ខេត្តកំពត ៖ បុរសចំណាស់ម្នាក់ត្រូវបានគេប្រទះឃើញស្លាប់ក្នុងទឹកប្រឡាយ ដែលហេតុការណ៍នេះបានកើតឡើងកាលពីវេលាម៉ោង១០និង២០ព្រឹក ថ្ងៃទី៧ ខែធ្នូ ឆ្នាំ ២០១៨ លើផ្លូវលំក្រាលគ្រួសក្រហម ស្ថិតក្នុងភូមិត្រពាំងកំភ្លាញ ឃុំអង្គភ្នំតូច ស្រុកអង្គរជ័យ ។
ជនរងគ្រោះដែលស្លាប់ឈ្មោះម៉ក់ សុផល ហៅ ងយ ភេទប្រុស អាយុ៥០ឆ្នាំ ជាអ្នកបើកបរម៉ូតូមួយគ្រឿងម៉ាកគុប៥០ ពណ៌ស្លែ ពាក់ផ្លាកលេខ ភ្នំពេញ ១AK-៦៣០៤ ។
តាមប្រភពព័ត៌មានបានឱ្យដឹងថា គ្មាននរណាម្នាក់បានដឹងពីមូលហេតុដែលបណ្តាលឲ្យបុរសរងគ្រោះខាងលើស្លាប់ក្នុងទឹកប្រឡាយយ៉ាងអាណោចអាធ័មបែបនេះនោះទេ។
បើតាមនគរបាលមូលដ្ឋានដែលមកពិនិត្យសពនៅកន្លែងកើតហេតុ និងធ្វើការពិនិត្យស្លាកស្នាមកន្លែងកើតហេតុ បានសន្និដ្ឋានថា អាចបណ្តាលមកពីជនរងគ្រោះវិលមុខ ឬខ្យល់គ ទើបបើកម៉ូតូទៅបុកដើមប្រេងខ្យល់ដែលនៅក្បែរផ្លូវ ហើយខ្ទាតជនរងគ្រោះចេញពីម៉ូតូធ្លាក់ទៅក្នុងទឹកប្រឡាយខាងលើ ទើបស្លាប់យ៉ាងអាណោចអាធ័មបែបនេះ។
ក្រោយពីពិនិត្យរួច សមត្ថកិច្ចបានប្រគល់សពជូនក្រុមគ្រួសារដើម្បីរៀបចំធ្វើបុណ្យតាមប្រពៃណី ៕
ចែករំលែកព័តមាននេះ