រាជធានីភ្នំពេញ ៖ ការប្រកួតជ្រើសរើសជើងឯកវគ្គថ្មីនៅប៉ុស្ដិ៍លេខ៥ កីឡាករគួន ប៊ុនហ៊ីម មកពីក្លិបពន្លឺសាមគ្គីទទួលបានជោគជ័យទៀតហើយ ក្នុងការដណ្ដើមបានកៅអី១៦នាក់ ក្នុងពេលដែលគេវាយបំបាក់កីឡាករជើងខ្លាំងជាគូប្រកួត គឺកីឡាករបង្គោលក្រហម រិទ្ធ ប្រាក់ប៊ិន មកពីក្លិបកងពលតូចលេខ៧០ ឱ្យចាញ់ពិន្ទុទាំងអស់ចិត្ត។
នេះមិនមែនជាការបង្ហាញមុខរបស់គេនៅក្នុងព្រឹត្តិការណ៍ជ្រើសរើសជើងឯក TV5 Knockout Series By K-Cement នេះជាលើកទី១នោះទេ ដោយសារតែគេធ្លាប់បានចូលប្រកួតច្រើនដងមកហើយ អីចឹងហើយទើបអ្នកគាំទ្រលាន់មាត់សរសើរថា ដ្បិតថាមិនបានតំណែងជើងឯក ប៉ុន្តែចូលប្រកួតលើកណាក៏បានឡើងវគ្គ១៦ក្រុមដោយមិនលំបាក។
កីឡាករ គួន ប៊ុនហ៊ីម ត្រូវគេមើលឃើញថា ទទួលបានកៅអី១៦នាក់ នៅប៉ុស្ដិ៍លេខ៥ កាលពីថ្ងៃទី៨ ធ្នូ គឺទទួលដោយស្រួលជាងមុនដោយសារតែគេធ្លាប់បានចូលប្រឡូកក្នុងព្រឹត្តិការណ៍នេះច្រើនដងមកហើយ ហើយទាំងបទពិសោធន៍ និងតិចនិកក្នុងការយកពិន្ទុពីការប្រកួតទាំងមូល ក៏ល្អជាកីឡាករបង្គោលក្រហម ដែលទើបប្រឡូកថ្មីៗ។
យ៉ាងណាមិញ លោកនៅតែត្រូវកីឡាករបង្គោលក្រហមវាយសម្រុកឱ្យបាក់មុខដោយអន្លើដែលមានន័យថា មិនមែនឈ្នះដោយមិនបានវាយប្ដូរនោះទេ ដ្បិតថាគេមានសមត្ថភាព និងបទពិសោធន៍ជាង។
ជ័យជម្នះរបស់គេនៅក្នុងវគ្គនេះ នឹងជួយឱ្យ គួន ប៊ុនហ៊ីម ក្លាយជាអ្នកមានឱកាសទៅប្រកួតយកកៅអីក្នុងវគ្គបន្តទៀតហើយ ប៉ុន្តែមិនទាន់ដឹងថា តើគេនឹងធ្លាក់ដូចមុន ឬមានសំណាងដូច លាភ រដ្ឋា ដែលប្រកួតដដែលហើយដដែលទៀត ចុងក្រោយក៏ក្លាយជាម្ចាស់ជើងឯក កាលពីរដូវកាលមុនោះ។
ម្យ៉ាងការបង្ហាញខ្លួនលើកនេះ កីឡាករបង្គោលខៀវគួន ប៊ុនហ៊ីម ក៏មានការតាំងចិត្តខ្ពស់ និងមានជំនឿចិត្តច្រើនផងដែរ ទើបគេកំពុងចាំអ៊ុតមើលថា តើគេនឹងបន្តឡើងទៅដល់កៅអីមួយណានៅប៉ុស្ដិ៍លេខ៥ ក្រោយពីមានឱកាសបានឈ្នះទៅវគ្គ១៦នាក់ នៅក្នុងពេលនេះ៕
ចែករំលែកព័តមាននេះ