ខេត្តកំពង់ឆ្នាំង ៖ ប្រជាពលរដ្ឋរស់នៅតាមបណ្តោយផ្លូវមួយខ្យែ ក្នុងភូមិត្រពាំងចិក្សា សង្កាត់កំពង់ឆ្នាំង ក្រុងកំពង់ឆ្នាំង បានផ្ទុះការតវ៉ា ខណៈដែល អាជ្ញាធរសង្កាត់បានចាប់ផ្តើមកសាងផ្លូវថ្មី នៅចំណុចខាងលិចរោងចក្រ…
ខេត្តកំពង់ឆ្នាំង ៖ ប្រជាពលរដ្ឋរស់នៅតាមបណ្តោយផ្លូវមួយខ្យែ ក្នុងភូមិត្រពាំងចិក្សា សង្កាត់កំពង់ឆ្នាំង ក្រុងកំពង់ឆ្នាំង បានផ្ទុះការតវ៉ា ខណៈដែល អាជ្ញាធរសង្កាត់បានចាប់ផ្តើមកសាងផ្លូវថ្មី នៅចំណុចខាងលិចរោងចក្រ M.V មិនធ្វើចំកណ្តាលអោយស្មើទាំងសងខាង បែរជាទុកមួយចំហៀង ធ្វើតែមួយចំហៀងទៅវិញ ដោយសង្ស័យថា អាជ្ញាធរមានគោលបំណងយកចំណីផ្លូវដែលនៅសេសសល់ លក់ទៅអោយបុគ្គលណាម្នាក់ ។ ហេតុការណ៍នេះបានផ្ទុះឡើងនៅព្រឹកថ្ងៃទី៥ ខែធ្នូ ខណៈដែលក្រុមហ៊ុនកំពុងចាក់ដីក្រហមធ្វើផ្លូវថ្មី ។
ប្រជាពលរដ្ឋអ្នកតវ៉ាបានលើកឡើងថា ផ្លូវដែលអាជ្ញាធរសង្កាត់កំពង់ឆ្នាំង កំពុងតែកសាងឡើងវិញនៅខាងលិចរោងចក្រអឹមវ៉េ គឺជាផ្លូវចាស់មិនសូវមានអ្នកធ្វើដំណើរនោះទេ ដុះព្រៃស៊ុបទ្រុប ។ ផ្លូវនេះមានប្រវែង១៩៦ម៉ែត្រ មានទទឹង១៥ម៉ែត្រ ។ នៅពេលដែលអាជ្ញាធរចាប់ផ្តើមឈូសឆាយធ្វើផ្លូវថ្មី គឺធ្វើទទឹង៥ម៉ែត្រ ប៉ុន្តែមិនធ្វើចំកណ្តាលផ្លូវទេ គឺធ្វើតែម្ខាងប៉ែកខាងលិច ស្ទើរជាប់របងផ្ទះ និងឃ្លាំងស្តុកទំនិញរបស់ប្រជាពលរដ្ឋនៅតែប្រមាណ១ម៉ែត្រប៉ុណ្ណោះ។ ចំណែកប៉ែកខាងកើតផ្លូវ គឺទុកចាប់ពីជាង៧ម៉ែត្រឡើង ។
ពួកគាត់សួរថា ហេតុម្តេចមិនធ្វើអោយចំកណ្តាលស្មើគ្នាទាំងសងខាង តើទុកដីចំណីផ្លូវអោយធំម្ខាង ទុកធ្វើអី ឬទុកសម្រាប់លក់ដូរ ដូចពាក្យគេនិយាយមែន?
ប្រជាពលរដ្ឋជាម្ចាស់ឃ្លាំងស្តុកទំនិញម្នាក់ បានលើកឡើងថា កាលផ្លូវនៅទទឹងជាង១៥ម៉ែត្រ ពេលរថយន្តដឹកទំនិញគាត់ចូលបត់មិនរួចផង ប៉ះរបងគេ-គេអោយសង ចុះទម្រាំផ្លូវមកសល់ទទឹងត្រឹម៥ម៉ែត្រ តើគាត់នឹងត្រូវធ្វើបែបណា ? ប្រជាពលរដ្ឋ ទាំងនោះសំណូមពរដល់អាជ្ញាធរសង្កាត់សូមមេត្តាធ្វើផ្លូវអោយចំពាក់កណ្តាលស្មើគ្នាទាំងសងខាង មិនត្រូវទុកម្ខាង ធ្វើម្ខាងទេ នេះបញ្ជាក់ថា ជញ្ជីងយុត្តិធម៌ផ្អៀងហើយ…ធ្ងន់ម្ខាង ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