រាជធានីភ្នំពេញ ៖ គណៈកម្មាធិការអចិន្ត្រៃយ៍រដ្ឋសភាបានកំណត់យកថ្ងៃទី១៣ធ្នូនេះ ដើម្បីសម័យប្រជុំពេញអង្គរដ្ឋសភាពិភាក្សា និងអនុម័តលើសេចក្តីសំណើរវិសោធនកម្មច្បាប់ស្តីពីគណបក្សនយោបាយមាត្រា៤៥ថ្មី (ស្ទួន) និងនិងសេចក្តីព្រាងច្បាប់ស្តីពីបរធនបាលកិច្ច ។
នេះបើតាមលោក ឈាង វុន អ្នកនាំពាក្យរដ្ឋសភា និងជាប្រធានគណៈកម្មាទី៥រដ្ឋសភា ។ លោក ឈាង វុន បានឲ្យដឹងនៅក្រោយកិច្ចប្រជុំគណៈអចិន្ត្រៃយ៍រដ្ឋសភាប្រព្រឹត្តិទៅនៅព្រឹកថ្ងៃទី១១ ខែធ្នូ ឆ្នាំ២០១៨ នៅវិមានរដ្ឋសភាក្រោមអធិបតីភាពសម្តេច ហេង សំរិន ប្រធានរដ្ឋសភា ។ ការកំណត់ថ្ងៃប្រជុំពេញអង្គរដ្ឋសភានៅពេលឆាប់ៗនេះបន្ទាប់ពីអចិន្ត្រៃយ៍បានបើកកិច្ចប្រជុំកាល ពីថ្ងៃទី៥ ធ្នូនេះ ហើយបានសម្រេចបញ្ជូនសេចក្តីស្នើវិសោធនកម្មច្បាប់ស្តីពីគណបក្សនយោបាយនេះ គណៈកម្មជំនាញរដ្ឋសភា ដើម្បីសិក្សារួចហើយដាក់បញ្ចូនមកគណៈកម្មាធិការអចិន្ត្រៃយ៍រដ្ឋសភាវិញ ។
លោកបន្តថា សេចក្តីស្នើវិសោធនកម្មច្បាប់នេះក៏មិនសំដៅលើកក្រុមមន្ត្រីបក្សប្រឆាំង១១៨នាក់ដែលតុលាការកំពូលហាមឃាត់ធ្វើនយោបាយនោះទេ ។ ពោល គឺអ្នកនយោបាយគណបក្សនយោបាយណាក៏ដោយឲ្យតែតុលាការកំពូលហាម គឺរដ្ឋមន្ត្រីក្រសួងមហាផ្ទៃស្នើនាយករដ្ឋមន្ត្រី ហើយនាយករដ្ឋមន្ត្រីថ្វាយព្រះមហាក្សត្រ ដើម្បីផ្តល់នីតិសម្បទាឲ្យមានសិទ្ធធ្វើនយោបាយឡើងវិញ ។ លោកឈាង វុន អ្នកនយោបាយដែលតុលាការហាមឃាត់ ហើយគោរពសាលដីការតុលាការអាចនឹងត្រូវបានស្នើសុំផងដែរ ។
សូមជម្រាបថា សេចក្តីព្រាងច្បាប់វិសោធនកម្មមាត្រា៤៥ថ្មី (ស្ទួន) ត្រូវបានអ្នកតំណាងរាស្ត្រចំនួន៨៧រូបបានស្នើសុំធ្វើវិសោធនកម្មទៅជាសេចក្តីស្នើច្បាប់មាត្រា៤៥ថ្មី (ស្ទូនមួយ) ។ ដោយមាត្រា៤៥ថ្មី (ស្ទួនមួយ)ដែលអគ្គលេខាធការដ្ឋានរដ្ឋសភាចេញផ្សាយមានខ្លឹមសារយ៉ាងដូច្នេះថា បុគ្គលដែលត្រូវតុលាការសម្រេចហាមឃាត់ការធ្វើសកម្មភាពនយោបាយមិនអាចបង្កើតគណបក្សនយោបាយ ឬចូលរួមក្នុងគណបក្សនយោបាយណាមួយ ឬឈរឈ្មោះឲ្យគេបោះឆ្នោត ឬធ្វើសកម្មភាពណាមួយគាំទ្រ ឬប្រឆាំងគណបក្សណាមួយបានឡើយ ៕
ចែករំលែកព័តមាននេះ