ខេត្តរតនគិរី ៖ រថយន្ដធន់ធំបាកុងម៉ាករ៉េវ ចំនួន៥គ្រឿងដែលផ្ទុកគ្រឿង (មិនមែន៤គ្រឿងទេ) ម៉ាស៊ីនរ៉ៃ (រណាយន្ត) កែឆ្នៃសម្រាប់អារកាត់ច្រៀកឈើក្នុងព្រៃដែលចេញពីទឹកដីខេត្ដស្ទឹងត្រែង ឆ្លងកាត់ចូលមកទឹកដីខេត្តរតនគីរី ហើយត្រូវកម្លាំងអាជ្ញាធរស្រុកកូនមុំ ស្ទាក់ចាប់ឃាត់ទុកកាលពីម៉ោងប្រហែល៨និង៣០នាទីយប់ ថ្ងៃទី៨ ខែធ្នូ ឆ្នាំ២០១៨នោះ ។ ក្រោយមកស្រាប់តែលិចលឺថា អាជ្ញាធរបានដោះលែងវិញដោយស្ងាត់ៗអស់ហើយនៅព្រឹកថ្ងៃបន្ទាប់ ដោយសារមានការអន្តរាគមន៍ពីមន្ត្រីនគរបាលម្នាក់ថ្នាក់នាយ ការិយាល័យនៃស្នងការដ្ឋានខេត្ត។
ប្រភពពីមន្ត្រីនគបាលស្រុកកូនមុំបានបងើ្ហបថា រថយន្ដធុនធំប៉ាកុង ចំនួន៥គ្រឿងមានដឹកសម្ភារកែច្នៃឈើដែលសមត្ថកិច្ចស្រុកកូនមុំឃាត់ទុកនោះ បានដោះលែងវិញដោយស្ងាត់ៗអស់ហើយ បន្ទាប់ពីធ្វើការឃាត់ទុកនៅលើកំណាត់ផ្លូវជាតិលេខ៧៨ ត្រង់ចំណុចភូមិតាអង ឃុំតឺន ក្នុងស្រុកកូនមុំ បានមួយដង្ហើមចង្រិតដែរ។
ប្រភពបន្តថា រថយន្តទាំង៥គ្រឿងនោះ សមត្ថកិច្ចបានធ្វើការដោះលែងវិញនៅម៉ោងប្រមាណ៨ព្រឹក ថ្ងៃទី៩ ខែធ្នូ ឆ្នាំ២០១៨ បន្ទាប់ពីបានធ្វើការឃាត់បានមួយយប់ ដោយមានការអន្តរាគមន៍រត់ការពីមន្ត្រីនគរ បាលថ្នាក់នាយការិយាល័យនៃស្នងការខេត្តម្នាក់ ។
លោក សាយ ចំរើន អភិបាលរងស្រុកកូនមុំ ដែលដឹកនាំកម្លាំងចុះទៅឃាត់ក្បួនរថយន្ដប៉ាកុងខាងលើនោះ បានប្រាប់ក្រុមអ្នកព័ត៌មាននៅពេលចុះបង្ក្រាបបានភ្លាមៗនោះថា រថយន្ដទាំង៥នោះ គឺលោកត្រូវតែរឹបអូសយកទៅសាលាស្រុក និងកសាងសំណុំរឿងបញ្ជូនទៅឱ្យខណ្ឌរដ្ឋបាលព្រៃឈើខេត្តចាត់ការតាមផ្លូវច្បាប់។
នាយខណ្ឌរដ្ឋបាលព្រៃឈើខេត្ដរតនគិរីកាលពីថ្ងៃទី១០ ខែធ្នូ ប្រាប់ក្រុមអ្នកព័ត៌មានថា មិនឃើញគេបញ្ជូនរថយន្ដចំនួន៥គ្រឿង និងសំណុំរឿងនោះមកនៅឡើយទេ។ តែក្រោយមកមន្ត្រីប៉ូលិសបានប្រាប់ថា រថយន្ដចំនួន៥គ្រឿងដែលខាងស្រុកកូនមុំ បានឃាត់កាលពីថ្ងៃទី៨ ធ្នូនោះ គឺបានសម្របសម្រួលដោះលែងវិញហើយ ក្រោយពីឃាត់បានមួយយប់។ ការដោះលែងនោះគេសង្ស័យថា អាជ្ញាធរស្រុកអាចចរចាសំរួលត្រូវរ៉ូវជាមួយម្ចាស់រថយន្ដនោះ បើមិនមានការដោះដូរផលប្រយោជន៍ទេ មិនជឿថា លែងងាយស្រួលដូចបកចេកបែបនេះឡើយ៕
ចែករំលែកព័តមាននេះ