រាជធានីភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានថ្លែងថា រាជរដ្ឋាភិបាលបានកំណត់យករាជធានី ខេត្តចំនួន៦ ជាមូលដ្ឋានសម្រាប់រៀបចំតំបន់ឧស្សាហកម្មជាតិ ដោយសារតំបន់ទាំងនោះមានហេដ្ឋារចនាសម្ព័ន្ធសមស្រប និងមានសក្តានុពលសេដ្ឋកិច្ចខ្ពស់ ។…
រាជធានីភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានថ្លែងថា រាជរដ្ឋាភិបាលបានកំណត់យករាជធានី ខេត្តចំនួន៦ ជាមូលដ្ឋានសម្រាប់រៀបចំតំបន់ឧស្សាហកម្មជាតិ ដោយសារតំបន់ទាំងនោះមានហេដ្ឋារចនាសម្ព័ន្ធសមស្រប និងមានសក្តានុពលសេដ្ឋកិច្ចខ្ពស់ ។
រដ្ឋលេខាក្រសួងសេដ្ឋកិច្ច និងហិរញ្ញវត្ថុលោក វង្សី វិស្សុត បានថ្លែងក្នុងបទបង្ហាញមួយកាលពីថ្ងៃទី៤ ធ្នូ កន្លងមកថា យុទ្ធសាស្ត្រកម្ពុជាបានកំណត់តំបន់អាទិភាពមួយចំនួន ជាតំបន់មូលដ្ឋានឧស្សាហកម្មជាតិ និងជាតំបន់ដែលមានហេដ្ឋារចនាសម្ព័ន្ធល្អ ដើម្បីបម្រើដល់ការធ្វើពាណិជ្ជកម្ម ។ លោកថ្លែងថា ៖« ក្នុងគោលដៅអភិវឌ្ឍន៍វិស័យសេដ្ឋកិច្ច កម្ពុជាបានកំណត់តំបន់អាទិភាពមួយចំនួន ជាមូលដ្ឋានឧស្សាហកម្មជាតិ រួមមាន រាជធានីភ្នំពេញ ក្រុងព្រះសីហនុ ក្រុងបាវិត ក្រុងប៉ោយប៉ែត ក្រុងប៉ៃលិន និងខេត្តសៀបរាបជាដើម ។ លោកបន្តថា ៖« មូលដ្ឋានទាំងអស់នេះ ជាតំបន់ដែលមានហេដ្ឋារចនាសម្ព័ន្ធរួចរាល់ ជាទីប្រជុំជនប្រកបដោយសក្តានុពល ដើម្បីបម្រើដល់ការនាំចេញនាំចូលក្នុងការធ្វើពាណិជ្ជកម្ម »។
លោក វង្សី វិស្សុត បានបន្ថែមថា នៅក្នុងយុទ្ធសាស្ត្រដំណាក់កាលទី៤របស់រាជរដ្ឋាភិបាល គឺការគិតគូរក្នុងការបង្កើនធនធានមនុស្ស ជាវិស័យអាទិភាពទី១ ដែលរាជរដ្ឋាភិបាលកំពុងកែទម្រង់ រួមមានការអប់រំវិជ្ជាជីវៈ (STEM), សុខាភិបាល និងបញ្ហាពាក់ព័ន្ធសង្គមផ្សេងៗទៀត ។ ការធ្វើពិពិធកម្មសេដ្ឋកិច្ច រួមមានផ្លូវដឹកជញ្ជូន ការគ្រប់គ្រប់តាមប្រព័ន្ធឌីជីថល ការគ្រប់គ្រងកំណើនសេដ្ឋកិច្ចទៅតាមយន្តរបស់រាជរដ្ឋាភិបាល និងការអភិវឌ្ឍជនបទជាដើម ដែលបញ្ហាទាំងនេះទាក់ទងទៅដល់ការកែទម្រង់ អភិបាលកិច្ចល្អផងដែរ ។
លោករដ្ឋលេខាធិការបានបន្តថា នៅក្នុងក្របខ័ណ្ឌនៃការរក្សាកំណើនសេដ្ឋកិច្ច កម្ពុជាកំពុងចាប់ផ្តើមធ្វើឲ្យប្រសើរឡើងលើបច្ចុប្បន្នកម្ម ទំនើបកម្មដែលមានស្រាប់ រួមមានឧស្សាហកម្ម កសិកម្ម កម្មន្តសាល និងវិស័យសេវាជាដើម ជាពិសេសការស្វែងរកប្រភេទឧស្សាហកម្មផ្សេងៗទៀត ដើម្បីជំរុញឲ្យកំណើនកើនឡើងជាមុន ក្នុងនោះកម្ពុជាត្រូវតែធ្វើប្រតិភូកម្មសេដ្ឋកិច្ច និងការបង្កើតភាពប្រកួតប្រជែងផងដែរ ។
ក្នុងគោលនយោបាយអភិវឌ្ឍន៍ វិស័យឧស្សាហកម្មរបស់រដ្ឋាភិបាលឆ្នាំ២០១៥-២០២៥ រាជរដ្ឋាភិបាលបានកំណត់ក្រុងប៉ោយប៉ែត ខេត្តបន្ទាយមានជ័យ និងក្រុងបាវិតក្នុងខេត្តស្វាយរៀងជាតំបន់សម្រាប់អភិវឌ្ឍន៍វិស័យឧស្សាហកម្មមានលក្ខណៈពិសេសមួយ ។ ជាលទ្ធផលក្រុងទាំងពីរកំពុងមានការអភិវឌ្ឍ យ៉ាងលឿន និងកំពុងទាក់ទាញវិនិយោគិនជាតិ និងអន្តរជាតិយ៉ាងច្រើនមកបណ្ដាក់វិនិយោគដែលធ្វើឲ្យវិស័យសំណង់ និងអចលនទ្រព្យនៅក្រុងទាំងពីរនេះមានសន្ទុះយ៉ាងខ្លាំង ៕
ចែករំលែកព័តមាននេះ