រាជធានីភ្នំពេញ៖ពាក្យដែលតែងតែឮ តៗគ្នាក្នុងចំណោមទស្សនិកជនស្តីពីតារាស្រីខ្លះដោះដូរខ្លួនប្រាណជាថ្នូរនឹងប្រាក់ និងការប្តូរខ្លួនប្រាណដើម្បីបានចាប់ឈោងភាពល្បីល្បាញនៅក្នុងពិភពសិល្បៈហាក់មិនទាន់រសាត់ទៅណាឆ្ងាយទេ ។ ពាក្យដែលថាតារាស្រីចាប់ផ្តើមល្បី និងមានរូបស្រស់សោភាច្រើនតែមិនអាចគេចផុតពីភ្នែកអ្នកសម្បូរប្រាក់នោះ មានមតិលើកឡើងថាវាអាចជាការណ៍ពិតមួយផ្នែក ខណៈពេលដែលតារាមួយចំនួនបានឡើងកាលីបលឿនលើសកម្រៃដែលទទួលបានពីអាជីព ក៏ស្ថិតនៅក្នុងការសង្ស័យនេះផងដែរ ។
ជាការកត់សម្គាល់បច្ចុប្បន្ននេះមានតារាថ្មីមួយចំនួន ជាពិសេសតារាស្រីដែលមានរូបសម្រស់ស្រស់ស្អាតបាននិងកំពុងតែសម្ញែងដាក់គ្នាពីភាពស៊ីវិល័យតាមរយៈការប្រើប្រាស់សម្ភារ ទំនើបៗ និងមានតម្លៃថ្លៃកប់ពពក ។ ការដែលពួកនាងបង្ហាញភាពហ៊ឺហាទាំងនោះ គឺហាក់មិនបានគិតទៅដល់ទេថា អាជីពសិល្បៈរបស់ខ្លួនហាក់មិនមានលទ្ធភាពដល់ប៉ុណ្ណឹងឡើយ ។ រឿងនេះហើយដែលនាំឲ្យមហាជនភាគច្រើនបានចោទសួរ និងសន្និដ្ឋានស្រដៀងគ្នាថា តារាស្រីទាំងនោះប្រាកដជាមានអ្នកជួយទំនុកបម្រុងពីក្រោយ ឬក៏ហ៊ានប្តូរខ្លួនប្រាណដើម្បីបានសម្ភារទាំងអស់នោះ ។
គេនៅចាំបានថា តារាថ្មីមួយម្នាក់ធ្លាប់បានទម្លាយថា នាងធ្លាប់ត្រូវម៉ែយ៉ែមទាក់ទងដើម្បីឲ្យទៅបុរសអ្នកមានម្នាក់ ។ បុរសនោះចង់បានខ្លួនរបស់នាងជាថ្នូរនឹងសម្ភារទំនើបតាមការចង់បានរបស់នាង ប្រសិនបើនាងព្រម ។ ប៉ុន្តែតារាស្រីរូបនេះបានបដិសេធនូវការទាក់ទងពីបុរសអ្នកមានស្តុកម្នាក់នោះ ដោយគិតថា បុរសរូបនោះមាន ប្រពន្ធកូនហើយ ខណៈពេលដែលនាងក៏មិនចង់មានបញ្ហាវែងឆ្ងាយពីបញ្ហាមួយនេះដែរ ។
ដោយឡែកមានតារាស្រីម្នាក់ទៀតក៏ធ្លាប់បានទម្លាយរឿងស្រដៀងគ្នានេះដែរថា ប្រសិនបើនាងព្រមប្រគល់ខ្លួនឲ្យទៅបុរសណាម្នាក់នោះ គឺនាងមិនប្រគល់ដោយអត់ប្រយោជន៍ឡើយ ពោលគឺត្រូវមានអ្វីសម្រាប់រូបនាងជាដុំកំភួនមកវិញទើបនាងព្រម ។
