រាជធានីភ្នំពេញ៖ តារាសម្រៀងកញ្ញាសួស វីសា បានប្រកាសថា នាងនឹងបង្ហាញមុខគូស្នេហ៍ដោយមិនលាក់លៀមនាពេលខាងមុខ បន្ទាប់ពីជីវិត និងការងារសិល្បៈរបស់នាងទទួលបានជោគជ័យ ។ ការប្រកាសរបស់តារាចម្រៀងនៅក្នុងផលិតកម្មហង្សមាសរូបនេះធ្វើឡើងបន្ទាប់ពីមួយរយៈចុងក្រោយនេះនាងត្រូវគេដាក់ការសង្ស័យថាកំពុងតែបង្កាត់ភ្លើងស្នេហ៍ជាមួយលោកថម មី ដែលជាតារាសម្តែង ។
សួស វីសា តែងតែបដិសេធអំពីរឿងស្នេហ៍ជាមួយថម មី ដោយនាងបានចាត់ទុកលោកគ្រាន់តែជាមិត្តភក្តិសិល្បៈប៉ុណ្ណោះ បើទោះបីជាលោកថម មី បានប្រកាសស្នេហារវាងលោក និងនាងក៏ដោយ ។
នាពេល ថ្មីៗកន្លងមកតារាចម្រៀងសួស វីសា បានប្រកាសថា នាងនឹងបង្ហាញមុខគូស្នេហ៍របស់នាងដោយមិនលាក់លៀមទៀតទេ ។ បើទោះបីជាសំណេរដែលបានបង្ហោះតាមហ្វេសប៊ុករបស់វីហ្សាមិនបានបញ្ជាក់ថា ជាអ្នកណាពិតប្រាកដនៅឡើយ ប៉ុន្តែទស្សនិកជនភាគច្រើនបានផ្តោតទៅលើតារាសម្តែងលោកថម មី ។
សួស វីសា បានបង្ហោះសារតាមហ្វេសប៊ុករបស់ខ្លួនថា «អាយុច្រើន ហើយៗជីវិតគ្រួសារ ជីវិតការងារក៏ជោគជ័យច្រើនហើយដែរ នៅឡើយតែរឿងជីវិតគូ មិនដឹងពេលណាអាចជោគជ័យដូចគេ តែក៏សង្ឃឹមថា នឹងជោគជ័យ ឆាប់ៗ ព្រោះខ្ញុំបានសម្លឹងឃើញមនុស្សល្អម្នាក់រួចហើយ ហើយម្នាក់នោះគឺតែងតែនៅក្បែរខ្ញុំគ្រប់ពេលមិនដែលរត់ចោលខ្ញុំទេ ដែលសំខាន់ គឺគេអាចទ្រាំនឹងចរិតខ្ញុំ និងអាចនិយាយបានថាគេយល់ពីខ្ញុំជាង អ្នកណាៗទាំងអស់ ទោះជាម្នាក់នោះ ល្អ ឬមិនល្អនៅក្នុងភ្នែកអ្នកទាំងអស់គ្នា ទោះអ្នកគ្រប់គ្នាពេញចិត្ត ឬមិនពេញចិត្ត គឺវាលែងសំខាន់ហើយសម្រាប់ខ្ញុំ អ្វីដែលសំខាន់គឺខ្ញុំពេញចិត្ត ។
ធម្មតាស្បែកជើងយើងជាអ្នកពាក់ អ៊ីចឹងមានតែយើងទេទើបដឹងថាវាឈឺ វារលុង ឬចង្អៀត យ៉ាងណា គឺមានតែយើងម្នាក់គត់ដែលដឹង ឯអ្នកក្រៅគឺគេបានត្រឹមតែយកភ្នែកមើល នឹងវាយតម្លៃថា យើងពាក់សម ឬមិនសម តែប៉ុណ្ណោះ ! សមយ័នេះទៅហើយ គឺគេមិនចាំបាច់យកសង្សារ ឬយកប្តីមកដើម្បីគ្រាន់តែមកបង្អួតអ្នកណាថាអស្ចារ្យទេ គឺគេយកមកដោយចិត្ត និងចិត្ត បេះដូង និងបេះដូង ទោះមានស៊ី ឬអត់ស៊ីតែមានក្តីសុខ ពិតៗ ព្រោះពេលស្លាប់ទៅអត់មានយកអីទៅជាមួយបានទេ !
គិតមើលសម័យនេះ សូម្បីតែមនុស្សប្រុស គេហ៊ានរៀបការជាមួយប្រុសដូចគ្នាដោយបើកចំហ ពេញដោយក្តីស្រលាញ់ ស្រីស្រលាញ់ស្រីដូចគ្នា គេហ៊ានចាប់ដៃគ្នាដោយបើកចំហ ចុះខ្ញុំ ?ហេតុអីត្រូវលាក់បាំង? ហេតុអីត្រូវលាក់លៀមទាំងដែលយើងមិនមែនយកប្តីគេ ឬប្រពន្ធគេផង ? អ៊ីចឹងគួរដល់ពេលបង្ហាញមនុស្សសំខាន់ដោយពេញលេញ និងពេញតម្លៃហើយ »៕
ចែករំលែកព័តមាននេះ