ខេត្តឧត្តរមានជ័យ ៖ អគ្គីភ័យបានលេបត្របាក់ជង្រុកដាក់ស្រូវរបស់ស្ត្រីមេម៉ាយម្នាក់ដែលមានទំហំ៣ម៉ែត្រគុណនឹង៤ម៉ែត្រ ជញ្ជាំងបាំងក្តារ ដំបូលប្រក់ស្បូវ ត្រូវភ្លើងឆាបឆេះស្ទើរទាំងស្រុងកាលពីវេលាម៉ោង៣រសៀលថ្ងៃទី៩ ធ្នូ ២០១៨ ស្ថិតនៅភូមិថ្មី សង្កាត់កូនគ្រៀល ក្រុងសំរោង ខេត្តឧត្តរមានជ័យ។
ជង្រុកស្រូវដែលត្រូវអគ្គីភ័យឆាបឆេះខាងលើជារបស់ស្ត្រីមេម៉ាយឈ្មោះទូច សឿត អាយុ៥២ឆ្នាំ មានកូន២នាក់ រស់នៅក្នុងភូមិឃុំកើតហេតុខាងលើ។
តាមប្រភពពីស្ត្រីមេម៉ាយដែលជាម្ចាស់ជង្រុកស្រូវខាងលើបានរៀបរាប់ឱ្យដឹងថា មុនពេលកើតហេតុ គាត់បានបោសសំអាតស្មៅ និងស្លឹកចេកដែលទុំជ្រុះក្នុងចំការនៅខាងក្រោយផ្ទះដើម្បីប្រមូលដុតចោល លុះដុតរួចគាត់មិនបានចាប់អារម្មណ៍នៅមើលទេ ដោយបានទុកចោល ស្រាប់តែភ្លើងបានរាលដាលមកឆេះជង្រុកស្រូវរបស់គាត់តែម្តង ។
បន្ទាប់មកអ្នកភូមិដែលរស់នៅជិតខាងបាននាំគ្នារត់មកជួយពន្លត់ ហើយភ្លើក៏បានរលុតទៅវិញ តែទោះជាបែបណា ក្នុងហេតុការណ៍ខាងលើបណ្តាលឱ្យរងការខូចខាតឆេះស្រូវអស់ចំនួន១០ការុង និងជង្រុកស្រូវ
ស្ទើរទាំងស្រុងផងដែរ។
តាមប្រភពពីប៉ូលិសសង្កាត់រដ្ឋបាលកូនគ្រៀលបានឲ្យដឹងថា ក្រោយកើតហេតុខាងលើ សមត្ថកិច្ចរួមទាំងអាជ្ញាធរមូលដ្ឋានបានចុះទៅដល់នឹងកន្លែងកើតហេតុដើម្បីធ្វើការពិនិត្យ និងធ្វើកំណត់ហេតុរាយកាណ៍ទៅសង្កាត់ក្រុងខេត្តផងដែរ៕
ចែករំលែកព័តមាននេះ