រាជធានីភ្នំពេញ ៖ អគ្គិភ័យមួយបានឆាបឆេះយ៉ាងសន្ធោសន្ធៅលេបត្របាក់ផ្ទះមួយខ្នងដែលមានសមាជិករស់នៅក្នុងគ្រួសារ២នាក់ឪពុកនិងកូនស្រីសុទ្ធតែមានសតិមិនប្រក្រតីដូចគ្នា បណ្តាលអោយបុរសជាឪពុកស្លាប់ក្នុងអណ្តាតភ្លើងយ៉ាងអាណោចអាធ័ម ។
ហេតុការណ៍នេះបង្កការភ្ញាក់ផ្អើលកាលពីវេលាម៉ោង៩យប់ថ្ងៃទី៤ ខែធ្នូ នៅចំណុចផ្ទះលេខគ្មានលេខ ផ្លូវលំ ទីលានចាក់សំរាម ក្រុមទី៣ ភូមិដំណាក់ធំ១ សង្កាត់ស្ទឹងមានជ័យ២ ខណ្ឌមានជ័យ ។
ប្រភពព័ត៌មានពីអ្នករស់នៅកន្លែងកើតហេតុបានប្រាប់អោយដឹងថា ជនរងគ្រោះដែលស្លាប់ដោយសារភ្លើងឆេះនោះគ្មានអ្នកណាស្គាល់ឈ្មោះគាត់ច្បាស់នោះទេ តែគេតែងហៅគាត់ថាតារ៉ូម៉ា អាយុ៦៧ឆ្នាំ ស្នាក់នៅជាមួយកូនស្រីម្នាក់ឈ្មោះ មុំ អាយុ៣៧ឆ្នាំ ។ ទាំងឪពុក និងកូនសុទ្ធតែជាមនុស្សមានសតិមិនប្រក្រតីដូចគ្នា ។ ចំណែកសម្ភារៈដែលឆេះខូចខាតរួមមានផ្ទះមួយខ្នងឆេះខូចខាតទាំងស្រុង។
ចំពោះមូលហេតុដែលបណ្តាលឲ្យឆេះនោះ ស្ត្រីជាកូនបានបញ្ជាក់ថា ដោយសារឪពុកជក់បារីហើយបោះកន្ទុយបារីចោលមិនប្រយ័ត្នក៏បណ្តាលអោយឆេះផ្ទះតែម្តង។
ប្រភពព័ត៌មានជុំវិញកន្លែងកើតហេតុបានប្រាប់អោយដឹងថា ទាំង២នាក់ឪពុក និងកូនស្រីខាងលើ រាល់ថ្ងៃតែងតែដើររើសអេតចាយតាមគំនរសំរាម គឺរើសគ្រប់មុខតាំងពីជ័រ ក្រដាស កម្ទេចកំទីក្រណាត់ សំបកដបគ្រប់ប្រភេទយកមកទុកពេញណែនក្នុងផ្ទះតែម្តង ។
មុនពេលកើតហេតុ គេឃើញនៅក្នុងផ្ទះមានភ្លើងឆេះយ៉ាងសន្ធោសន្ធៅ ហើយគេក៏ឃើញកូនស្រីជនរងគ្រោះរើខោអាវ និងមុងភួយយកចេញមកក្រៅតែម្នាក់ឯង ហើយឈរមើលផ្ទះរបស់ខ្លួនដែលកំពុងត្រូវភ្លើងឆេះធ្វើដូចគ្មានរឿងអ្វីកើតឡើង ។
ភ្លាមៗនោះក៏មានការភ្ញាក់ផ្អើលដល់ប្រជាពលរដ្ធ និងសមត្ថកិច្ចមកជួយអន្តរាគមន៍ រួចក៏បានឮសំលេងតារ៉ូម៉ាស្រែកពីក្នុងផ្ទះអោយជួយគាត់ផង ។
ដោយនៅក្នុងផ្ទះសំបូរទៅដោយកម្ទេចកំទីក្រណាត់ និងក្រដាសគ្រប់ប្រភេទ ទើបធ្វើអោយភ្លើងងាយនឹងឆេះខ្លាំង ហើយមិនអាចចូលតាមទ្វារមុខបាន កម្លាំងអាវុធហត្ថនឹងប្រជាពលរដ្ឋក៏សម្រេចចិត្តវាយទម្លាយជញ្ជាំងក្រោយបានឃើញតារ៉ូម៉ាកំពុងក្រាបលូននៅក្នុងភ្នក់ភ្លើងស្រែកដង្ហោយរកអ្នកជួយមើលទៅគួរឲ្យ
សង្វេគពន់ពេក ។
ភ្លាមៗក្រុមអ្នកជួយសង្គ្រោះបានចាប់ដៃគាត់ទាញចេញតាមប្រឡោះជញ្ជាំដែលពួគគេទម្លាយដែរ តែទាញមកមិនបានសោះ គឺរបកតែស្បែកចេញមក ពេលកំពុងព្យាយាមទាញគាត់ចេញ ជាអកុសលមេដំបូលផ្ទះបានឆេះដាច់ធ្លាក់សង្កត់ពីលើគាត់បន្ថែមទៀត បណ្តាលឲ្យអណ្តាតភ្លើងលេបត្របាក់យកអាយុជីវិតលោកតាយ៉ាងអាណោចអាធ័ម ដែលក្រុមអ្នកជួយសង្គ្រោះមិនអាចជួយអ្វីបាន ។
ភ្លាមៗនោះក៏មានវត្តមានក្រុមរថយន្តពន្លត់អគ្គិភ័យមកជួយអន្តរាគមន៏ពន្លត់ដែរ ដោយប្រើប្រាស់រថយន្តពន្លត់អស់៥គ្រឿង ប្រើរយៈពេល១ម៉ោងកន្លះទើបធ្វើការពន្លត់បានទាំងស្រុង។
បន្ទាប់ពីពន្លត់ភ្លើងបានទាំងស្រុង ក្រុមពន្លត់អគ្គីភ័យក៏បានធ្វើការកាយរកសព ហើយប្រទះឃើញសពនៅក្រោយផ្ទះកប់ក្នុងគំនរភ្លើងមានសភាពឆេះខ្លោចមើលទៅគួរឲ្យសង្វេគពន់ពេក។ ក្រោយកើតហេតុ សពត្រូវបានកម្លាំងសមត្ថកិច្ចមូលដ្ឋានចាត់ចែងធ្វើបុណ្យតាមប្រពៃណីនៅវត្តស្ទឹងមានជ័យ ។ ដោយឡែកកូនស្រីគាត់ម្នាក់សង្ឃឹមថានឹងមានអង្គការជួយសង្គ្រោះ និងមើលថែ ៕
ចែករំលែកព័តមាននេះ