ចំណែកតារាស្រីម្នាក់ទៀត កាលពីពេល ថ្មីៗកន្លងមកធ្លាប់បានទម្លាយសារតាមហ្វេសប៊ុកពាក់ព័ន្ធទៅអ្នកដឹកនាំរឿងមួយរូបបានឲ្យតម្លៃខ្លួននាងយ៉ាងទាបដើម្បីបាននាងទៅគេងមួយយប់ ។ ក្រៅពីនេះតារាសម្តែងស្រីដែលមានរូបសម្រស់ស្រស់ស្អាតពីរនាក់បានហែកហួរគ្នាទៅវិញទៅមកតាមហ្វេសប៊ុកពាក់ព័ន្ធទៅនឹងការលក់ខ្លួននេះផងដែរ ។
បញ្ហាទាំងអស់នេះហើយបាននាំឲ្យមានការសន្និដ្ឋានពីបណ្តាអ្នកតាមដានសិល្បៈថា តារាស្រីមួយចំនួនពិតជាដោះដូរខ្លួនប្រាណដើម្បីប្រាក់ និងកេរ្តិ៍ឈ្មោះ ។
ទោះជាយ៉ាងណាក្តីរឿងអាស្រូវនេះមិនមានមូលដ្ឋានណាមួយបង្ហាញឲ្យជាក់លាក់ទេ ព្រោះវាគ្រាន់តែជាការសន្និដ្ឋានប៉ុណ្ណោះ ។ បញ្ហានេះវាអាចកើតមានឡើងតែទៅលើបុគ្គលដែលជាអ្នកសិល្បៈមួយចំនួនប៉ុណ្ណោះ ពោលគឺមិនជាទូទៅឡើយ ។ ជាក់ស្តែងតារាល្បីឈ្មោះមួយចំនួនទទួលភាពហ៊ឺហាក្នុងជីវិតរបស់ខ្លួន គឺបានមកពីចំណូលសិល្បៈ និងមុខជំនួញផ្ទាល់ខ្លួន ឬពីក្រុមគ្រួសារមានជីវភាពធូរធារ ។
ជាការកត់សម្គាល់ការយល់បែបនោះវាស្របគ្នាចំពោះរឿងរ៉ាវបានកើតមានកាលពីអំឡុងឆ្នាំ២០១២ ដែលសមត្ថកិច្ចបានបើកប្រតិបត្តិការទៅលើចែមុំ ថៅកែហាងកែសម្រស់មីកាហ្សា ពីបទជួញដូរផ្លូវភេទ ក្នុងនោះក៏មានតារាពាក់ព័ន្ធផងដែរ ។ ដោយឡែកតារាចម្រៀងនាងអ៊ូ រស្មី ក៏ជាប់ឈ្មោះជាម៉ែយ៉ែមដែរ ដោយជាប់ចោទនាំក្មេងស្រីមិនទាន់គ្រប់អាយុទៅលក់ព្រហ្មចារី។
កន្លងមកក៏មានតារាស្រី ក្មេងៗស្រស់ស្អាត និងកំពុងតែល្បីឈ្មោះមួយចំនួនរងព័ត៌មានដ៏អាស្រូវស្តីពីការលក់ខ្លួនផងដែរ តែវាគ្រាន់តែជាពាក្យលេចលឺដែលគ្មានភស្តុតាងប៉ុណ្ណោះ ។
ពាក់ព័ន្ធរឿងនេះប្រធានសមាគមសិល្បករខ្មែរអ្នកនាងចន ច័ន្ទលក្ខិណា កាលពីពេលកន្លងមកមិនបានអធិប្បាយអ្វីច្រើនទេ នៅពេលដែលមានការសាកសួរ ក៏ប៉ុន្តែនាងហាក់មិនបានបដិសេធចោលទាំងស្រុងឡើយ ក្នុងពេលដែលនាងបានបង្ហាញជំហរដោយខ្លីថា «នេះជារឿងបុគ្គល»៕
ចែករំលែកព័តមាននេះ