ខេត្តកំពត ៖ ការលើកឡើងរបស់លោកអភិបាលខេត្តបែបនេះ គឺនៅក្នុងអង្គសិក្ខា សាលាស្ដីពី សមាហរណកម្ម កម្មវិធីវិនិយោគបីឆ្នាំរំកិលថ្នាក់ក្រុងឆ្នាំ២០១៨-២០២១ នៅក្នុងសាលប្រជុំ សាលាខេត្តចាស់ កាលពីព្រឹកថ្ងៃទី១១…
ខេត្តកំពត ៖ ការលើកឡើងរបស់លោកអភិបាលខេត្តបែបនេះ គឺនៅក្នុងអង្គសិក្ខា សាលាស្ដីពី សមាហរណកម្ម កម្មវិធីវិនិយោគបីឆ្នាំរំកិលថ្នាក់ក្រុងឆ្នាំ២០១៨-២០២១ នៅក្នុងសាលប្រជុំ សាលាខេត្តចាស់ កាលពីព្រឹកថ្ងៃទី១១ ខែធ្នូ ឆ្នាំ២០១៨ ខណៈលោក ជាវ តាយ អភិបាលនៃគណៈអភិបាលខេត្ត បានអញ្ជើញជាអធិបតី ក្នុងអង្គពិធីបើកសិក្ខាសាលាស្តីអំពី សមាហរណកម្ម កម្មវិធីវិនិយោគ៣ឆ្នាំរំកិល ថ្នាក់ក្រុង ឆ្នាំ២០១៩-២០២១ លោក អភិបាលខេត្ត បានមានប្រសាសន៍បន្តថា រាល់ការអភិវឌ្ឍន៍លើគ្រប់វិស័យទាំងអស់នៅក្នុងក្រុងក៏ដូចជាទូទាំងខេត្តយើង ទាំងមូលផងដែរ ត្រូវតែមានការចូលរួមពីប្រជាពលរដ្ឋ ដៃគូរអភិវឌ្ឍន៍ និងសប្បុរសជននានា ជាមួយអាជ្ញាធរក្នុងមូលដ្ឋានទើបអាចសម្រេចលទ្ធផលរីកចម្រើនបានដោយជោគជ័យ។
ព្រោះថា រាល់ការអនុវត្តគោលនយោបាយវិមជ្ឈការ និងវិសហមជ្ឈការ នៅថ្នាក់ក្រោមជាតិនាពេលកន្លងមក គឺជាដំណើរការពង្រឹង របបប្រជាធិបតេយ្យនៅទូទាំងព្រះរាជាណាចក្រកម្ពុជា ក្នុងគោលដៅបើកឱកាស ឲ្យកាន់តែច្រើនឲ្យប្រជាពលរដ្ឋបានចូលរួមចំណែកដោយផ្ទាល់ក្នុងដំណើរការអភិវឌ្ឍន៍ ជាពិសេសការអនុវត្តសិទ្ធិ និងសេរីភាពរបស់ខ្លួន។ ជាមួយគ្នានេះដែរ ក្រុមប្រឹក្សាសង្កាត់ដែលជាតំណាង ប្រជាជនក៏បានលើក ឡើងនូវគម្រោង ឬសកម្មភាពជាអាទិភាព ស្នើឡើងដោយអ្នកភូមិបានដាក់បញ្ចូល ទៅក្នុងកម្មវិធីវិនិយោគបីឆ្នាំរំកិលរបស់ខ្លួនដើម្បីស្វែងរកប្រភពថវិកាគាំទ្រនេះផងដែរ។
ដូចនេះការរៀបចំធ្វើអង្គសិក្ខាសាលាសមាហរណកម្ម នៃកម្មវិធី វិនិយោគបីឆ្នាំរំកិលឆ្នាំ២០១៩-២០២១ ដែលក្រុងកំពតធ្វើឡើងនាពេលនេះ ពិតជាមានសារៈសំខាន់ ក្នុងការបង្កឱកាសគាំទ្រគម្រោងសកម្មភាព វិនិយោគរបស់ក្រុងនិងសង្កាត់ ដែលពុំមានមូលនិធិអនុវត្ត និងសម្របសម្រួលបន្ស៉ីគ្នា រវាងគម្រោង សកម្មភាពវិនិយោគក្រុង និងសង្កាត់ គម្រោងសកម្មភាពវិនិយោគ សង្កាត់ និងសង្កាត់ គម្រោងសកម្មភាពវិនិយោគក្រុង និងសង្កាត់ និងមន្ទីរវិស័យ និងបណ្ដាដៃគូអភិវឌ្ឍន៍ព្រមទាំង ពង្រឹងកិច្ចសហការរវាងរដ្ឋបាលក្រុងជាមួយរដ្ឋបាលសង្កាត់ និងភាគីពាក់ព័ន្ធនានា។
លោកអភិបាលខេត្ត ក៏បានផ្ដាំផ្ញើដល់តំណាងមន្ទីរជំនាញ និងដៃគូអភិវឌ្ឍន៍នានាបន្ត យកចិត្តទុកដាក់ ពិនិត្យពិចារណាបន្ថែមទៀត ទៅលើតារាងម៉ាទ្រិច សង្កាត់ និងក្រុង ដើម្បីជ្រើសរើស នូវគម្រោងណាដែលសមស្រប ទៅនឹងទិសដៅវិស័យរបស់ខ្លួន ហើយដែលមន្ទីរជំនាញ ឬដៃគូអភិវឌ្ឍន៍គិតថា មានថវិកាជាស្រេចដែលផ្ដល់ដោយ ក្រសួងស្ថាប័ន ឬម្ចាស់ជំនួយផ្សេងៗ សម្រាប់ឆ្លើយតប និងគាំទ្រដល់គម្រោង អភិវឌ្ឍន៍សង្កាត់ និងក្រុង។ ទន្ទឹមនោះលោកអភិបាលខេត្ត ក៏បានស្នើឲ្យពិនិត្យឡើងវិញ នូវគម្រោងទាំងឡាយណា ដែលបានធ្វើការសន្យាគាំទ្រដល់គម្រោងឆ្នាំ កន្លងទៅ ហើយមិនទាន់បានអនុវត្តត្រូវខិតខំធ្វើការអនុវត្តអោយបានទាន់ពេលវេលាផងដែរ៕
ចែករំលែកព័តមាននេះ