល់ កាលពីវេលាម៉ោង២រំលងអធ្រាត្រឈានចូលថ្ងៃទី១២ ធ្នូ នេះ ស្ថិតនៅចំណុចខាងមុខវត្តដំរីស ក្នុងភូមិកម្មករ សង្កាត់ស្វាយប៉ោ ក្រុងបាត់ដំបង តែគេមិនទាន់ដឹងមូលហេតុពិតប្រាកដឡើយ ។
សមត្ថកិច្ចបានប្រាប់ថា ករណីគ្រោះថ្នាក់ចរាចរណ៍នេះ បង្កឡើងដោយរថយន្តម៉ាកវីហ្គោ (VIGO) ពណ៌ទឹកមាស ពាក់ស្លាកលេខ ភ្នំពេញ 2H-5855 បើកបរដោយឈ្មោះជា អរ ភេទប្រុស អាយុ៣៧ឆ្នាំ មុខរបរលក់ដូរ រស់នៅភូមិអូរចា សង្កាត់អូរចារ ក្រុងបាត់ដំបង ។ ម្ចាស់បានរថយន្តនេះរងរបួសស្រាល ហើយបាននិយាយថា ខ្លួនបានបើកគេចម៉ូតូមួយគ្រឿង ដែលធ្វើដំណើផ្ទុយគ្នាទើបជ្រុលចង្កូតទៅបុករូបសំណាកដំរីស នៅខាងមុខវត្តដំរីស បណ្ដាលឲ្យខូចខាតបែបនេះ។
សមត្ថកិច្ចបានប្រាប់ថា រថយន្តនេះ បានបុកកំទេចរូបសំណាក់វត្តដំរីស បណ្ដាលឲ្យរលំបាក់បែកគ្មានសល់ រីឯរថយន្តក៏ក្រឡាប់នៅក្បែររូបដំរីសដែរ ។ ជុំវិញករណីនេះ បើទោះជាបុរសនោះអះអាងថា ខ្លួនបានបើកគេចម៉ូតូទើបជ្រុលទៅបុកសត្វដំរីក្ដី តែមានប្រភពខ្លះបាននិយាយថា អ្នកបើកបររថយន្តបុករូបសំណាកដំរីសនោះ ជាទំនងស្រវឹង ព្រោះវេលានោះជាពេលដែលសមស្របបំផុត សម្រាប់អ្នកស្រវឹងបើកបរ។
មន្ត្រីចរាចរណ៍ ក៏បានចុះទៅពិនិត្យទីតាំងកើតហេតុទាំងយប់ និងបានស្ទូចយករថយន្តបុកសត្វដំរីសនោះទៅរក្សាទុកនៅការិយាល័យចរាចរណ៍ខេត្ត ដើម្បីដោះស្រាយតាមនីតិវិធីហើយ ។
ចែករំលែកព័តមាននេះ