ខេត្តបន្ទាយមានជ័យ ៖ សេចក្តីរាយការណ៍វបឋមឱ្យដឹងថា បុរសជាជនជាតិថៃដែលជាចុងភៅម្នាក់ ត្រូវបានប្រទះឃើញស្លាប់ ហើយទើបតែត្រូវដឹង និងបង្កភ្ញាក់ផ្អើលនៅព្រឹកថ្ងៃទី១០ ធ្នូ នេះ ស្ថិតនៅផ្ទះសំណាក់មួយ ក្នុងភូមិក្បាលស្ពាន១ សង្កាត់និងក្រុងប៉ោយប៉ែត ដែលមានរយៈ៤ថ្ងៃទៅហើយ ។
សេចក្តីរាយការណ៍បន្តថា សាកសពជនរងគ្រោះខាងលើ មានឈ្មោះ Boontum Nuanoup អាយុ៤៨ឆ្នាំជាចុងភៅនៅហាងមួយក្នុងប្លុកកាស៊ីណូផ្កាយ៥ ក្នុងភូមិកើតហេតុ ។ សាកសពមានសភាពហើមស្អុយរលួយទៅហើយ ឃើញដេកស្លាប់លើពូក ដោយដោះអាវ មានតែខោលីអូ។
តាមប្រភពឱ្យដឹងទៀតថា ដំបូងគ្មាននរណាដឹងពីកាស្លាប់របស់ជនរងគ្រោះទេ ។ លុះមានក្លិនស្អុយសាយភាយមកក្រៅ ទើបកម្មកររៀបចំបន្ទប់ដឹងទៅប្រាប់ម្ចាស់ផ្ទះសំណាក់ និងរាយការណ៍បន្តដល់សមត្ថកិច្ចតែម្តង ដែលជនរងគ្រោះស្លាប់នៅបន្ទប់លេខE៥ជាន់ទី៣ ដោយបន្ទប់ឡក់សោពីខាងក្នុង ។
យ៉ាងណាក៏ដោយ មកទល់ម៉ោង១១ និង១១នាទីព្រឹកថ្ងៃដដែល មិនទាន់ដឹងពីលទ្ធផលថា ជនរងគ្រោះស្លាប់ ដោយសារអ្វីនៅឡើយទេ ព្រោះសមត្ថកិច្ចជំនាញពាក់ព័ន្ធនិងគ្រូពេទ្យ កំពុងធ្វើការនៅឡើយ ។
ព័ត៌មានបន្ថែមនឹងផ្សាយជូនបន្ត ។
ចែករំលែកព័តមាននេះ