ខេត្តប៉ៃលិន ៖ កសិករមួយគ្រួសារនៅភូមិអណ្តូងថ្ម ឃុំស្ទឹងកាច់ ស្រុកសាលាក្រៅ កំពុងសប្បាយរីករាយជាមួយនឹងការប្រមូលផល ខណៈឆ្នាំនេះម្នាស់របស់គាត់ទទួលបានទិន្នផលល្អ គ្រាន់តែតម្លៃធ្លាក់ចុះបន្ដិច ។
បើតាមអ្នកស្រី ម៉ី ដា ម្ចាស់ចម្ការម្នាស់រូបនេះ បានរៀបរាប់ប្រាប់កោះសន្ដិភាពកាលពីថ្ងៃទី៤ វិច្ឆិកាថា អ្នកស្រីដាំម្នាស់ចំនួន៣ម៉ឺនគុម្ព ដែលទទួលផល២លើកមកហើយ ។ អ្នកស្រីថា ៖« ឆ្នាំនេះ ម្នាស់ទទួលបានទិន្នផលខ្ពស់ គុណភាពល្អ តែតម្លៃធ្លាក់ចុះជាងឆ្នាំមុនបន្ដិច » ។ អ្នកស្រីបន្ថែមថា ៖« ម្នាស់ជាង៣ម៉ឺនគុម្ពនេះ ខ្ញុំដាំរយៈពេល២ឆ្នាំហើយ ហើយក៏ប្រមូលផល២លើកដែរ ឃើញថាផលឆ្នាំនេះល្អ តែដោយសារឈ្មួញនាំម្នាស់ចូលច្រើនពេក ធ្វើឲ្យតម្លៃម្នាស់ក្នុងស្រុកធ្លាក់ចុះ ដោយក្នុង១ផ្លែតម្លៃត្រឹមតែ៥០០ទៅ១.០០០រៀលទៅតាមតូចធំប៉ុណ្ណោះ »។ អ្នកស្រីបានបន្ដថា ដំណាំនេះ ងាយស្រួលដាំ មិនត្រូវការថែទាំច្រើនប៉ុន្មាននោះទេ គ្រាន់តែ ជម្រះស្មៅ និងស្រោចទឹកពេលរដូវរាំងស្ងួតប៉ុណ្ណោះ លុះដុះលូតលាស់ល្អ គ្រាន់តែបាញ់ជាតិថ្មស្អុយដើម្បីឱ្យម្នាស់ចេញផ្កា នោះជាការស្រេច ។
អ្នកស្រីបញ្ជាក់ថា ៖« ចម្ការម្នាស់របស់ខ្ញុំមិនបានប្រើថ្នាំគីមីបំប៉នទេ គឺទុកឱ្យដុះលូតលាស់តាមធម្មជាតិ ដូច្នេះហើយទើបផ្លែមិនសូវធំ ដូចជាម្នាស់ដែលឈ្មួញនាំចូល ។ អ្នកស្រីបញ្ជាក់បន្ថែមថា ៖« តម្លៃដែលខ្ញុំលក់នេះ បើសិនមានអ្នកទិញយកទៅលក់បន្ដទៅតាមផ្សារ ខ្ញុំបញ្ចុះតម្លៃថែមទៀត ព្រោះសព្វថ្ងៃទីផ្សារម្នាស់សម្បូរណាស់ ហើយឈ្មួញនាំចូលមកពីតំបន់ផ្សេងៗច្រើនដែរ ដូច្នេះពិបាកក្នុងការប្រកួតប្រជែង ដោយម្នាស់គេធំៗល្អ ចំណែកម្នាស់ខ្ញុំដាំដោយធម្មជាតិបែបនេះ ផ្លែមិនសូវធំនោះទេ »។
អ្នកស្រីលើកឡើងថា ៖« ប្រសិនសិនជាឆ្នាំក្រោយ ពិបាកក្នុងការរកទីផ្សារទៀត ខ្ញុំប្រហែលជាប្តូរទៅដាំដំណាំផ្សេងវិញហើយ ដូចជាពោត ឬដំឡូងមីជាដើម ព្រោះកសិផលនេះកំពុងមានតម្លៃ និងទីផ្សារល្អ បើនៅដាំម្នាស់ទៀត គ្រួសារខ្ញុំនឹងប្រឈមបញ្ហាជីវភាព »៕
ចែករំលែកព័តមាននេះ