កាលពីថ្ងៃចន្ទកន្លងមកនេះ ប្រធានក្រុមចារកម្ម MI6របស់ប្រទេសអង់គ្លេស លោក Alex Younger បានព្រមានពីការគម្រាមកំហែងផ្នែកសន្តិសុខដែលបង្កឡើងដោយក្រុមហ៊ុនស្មាតហ្វូន Huawei របស់ប្រទេសចិន ។
លោក Younger បាននិយាយថា ចក្រភពអង់គ្លេសនឹងត្រូវសម្រេចចិត្តពីបញ្ហាមួយចំនួនទាក់ទិននឹង Huawei បន្ទាប់ពីសម្ព័ន្ធមិត្តដូចជា សហរដ្ឋអាមេរិក អូស្ត្រាលី និងនូវែលសេឡង់ បានហាមឃាត់ក្រុមហ៊ុននេះមិនឲ្យចាប់ដំណើរការបណ្តាញ 5G ។
គួរបញ្ជាក់ដែរថា សហរដ្ឋអាមេរិកបាននាំមុខការប្រឆាំងនឹងHuaweiនេះ ដែលមានស្ថាបនិកជាអតីតសមាជិកកងយោធាសេរីភាពប្រជាជនរបស់ប្រទេសចិន ។ ជាលទ្ធផល ក្រុមហ៊ុននេះត្រូវបានហាមឃាត់មិនឲ្យចូលក្នុងទីផ្សារសហរដ្ឋអាមេរិកផងដែរ ។ ប៉ុន្តែវាមិនបានបញ្ឈប់ Huawei ក្នុងការក្លាយជាក្រុមហ៊ុនផលិតស្មាតហ្វូនដែលមានប្រជាប្រិយភាពជាងគេលេខ២លើពិភពលោកឡើយ។
លោក Younger បានបន្ថែមថា ការមកដល់នូវបច្ចេកវិទ្យា 5G នឹងធ្វើឲ្យការត្រួតពិនិត្យបច្ចេកវិទ្យារបស់ Huawei កាន់តែពិបាក ។
គួរបញ្ជាក់ថា ចក្រភពអង់គ្លេសបានតម្លើងបច្ចេកវិទ្យា Huawei ក្នុងបណ្តាញទូរគមនាគមន៍របស់ខ្លួនរួចទៅហើយ ។ លោក Younger បានបន្តថា ៖« យុទ្ធ សាស្ត្ររបស់រដ្ឋាភិបាលចិនក្នុងការការពារទិន្នន័យមានន័យថា ពួកគេអាចប្រើនិងផ្លាស់ប្តូរទិន្នន័យក្នុងទ្រង់ទ្រាយដែលយើងគិតស្មានមិនដល់ »៕
ចែករំលែកព័តមាននេះ