ខេត្តមណ្ឌលគិរី ៖ រថយន្តធុនវេអង (V១)ចំនួន៤គ្រឿង បានត្រូវលោក ហៀង សុភក្ត្រព្រះរាជអាជ្ញាអមសាលាដំបូងខេត្ត បញ្ជាឲ្យសមត្ថកិច្ចតាមដងផ្លូវជាតិលេខ៧៦ឃាត់ត្រួតពិនិត្យ ក្រោយពីសង្ស័យថាដឹកឈើលើសច្បាប់អនុញ្ញាតឬគ្មានច្បាប់ ។ ប្រតិបត្តិការនេះ ធ្វើឡើងនៅចំណុចដើមស្រល់ ផ្លូវជាតិលេខ៧៦ ភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ កាលពីវេលាម៉ោង១រសៀលថ្ងៃទី៤ ខែធ្នូ ។
សេចក្តីរាយការណ៍បានឲ្យដឹងថា ក្រុមរថយន្តនេះមានរហូតដល់១៨គ្រឿងជាកម្មសិទ្ធិរបស់ឧកញ៉ា ស៊ឹង សំអុល នាយកក្រុមហ៊ុន ម៉ាស្ទ័រខេសាន់ ខូអិលធីឌី នៅស្រុកកោះញែក ។ ក្បួនរថយន្តនេះបានធ្វើសកម្មភាពតាំងពីយប់ថ្ងៃទី៣ខែធ្នូ ហើយរហូតរសៀលថ្ងៃទី៤ ខែធ្នូ ទើបមានបទបញ្ជាឲ្យឃាត់ត្រួតពិនិត្យរកច្បាប់ទម្លាប់ តែឃាត់បានតែ៤គ្រឿងប៉ុណ្ណោះ ។
សេចក្តីរាយការណ៍ឲ្យដឹងទៀតថា ក្រោយពីសមត្ថកិច្ចឃាត់បានមួយដង្ហើមចង្រិត គេក៏ឃើញក្បួនរថយន្តដឹកឈើនោះ បន្តដំណើររបស់ខ្លួនទៅមុខទៀតយ៉ាងរំភើយ ក្រោមការអះអាងរបស់សមត្ថកិច្ចថាគេមានច្បាប់ត្រឹមត្រូវ ។គេនៅចាំបានថា កាលពីឆ្នាំ២០១៦ ឧកញ៉ា ស៊ឹង សំអុល ត្រូវបានសម្តេចតេជោនាយករដ្ឋមន្ត្រី ប្រកាសជាសាធារណៈជុំវិញសកម្មភាពរកស៊ីឈើនៅខេត្តមណ្ឌលគិរី និងដាក់បញ្ជាឲ្យគណៈកម្មាធិការថ្នាក់ជាតិចុះបង្ក្រាបឈើ«ឧកញ៉ា អុល»បានរាប់ពាន់ម៉ែត្រគូប ហើយតាំងពីពេលនោះមកក៏លែងឮឈ្មោះឧកញ៉ា ស៊ឹង សំអុល មួយរយៈធំ ។
ទោះជាយ៉ាងណា មហាជនបានដាក់ការសង្ស័យថា តើនាយកក្រុមហ៊ុន ម៉ាស្ទ័រខេសាន់ ខូអិលធីឌី ដែលត្រូវបានរដ្ឋបាលព្រៃឈើចុះឈ្មោះក្នុងលិខិតអនុញ្ញាតដឹកជញ្ជូនផល-អនុផលព្រៃឈើ លេខប័ណ្ណ០០០៧៧១ខ/PC/B គឺជាលោកឧកញ៉ា ស៊ឹង សំអុល មែនឬក៏ឈ្មោះដូចគ្នា? ដ្បិតក្រោយពីសមត្ថកិច្ចខេត្តមណ្ឌលគិរីចាប់ឃាត់បានបន្តិច អ្នកបើកបររថយន្តធុនធំទាំងនោះ បាននាំគ្នាយកលិខិតអនុញ្ញាតដឹកជញ្ជូនផល-អនុផលព្រៃឈើ មានអក្សខ្មៅៗមើលស្ទើរមិនឃើញ ទៅបង្ហាញសមត្ថកិច្ចមួយស្របក់ក៏បើករថយន្តចេញទៅបាត់អស់ទៅ ។
ក្រុមអ្នកតាមដានបរិស្ថានបានកត់សម្គាល់ឃើញថា សកម្មភាពកាប់ឈើក្នុងដែនជម្រកការពារសត្វព្រៃភ្នំព្រេច លំផាត់ កំពុងកម្រើកឡើងវិញ ក្រោយពីរាជរដ្ឋាភិបាលអនុញ្ញាតឲ្យមានច្បាប់ដឹកជញ្ជូនឈើឡើងវិញ ក្រោយការបោះឆ្នោតតែប៉ុន្មានខែប៉ុណ្ណោះ ។ ក្រុមអ្នកតាមដានបានបង្ហើបថា សកម្មភាពភាគច្រើនរបស់ឈ្មួញ តែងប្រើរូបមន្តកន្ទេលធំបន្លំដេក កាប់ឈើក្នុងដែនការពារដាក់ចូលក្នុងដីក្រុមហ៊ុនធ្វើជាឈើស្របច្បាប់ ។
ទោះជាកាប់ឈើរលាយអស់ពីក្នុងព្រៃ ក៏ឈើក្នុងដីក្រុមហ៊ុនមិនចេះអស់ដែរ តែបើការអភិវឌ្ឍដែលសន្យាជាមួយរដ្ឋគ្មានឃើញចេញជាផ្លែផ្កាអី្វទេ ក្រោយពេលកាប់ឈើអស់រត់ចោលក្រុមហ៊ុនបាត់ ៕
ចែករំលែកព័តមាននេះ