ខេត្តបន្ទាយមានជ័យ ៖ ជនសង្ស័យដែលចាក់សំលាប់យុវជនរងគ្រោះស្លាប់ក្នុងក្លឹបកំសាន្តហ្គោលថោនត្រូវបានកងរាជអាវុធហត្ថឃាត់ខ្លួនបានម្នាក់ក្នុងចំណោម១០នាក់បានគេចខ្លួនត្រូវបានកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់នៅថ្ងៃទី០៤ ខែធ្នូ ឆ្នាំ២០១៨ ។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្តបន្ទាយមានជ័យបានប្រាប់ថា ជនសង្ស័យដែលត្រូវចាប់ខ្លួនករណីចាក់សម្លាប់ជនរងគ្រោះមានឈ្មោះ ស៊ុយ ឧត្តម ភេទប្រុស អាយុ១៨ឆ្នាំ រស់នៅភូមិតារាងបាល់ សង្កាត់កំពង់ស្វាយ ក្រុងសិរីសោភ័ណ ។
លោកបានបញ្ជាក់ថា ដោយយោងតាមពាក្យបណ្តឹងឈ្មោះ អ៊ុក ដារា ភេទប្រុស អាយុ៤០ឆ្នាំរស់នៅភូមិ-សង្កាត់កំពង់ស្វាយ ក្រុងសិរីសោភ័ណ បានប្តឹងជនសង្ស័យ១ក្រុមប្រមាណ១០នាក់បានធ្វើសកម្មភាពចាក់ទៅលើជនសងគ្រោះឈ្មោះ លាង ឡេង ភេទប្រុស អាយុ២២ឆ្នាំ រស់នៅភូមិព្រែកឯក ឃុំពាមឯក ស្រុកឯកភ្នំ ខេត្តបាត់ដំបង ដែលស្នាក់នៅធ្វើកម្មករម្នាងសីលា ក្នុងក្រុងសិរីសោភ័ណ ។
នៅពេលរងគ្រោះត្រូវជនសង្ស័យចាក់សំលាប់គឺបានទៅរាំកម្សាន្តនៅក្នុងក្លឹបកំសាន្តហ្គោលថោនពីរនាក់មិត្តភក្តិពេលផឹកស៊ីស្រាប់តែមានក្មេងស្ទាវ១ក្រុមក្នុងចំណោមប្រមាណ១០នាក់បានចាក់ជនរងគ្រោះឈ្មោះ លាង ឡេង បណ្តាលត្រូវរបួស៣កន្លែងហូរឈាមពេលបញ្ជូនទៅពេទ្យបណ្តាលស្លាប់ដែលកើតឡើងនៅអំឡុងម៉ោង១២និង៣០នាទីរំលងអធ្រាត្រឈានចូលថ្ងៃទី២ ខែធ្នូ ឆ្នាំ២០១៨ នៅក្នុងក្លឹបហ្គោលថោន ស្ថិតភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ។
លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យបានប្រាប់ថា ក្រោយពេលទទួលបណ្តឹងភ្លាមៗកម្លាំងកងរាជអាវុធហត្ថបានចុះស្រាវជ្រាវកំណត់មុខសញ្ញាឃាត់ខ្លួនជនសង្ស័យម្នាក់ចំណែកបក្ខពួកត្រូវបានគេចខ្លួនម៉ោង២យប់ឈានចូលថ្ងៃទី២ ខែធ្នូ ឆ្នាំ២០១៨ នៅក្នុងបរិវេណក្លឹបហ្គោលថោន ស្ថិតភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ។
លោកបានបញ្ជាក់ថា ក្រោយពេលឃាត់ខ្លួនជនសង្ស័យឈ្មោះ ស៊ុយ ឧត្តម បាននាំយកសាកសួរតាមចម្លើយសារភាពគឺនៅយប់កើតហេតុខ្លួនបក្ខពួកប្រមាណ១០នាក់នៅពេលទៅរាំកម្សាន្តក្លឹបហ្គោលថោននៅវេលាម៉ោង១២និង៣០នាទីរំលងអធ្រាត្រឈានចូលថ្ងៃទី០២ ខែធ្នូ ឆ្នាំ២០១៨ បានផឹកស៊ីស្រាប់តែមានជន១ក្រុមប្រមាណ៣នាក់បានវាយតប់គ្នាកន្លែងផឹកស៊ីស្រាប់តែមានជនសង្ស័យម្នាក់ឈ្មោះ ហេង រតនា ឈរពីក្រោយជនរងគ្រោះកាន់ដែកស្រួចចាក់ទៅលើជនរងគ្រោះបណ្តាលរបួសធ្ងន់ ហើយបក្ខពួករបស់ខ្លួនបានរត់គេចខ្លួនអស់នៅម្នាក់ឯងត្រូវកម្លាំងកងរាជអាវុធហត្ថឃាត់ខ្លួនកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់ ៕
ចែករំលែកព័តមាននេះ