ខេត្តប៉ៃលិន ៖ កាលពីរសៀលថ្ងៃទី១០ ខែធ្នូ ឆ្នាំ២០១៨ ព្រះសង្ឃមួយអង្គ ត្រូវបានសមត្ថកិច្ចសហការគ្នាចាប់ឃាត់ខ្លួន បន្ទាប់ពីធ្វើសកម្មភាពប៉ុនប៉ងរំលោភសេពសន្ថវៈមិនបានសម្រេច ទៅលើក្មេងស្រីតូច មិនទាន់គ្រប់អាយុម្នាក់ នៅចំណុចបន្ទប់ទឹក ខាងក្រោយការិយាល័យទេសចរណ៍។ ស្ថិតក្នុងភូមិវត្ត សង្កាត់ប៉ៃលិន ក្រុងប៉ៃលិន ខេត្តប៉ៃលិន ហើយក៏ត្រូវបានចាប់ផ្សឹកភ្លាមៗ នេះបើតាមការឲ្យដឹងពីលោក សំ សាវឿន ប្រធានមន្ទីរធម្មការ និងសាសនាខេត្តប៉ៃលិនរៀបរាប់ឱ្យដឹងថា ព្រះសង្ឃជាជនសង្ស័យ ឈ្មោះ ពិន ចាន់សេរីរ័ត្ន ភេទប្រុស អាយុ៣១ឆ្នាំ សញ្ជាតិខ្មែរ ជាព្រះសង្ឃដែលធ្លាប់គង់នៅវត្តក្រពើ ស្ថិតនៅក្នុងភូមិក្រពើ ឃុំភ្នំសំពៅ ស្រុកបាណន់ ខេត្តបាត់ដំបង ដោយមកស្នាក់នៅក្នុងខេត្តប៉ៃលិន មិនដឹងវត្តច្បាស់លាស់ ចំណែកក្មេងស្រីរងគ្រោះឈ្មោះ ម.ន.ម.ល.យ អាយុ០៣ឆ្នាំប៉ុណ្ណោះ។
រស់នៅជាមួយឪពុកម្តាយក្នុងភូមិវត្ត សង្កាត់ប៉ៃលិន ក្រុងប៉ៃលិន ខេត្តប៉ៃលិន។ បើតាមប្រភពព័ត៌មានពីសមត្ថកិច្ច នៃស្នងការនគរបាលខេត្តប៉ៃលិន បានឲ្យដឹងថា បន្ទាប់ពីទទួលដំណឹងពីប្រជាពលរដ្ឋរងគ្រោះថា មានករណីប៉ុនប៉ងរំលោភសេពសន្ថវៈ មិនបានសម្រេច ទៅលើកុមារីតូចម្នាក់ សមត្ថកិច្ចនគរបាលជំនាញ ក៏ចុះស្រាវជ្រាវរកព្រះសង្ឃ ដែលជាជនសង្ស័យរូបនោះ។ ប៉ុន្តែត្រូវបានជម្លៀសខ្លួនតាមរថយន្ត ទៅកាន់វត្តខេត្តបាត់ដំបង ពេលនោះសមត្ថកិច្ចជំនាញក៏បានទាក់ទងទៅសមត្ថកិច្ចចរាចរ ដែលកំពុងដាក់ពង្រាយតាមគោលដៅ ត្រួតពិនិត្យតាមផ្លូវជាតិលេខ៥៧ ឱ្យឃាត់រថយន្ត ដែលជនសង្ស័យកំពុងជិះ រួចក៏ឃាត់ខ្លួនបានតែម្តង។
ប្រភពព័ត៌មានបានបន្តថា ក្រោយពីឃាត់ខ្លួនព្រះសង្ឃរួច សមត្ថកិច្ចជំនាញបានបញ្ជូនទៅកាន់ការិយាល័យ ប្រឆាំងការជួញដូរ និងការពារអនីតិជន នៃស្នងការដ្ឋាននគរបាលខេត្តប៉ៃលិន ដើម្បីសាកសួរបន្ថែមទៀត រួចប្រគល់ឲ្យខាងមន្ទីរធម្មការ និងសាសនា ជាអ្នកដោះស្រាយបន្ត។ ចំណែក លោក សំ សាវឿន ប្រធានមន្ទីរធម្មការ និងសាសនាខេត្តប៉ៃលិន បានឲ្យដឹងកាលពីរសៀលថ្ងៃទី១១ ខែធ្នូនេះថា រឿងហេតុខាងលើ គឺមានការយល់ច្រឡំខ្លះៗ ដោយសារតែករណីនេះគឺព្រះសង្ឃបានឲ្យលុយក្មេងស្រីរងគ្រោះចំនួន៥០០រៀល ហើយក្មេងស្រីនោះក៏តាមព្រះសង្ឃទៅខាងលើក្រោយកន្លែងកើតហេតុ។ ដោយមិនចង់ឱ្យខេត្តប៉ៃលិនមានឈ្មោះ ពាក់ព័ន្ធរឿងអាស្រូវ ខាងមន្ទីរក៏ប្រជុំជាមួយមន្ត្រីសង្ឃខេត្តឲ្យលោក ដែលជាជនសង្ស័យផ្សឹកតែម្ដង គឺនៅថ្ងៃកើតហេតុខាងលើ។
លោកបន្តទៀតថា ព្រះសង្ឃដែលជាជនសង្ស័យ មកស្នាក់នៅខេត្តប៉ៃលិន ដោយមិនដឹងគង់នៅវត្តណាច្បាស់លាស់នោះទេ ប៉ុន្តែធ្លាប់គង់នៅវត្តក្រពើ ឃុំភ្នំសំពៅ ស្រុកបាណន់ ខេត្តបាត់ដំបង ផងដែរ។ សូមបញ្ជាក់ថា បើតាមប្រភពព័ត៌មានពីប្រជាពលរដ្ឋបានឲ្យដឹងថា ព្រះសង្ឃធ្លាប់ដើរបិណ្ឌបាត ក្នុងក្រុងប៉ៃលិន អស់រយៈពេលជាងកន្លះខែមកហើយ ប៉ុន្តែមិនដឹងនៅវត្តណានោះទេ។ ហើយបើតាមការសាកសួរពី ព្រះសង្ឃនេះផ្ទាល់បញ្ជាក់ថា អាត្មាគង់នៅវត្តភ្នំយ៉ាតតែម្ដងខេត្តប៉ៃលិន៕
ចែករំលែកព័តមាននេះ