ខេត្តកណ្តាល ៖ ក្រោយពេលទំនេរពីការងារធ្វើស្រែចម្ការ ពលរដ្ឋមួយចំនួនធំរស់នៅភូមិរាំងជូរ ឃុំក្អមសំណ ស្រុកលើកដែក បាននាំគ្នាទៅរាវលៀសនៅតាមបឹងបួ ព្រែក ប្រឡាយ ដើម្បីយកមកធ្វើម្ហូបអាហារផង និងលក់ឲ្យឈ្មួញផង ដែលជារបរមួយជួយទ្រទ្រង់ដល់ជីវភាពក្នុងគ្រួសារអ្នកស្រុកនៅតំបន់នេះ ។
បើតាមពលរដ្ឋបានលើកឡើងថា ជារៀងរាល់ឆ្នាំ នៅពេលដល់រដូវទឹកស្រក ពួកគាត់តែងនាំគ្នាទៅរាវលៀសសម្រាប់ហូបខ្លួនឯងផង និងលក់យកលុយមកដោះស្រាយជីវភាពក្នុងគ្រួសារផង ។ ពួកគាត់បន្ដថា ៖« ពួកយើងបើកទូកកាណូតទៅរាវលៀសនៅតាមបឹងបួ ព្រែក និងប្រឡាយនានានៅខាងក្រោយភូមិដែលមានចម្ងាយប្រហែល៣ទៅ៤គីឡូម៉ែត្រ ដោយចាប់ចេញដំណើរពីម៉ោង៥ទៅ៦ព្រឹក រហូតដល់ម៉ោង៤ឬ៥ល្ងាច ទើបត្រឡប់មកផ្ទះវិញ »។ ពួកគាត់បញ្ជាក់បន្ថែមថា ក្នុង១ថ្ងៃ ពួកគាត់អាចរាវលៀសបាន ដោយអ្នកខ្លះជាង១០០គីឡូក្រាម ឬ២០០ទៅ៣០០គីឡូក្រាមក៏មាន ហើយនៅពេលមកដល់កំពង់ទូកវិញ គឺមានឈ្មួញមកពីភ្នំពេញបើករថយន្ដមកចាំទទួលទិញតែម្ដង ។
ពួកគាត់ថា ៖« របរនេះថ្វីដ្បិតមើលទៅមិនធំដុំ តែរកលុយបានយ៉ាងធូរ ដោយក្នុង១គីឡូក្រាម បើលៀសលេខលេខ១(ធំ)មានតម្លៃពី១.៨០០ទៅ២.០០០រៀល។ ចំណែកលេខ២វិញ តម្លៃ១.៥០០រៀល និងលេខ៣ តម្លៃ៨០០ទៅ១.០០០រៀលក្នុង១គីឡូក្រាម។ ដូច្នេះបើករកបាន១០០គីឡូក្រាម ក្នុង១ថ្ងៃក៏អាចរកលុយបានក្នុងរង្វង់ពី១០ទៅ២០ម៉ឺនរៀលដែរ »។ ពួកគាត់អះអាងថា ៖« ក្នុង១ថ្ងៃ ក្រោយពីកាត់ថ្លៃសុីចាយ ថ្លៃប្រេងសាំងរួចរាល់ នៅសល់ក្នុងម្នាក់ៗពី១០មុឺនទៅជាង១០មុឺនរៀលដែរ ដែលអាចយកមកប្រើប្រាស់សម្រាប់ដោះស្រាយជីវភាព និងទិញជីថ្នាំថែទាំស្រែចម្ការ និងនៅសល់ខ្លះគ្រាន់ដោះស្រាយឲ្យកូនបានទៅរៀនសូត្រផង ៕
ចែករំលែកព័តមាននេះ